SAN LUCAS 17

1Ex ni Jesús lakjunil ixtʼaltanan: —Si kaʼalinaʼ yu maqtaqalhinin pero paynicha yu jamalaniy lapanakni para katamakal yu jantu lajʼoxi. 2Apalay ox kaval kapixtuchʼimukʼakal xachiyux pachʼikni y kamajʼankalcha lakamar. Apalay lhitaʼay kunaʼ incha kamamaqtaqalhinil qayntaun lakatʼuniy tacha yu aniy jasʼatʼa. 3La ox kʼalhistʼajkʼantʼik. Incha milaqaj makaniyan yu jantu ox, ex kʼaxaʼalatʼi. Incha mapaxay ixjatapastakʼati, ex kʼamalaqmixinin. 4Incha makaniyan yu jantu ox mas va aqtujun laka julchan y aqtujun mapaxachoqoy ixjatapastakʼati ex kʼamalaqmixinin. 5Ex yu ixtamalaqachan ni Jesús va tajunil: —Kilaʼaqtayjuu para apalay ox kaval kilhakapuʼatkʼan. 6Ex chuncha ni Jesús va lakjunil: —Mas va tsʼuniy milhakapuʼatikʼan tacha yu lakatʼuniy xataltsʼi mostasa, ex lay unatʼik ni aniy kʼiu katakuklhi, kachʼankal ixʼaman lakamar y va chuncha kunaʼ yu unatʼik. 7Xataʼayuʼ uxiknankʼan va kaʼalil miʼoqxtamatikʼan va kaloqnul u va kalhistaklhi mimborregoskʼan. Ex tejkan kaminchoqol laqa chaqaʼ jantu kʼaʼun: “Kasoʼo, katʼaulchiycha, kavaynchiycha.” 8Va kʼaʼun: “Kʼalaʼoxitʼi kivayti, kʼamapʼaxa milaqchʼiti, kimunincha kivayti, kitʼin pʼunaj kakvaynaʼ, uxintʼi astan.” 9Vachuʼ jantu paxtoqniyan kʼaʼun: “Malaqpuchuncha” tejkan kamakaʼol ixlhitapatsa yu lhiʼun. 10Vachu va chuncha uxiknankʼan tejkan kʼamakʼaʼoyapitik tachun yu talhijunan Dios va kʼaʼunitʼik: “Ka jantu ox oqxtamatin kuntau. Vamun ikmakau yu kilalhijuniu.” 11Ex chuncha tejkan ixʼanta tus Jerusalén ni Jesús va ixtiʼukxuyal taʼan paqxtoʼa ni xaʼestado Samaria kun xaʼestado Galilea. 12Ex tejkan chaʼal taun lakatʼuniy putaulan ancha talapaxtoqlhi pumakau lapanakni, va ayaj ixtalakapuchʼita. Va amaqati tatʼasanil, va tajunil: 13—Jesús jamalaniniʼ, kilamapayniu kijnankʼan. 14Ex tejkan ni Jesús jalaqtsʼil va lakjunil: —Kapʼintʼik tasuninin ni kuras. Ex chuncha tejkan ixtaʼanta lakatin, va ancha palaycha tajunʼol ixtaqanʼatikʼan. 15Ex chuncha qayntaun xataʼayuʼ makal kuenta ni oxicha ixjunchoqota, va taspʼikchoqol, va la pʼas aqtayl ay makay ni Dios. 16Va talakaputal taʼan ixyal ni Jesús, aqtayl skʼiniy lhimalaqpuchuncha. Ni yucha va machaqaʼ Samaria. 17Ex naul ni Jesús: —Va pumakau yu palay tajunchoqol. ¿Toʼoxtaycha ixtaʼan yu pumanajatsi? 18¿Vamun yu aniy yu jantu israelita kaval taspʼikchoqolcha para ay kamakal ni Dios? 19Ex ni Jesús va junil ni jachʼiniʼ: —Kaʼostʼaʼulcha, kapʼinchʼoʼocha. Va kʼilhakʼapʼupʼicha, xlhiyucha oxicha xaʼunchʼoʼoy. 