SAN LUCAS 2

1Ex chuncha ni jalhachimoʼonuʼ Augusto va lhinaul ni kaʼalil latsʼoqʼulanti tachun ni lapanakni ni anchanuʼ lakamunukpaʼ. 2Ni anchanu latsʼoqʼulanti va yu pʼunaj ixtamakay tejkan Cirenio xagobernador Siria ixjunita. 3Ex chuncha tachun ni lapanakni talhiʼalcha istsʼoqʼulakʼan lakatamin por lakatamin taʼan ixputaulankʼan ixtajunita. 4Ex va chuncha ni José vachu taxtulcha ni laka putaulan Nazaret ni laka estado Galilea. Va al laka putaulan Belén taʼan ixputaulan David ixjunita. Ni José minchal kun ixlapanakni David yu maqancha ay jalhachimoʼonuʼ ixjunita, 5xlhiyucha ancha al istsʼoqʼulakʼan. Tʼaʼal ni María ni yu iskʼininti. Yucha aynacha ixjunita. 6Ex chuncha tachaʼal ni Belén. Tejkan laqchaʼal julchan, va maqlaqavanalcha ni María. 7Lhitsukulcha istsʼal yu saʼoqsni, pamilil kun laqchʼiti ex va mamal taʼan tavajin ni jukin. Jantu kaʼalil chaqaʼ taʼan lay kataloqojlhi. 8Ni anchanu putsʼista ixtavilanal lapanakni yu ixtalhistakʼa ixborregoskʼan la ixlhimaqspaʼ ni putaulan Belén. 9Ex va laktasunil ixmayul ni Dios, va tus tʼoqx jamaputunkunil ixmaklku ni Dios, va la pʼaysni ixjunita. Ex chuncha yuʼuncha va la tatalhanal. 10Pero lakjunil ni ixmayul Dios: —Jantu katʼalhanantʼik. Kitʼin klajunputunau taun chivinti yu va ayaj ox yu kalakmaʼachajuyaʼ tachun ni lapanakni. 11Chavaycha la ixputaulan David va tsukuchal qayntaun yu katamalaqtaxtuyan ni uxiknankʼan. Yucha ni Cristo yu laksakta ni Dios para kamil lhachimoʼon ni lakamunukpaʼ. 12Katʼemayapitik ni jasʼatʼa pamilkanta, mamakanta taʼan tavajin jukin. Tejkan chuncha katʼemayapitik ex chuncha kʼapʼukʼatsʼayapitik ni laqsaval yu klajunau. 13Ex nimancha tatasul lhuvaj ixmayulnin Dios, ay tamakal ni Dios, va tanajun: 14Ay kamakakal ni Dios laktʼiyan. Aniy lakamunukpaʼ oxamaktaun katataulal ni lapanakni yu tamakay yu lhinajun ni Dios. 15Ex chuncha tejkan taʼanchoqolcha laktʼiyan ixmayulnin Dios, ex yu jalhistaknan va talajunil: —Kaʼaucha ni laka putaulan Belén, kaʼaucha laqtsʼinin tacha tapasal yu kintamasunin Dios. 16Ex tatakyauʼalcha lakpuxkaunan, tatemachal ni María ali José kun ni jasʼatʼa, va mamakanta taʼan tavajin jukin. 17Ni jalhistaknan tejkan talaqtsʼil ni jasʼatʼa talaqputeʼenichoqol ni lapanakni yu ancha tayanal. Tajuniʼol yu naul ni ixmayul Dios tejkan lhichivinil ni jasʼatʼa. 18Ex va tus saq tatayal tachun yu taqasmaktayl yu talaqputeʼel ni jalhistʼaknan. 19Pero ni María, yucha va maʼaʼol la ixjalhanuti tachun ni anchanu chivinti para kapastaklhi. 20Ex taminchoqochalcha aaqtaun ni jalhistaknan, talhiʼaylcha, va ay tamakal ni Dios por tachun yu ixtalaqtsʼinta kun yu ixtaqasmakta. Va laqsaval tapasal tacha jalakjunil ni ixmayul Dios. 21Ex va chuncha tejkan tapasal laqatsajin julchan va xvililichukʼunikal ni tsʼal. Ex tamukʼanilcha ixtaqaʼuti, va tajunil Jesús, tacha naul ixmayul Dios tejkan jantukaʼ ixlhitsukuy la ixpulakna ni ixnati. 22Ex astan vachuʼ tamakal tachun yu ixtapaxtoqniy katamakal la ixlhachimoʼon ni Moisés para oxicha kataval. Ex chuncha talhaʼalcha ni jasʼatʼa yu ay lakatajtan, laka putaulan Jerusalén para katamaqxtaqnil ni Dios. 23Va chuncha tsʼoqkanta la ixlhachimoʼon ni Dios: “Tachun tsʼal yu saʼoqsni yucha ixnavin Dios kunaʼ.” 24Xlhiyucha ancha taʼal maqxtaqniniʼ ixlapaxkankʼan yu tacha najun ixlhachimoʼon Dios: laʼatʼuy laqaxqavan u laʼatʼuy palumax. 25Qayntaun lapanaki yu junkan Simeón va ancha ixvil Jerusalén. Ni anchanu lapanaki la ox ixtiʼukxuyal, va ixtoʼoyay Dios. Ixpakxan para kaʼalil qayntaun yu kamalakaʼulal xalapanakni Israel. Ni Espíritu Santo va ixtʼatiʼukxuyal ni yucha. 26Va ixmasunita ni Espíritu Santo ni jantu kaniyaʼ tus kalaqtsʼinaʼ ni Cristo yu kamalaqachayaʼ Dios. 27Ex chuncha ni Espíritu Santo va makʼatsanil ni Simeón para katanul lakatajtan. Ex vachuʼ ixpayan ni Jesús ancha tatanuchal para katamakal tacha najun ixlhachimoʼon Moisés. 28Ex ni Simeón chʼapal ni jasʼatʼa, chʼixlhi, ay makal ni Dios va naul: 29Chavaycha, Dios kiJalhachimoʼonuʼ kʼatʼi, ni kitʼin yu miʼoqxtamati kunita va oxamaktauncha kaknil vachu va tacha yu kʼiʼun. 30Chavay va klaqtsʼilcha la kintalakavanti yu Jamalaqtaxtunuʼ. 31Yucha malaʼachʼatʼa para katalaqtsʼil tachun ni lapanakni. 32Yucha va tacha taun maklku yu kalakmaputunkuviniyaʼ ixjatapastakʼatkʼan ni lapanakni yu jantu israelitas kataval. Ni kijnankʼan yu israelitas kuntau va por yucha kintatoʼoyayan ni lapanakni. 33Ex chuncha yu ixpay ali ixnati va tus saq tatayal por ixchivinti yu lhichivinil ni jasʼatʼa. 34Ex ni Simeón va skʼinil Dios ni kalaqʼaqtayjul. Naul, va junkal ni María yu ixnati ni jasʼatʼa: —Ni aniy jasʼatʼa va por yucha pumalhuu xalapanakni Israel katataqtayaʼ, vachu pumalhuu kataʼostaulchoqoyaʼ. Kamasuyaʼ yu ox tin pero jantu ox katalaqtsʼinaʼ. 35Chuncha ox katasuyaʼ ixjatapastakʼatkʼan lhuvaj lapanakni. Xlhiyucha kaxkaniyan melhanuti tus va tacha espada yu kaltʼoʼonikʼa mintankilakna. 36Vachu ancha ixvil qayntaun xanati yu ixlaqputeʼey ixchivinti Dios. Yucha ixjunkan Ana, va istsiʼi Fanuel ixjunita yu ixmaqlaqapʼu Aser. Ni Ana la lhuvaj ixjachʼitin ixjunita. Yu ixapay va laqatujun jachʼitin ixtʼatʼajun tejkan nil. 37Ex ni Ana yucha va ochenta y cuatro jachʼitin tiyau ixtiʼukxuyal. Va lhilhiy ixtapatsay laka ay lakatajtan, jantu ixtaxtuy, va iskʼin Dios, ixtaskʼajay. Va chuncha ixtamoʼoniy ni Dios. 38Ex chuncha tejkan ancha tachaʼal José ali María, vachucha chaʼal ni Ana. Va lhipaxkajlaqtsʼil Dios por yu jasʼatʼa. Ex chuncha jalhixaqalal tachun ni lapanakni yu ixtapakxanʼita para kalaqtaxtul ni laka putaulan Jerusalén. 39Ex chuncha tejkan ni María ali José tamakaʼolcha tachun yu ixnajun ixlhachimoʼon ni Dios, va taʼanchoqolcha xaʼestado Galilea la ixputaulankʼan yu junkan Nazaret. 40Ancha aynchal ni jasʼatʼa, va ancha laqapʼaysninchal. Va lhuvaj jatapastakʼati lhitsukul, vachu la mapaynil ni Dios. 41Ixpayan ni Jesús ixtaʼan laka Jerusalén taun taun jachʼitin tejkan ixʼalin ni Paxku yu ay ixkʼatankʼan ni israelitas. 42Tejkan laqchaʼal laqakautʼuy ixjachʼitin ni Jesús, va jalaktʼaʼal laka kʼatan. 43Tejkan paʼanchal ni anchanu kʼatan, ni ixpayan ni Jesús ixtaʼanchoqota la ixchaqakʼan. Jantu katakʼatsal ni Jesús vananaj taulal laka putaulan Jerusalén. 44Ixtalhilay kalaktʼamil alati lapanakni y chuncha va taun julchancha lakatin ixtaʼanta. Tejkan tapuxkaul la ixlapanaknikʼan kun ixʼamigoskʼan, 45jantu katatemal. Ex ixtaminchoqota lakxkaunan laka putaulan Jerusalén. 46Tejkan paqtʼutunuʼ, tatemal ni Jesús yu ay lakatajtan. Va ixlaktʼavil yu ixtamasuy ixlhachimoʼonkʼan ni israelitas. Ixlajqasmatʼa y vachuʼ ixlaklhisakmiy chivinti. 47La ox ixmalaqasiy y la ox ixlajqaltajiy tus va saq tataulal tachun yu ixtaqasmatʼa. 48Tejkan tatemal ni Jesús, ni ixpayan va saq tatayal. Va naul ni ixnati: —Kesʼatʼa, ¿valiʼiycha chuncha laycha? Mimpay ali kitʼin klapuxkauyau, jantu klatemayau, xakmaqaninintau. 49Ex lakjunil ni Jesús: —¿Valiʼiycha kilapuxkauyau? ¿Jantu kʼatsʼayatʼik ni va maqskʼiniy kakmakal ixlhitapatsa kimpay? 50Pero yuʼuncha jantu katamalaqasil yu lakjunil. 51Ex laktʼaʼanchoqol ni Jesús laka putaulan Nazaret. Va ixlajqalasmatʼa. Ni ixnati va ixmaʼay la ixjalhanuti tachun yu tapasal. 52Ex ni Jesús va ixʼajin y vachu ixʼayʼan ixjatapastakʼati. Vachu ni Dios kun ni lapanakni ixtalhiʼachantajuy ni Jesús.

will be added

X\