20Ex chuncha ni fariseos va talhisakmil ni Jesús tavanancha kalhachimoʼonunaʼ ni Dios. Ex lakjunil ni Jesús, va naul: —Jantu katasuyaʼ tejkan kaʼaqtayaʼ kalhachimoʼonunaʼ ni Dios. 21Nisin jantu lay katanaul: “Kalaqtsʼi. Va aniy yal”, u “Avintʼi vilchal.” Jantu lay chuncha kanaunkal. Ni Dios lhachimoʼonunta la ixjatsukuntikʼan ixlapanakni. 22Ex lakjunil ixtʼaltanan ni Jesús: —Kaminaʼ julchan kilalaqtsʼinputunchoqoyau kakminchoqol ni kitʼin yu Sasʼatʼa Lapanaki para kaklhichimoʼol pero jantukaʼ lay kilalaqtsʼinau. 23Va katajunan lapanakni: “Aniy yal”, u “Avintʼi vilchal.” Pero jantu kʼapʼuxkʼautʼik, jantu kamakʼaʼuntʼik milhitapatsakʼan. 24Ni makaliukniti va tasuʼojoy tachun ni laktʼiyan y vachu va chun kunaʼ tejkan kakminchoqoyaʼ ni kitʼin yu kval Sasʼatʼa Lapanaki. 25Pero maqskʼiniy kakmaqanlqajnanʼelal ni kitʼin yu kval Sasʼatʼa Lapanaki y vachu kintaʼakchʼintamaʼelayaʼ yu chavaycha tatʼajun lapanakni, jantu kintalaqaʼiyaʼ para kaklaklhichimoʼol la ixjatsukuntikʼan. 26Tejkan kakminchoqoyaʼ ni kitʼin yu Sasʼatʼa Lapanaki vachu va chun kajunchoqoyaʼ tacha ixjunita tejkan ixtʼajun Noé. 27Ni anchanuʼ lapanakni ixtavajin, ixtaʼoqnun, ixtalakxtuklay, ixtamalakxtuklhanan, y vamun yuʼ ixtapastakta tus tejkan tanul Noé laka barco. Ex alil ay akskajʼuti y tamuxtuʼol tachun ni lapanakni. 28Vachu va chuncha kajunchoqoyaʼ tacha ixjunita tejkan ixtʼajun Lot. Va ixtavajin, ixtaʼoqnun, ixtastʼanan, ixtaʼiy axtoqnuʼ, ixtamakay chaqan. 29Pero tejkan taxtul Lot ni putaulan Sodoma va taʼeltajul laktʼiyan jikmi kun azufre y va laqmaqniʼol ni lapanakni. 30Vachu va chuncha kajunchoqoyaʼ tejkan kaktasuchoqoya ni kitʼin yu Sasʼatʼa Lapanaki. 31’Tejkan kachinaʼ ni anchanu julchan ex yu yal la ixʼukxna chaqaʼ jantu katanuchoqol iniʼ yu ixnavin yu tanun la ixchaqaʼ. Yu yal laka kuxtu jantucha kaʼanchoqol la ixchaqaʼ. 32Kapʼastʼaktʼik ni ixanati Lot val matsati tejkan talaqaspʼiklhi. 33Ni lapanaki yu ixʼaman malaqtaxtuputun ixjatsukunti, yucha kamaqatsʼanqayaʼ. Pero yu maqxtaʼa ixjatsukunti, yucha kalhitsukuchoqoyaʼ. 34Klajunau tejkan kakminchoqoyaʼ katatamayaʼ qayntʼuy aqataun putaman. Qayntaun kalhaʼankanaʼ y yu aqayntaun katamakaunaʼ. 35Qayntʼuy xanatin katatsukuyaʼ skitinin. Qayntaun kalhaʼankanaʼ y yu aqayntaun katamakaunaʼ. [ 36Qayntʼuy lapanakni katatapatsayaʼ laka kuxtu. Qayntaun kalhaʼankanaʼ y yu aqayntaun katamakaunaʼ.] 37Ex talhisakmil yu ixtʼaltanan: —Jalhachimoʼonuʼ, ¿toʼoxtaycha chuncha katapasayaʼ? Ex ni Jesús va lakjunil: —Va katasuyaʼ vachu va tacha tasuy taʼan alin yu janinin, va ancha tataqxtoʼa ni lajʼay tsʼoʼon.

will be added

X\