1 Taun xajulchan jastaknati al vayaʼ ni Jesús la ixchaqaʼ qayntaun xaʼukxtin fariseos. Lati ni fariseos va ixtalaqtsʼin ni Jesús incha kamakal tuʼuchun yu jantu kapaxtoqnil ixlhachimoʼonkʼan. 2 Ex ancha la ixtalakaʼukxpuʼ ni Jesús ixyal qayntaun lapanaki va ixlakakʼunta. 3 Ex ni Jesús jalaqxaqalal ni fariseos kun yu ixtamasuy ixlhachimoʼonkʼan ni israelitas. Va laklhisakmil: —¿Tis va sun najun kilhachimoʼonkʼan? ¿Va lhinaunkan jakʼuchʼunti xajulchan jastaknati u jantu? Pero yuʼuncha va saq taval. 4 Ex ni Jesús chʼapal ni taqanʼan, va palay makal, va malaqachachoqol. 5 Ex lakjunil ni alati lapanakni: —Uxiknankʼan va katajqajul mimburrokʼan u mivakaxkʼan lakxkan va niman kʼamakʼutʼutʼik mas va xajulchan jastaknati. 6 Ex yuʼuncha jantu lay tuʼuchun katanaunchoqol. 7 Ex tejkan taʼaqtayl tataulay laka mesa, jalaqtsʼil ni Jesús tachun yu ixlaklhijunkan vayti, va tataulputun taʼan tataulay yu lajʼay lapanakni. Ex va lakjunil ni aniy chivinti yu xtaʼa jatapastakʼati: 8 —Tejkan lhiʼunkʼanatʼik kapʼintʼik xalakvayti lakxtuklati jantu kʼalaksaktʼik taʼan tataulay ni lajʼay lapanakni. Ka va lay kachil ataun lapanaki yu apalay ay xajantu uxintʼi. 9 Ex yu xalhinaunaʼ kalaqminan y kajunan: “Kʼaxtaqnin ni mimputaulan yu ataun lapanaki.” Ex katʼamaxaniyeʼe, katʼauleʼe alakataun putaulan taʼan tataulay yu xalakstʼuniy. 10 Xlhiyucha tejkan kalhiʼunkʼaneʼe kapiti vayaʼ, ex kataʼul taʼan tataulay yu jantu lajʼay lapanakni. Ex chuncha yu xalhinaunaʼ kalaqminan va kajunan: “Laqaj, kʼatʼapʼas taʼan tataulay yu lajʼay lapanakni.” Ex chuncha jantu katʼamaxaniyeʼe la ixtalakaʼukxpukʼan tachun ni lapanakni. 11 Tachun yu lajʼay takʼatsan va lakstʼuniy kalakmakakanaʼ pero tachun yu lakstʼuniy takʼatsan va lajʼay kalakmakakanaʼ. 12 Ex chuncha ni Jesús junil ni xalhinaunaʼ: —Tejkan makʼay lakvayti jantu vamun kʼalaklhiʼun miʼamigos ali mintʼalaqaunin ali milapanakni ali mintʼataulnin yu maqalinin. Jantu chuncha kʼamakʼatʼi. Va katalhijunchoqoyan la ixchaqakʼan ex chuncha va tapaxanti jun. 13 Pero tejkan makʼay lakvayti kʼalaklhiʼun ni kilpatanin ali ni lakmaknin ali ni talaknin ali ni laʼachʼixin. 14 Ex chuncha kalhitsʼukʼuyeʼe achati, va por jantu lay katamapalchoqoyan. Pero kʼamapʼalchʼoʼonikʼaneʼe tejkan katakujchoqoyaʼ tachun yu tanitacha yu jamalaqtaxtukantacha. 15 Ex chuncha tejkan qasmaklhi qayntaun yu ancha ixvil laka mesa, va naul: —Ayaj kataʼachanaʼ tachun yu katavaynaʼ taʼan kalhachimoʼonunaʼ ni Dios. 16 Ex ni Jesús va junil: —Taun julchan qayntaun lapanaki ixmakay taun ay lakvayti va ixlaklhijunita lhuvaj lapanakni. 17 Ex tejkan lakachilcha xahora lakvayti va malaqachal ixʼoqxtamati para kalakjunil yu laklhijunkanta: “Kapʼintʼikcha, alinʼojoycha tachun ni vayti.” 18 Ex tachun ixlaklhijunkanta taʼaqtaynil naunan ni jantu lay kataʼanaʼ. Pʼunaj va junil qayntaun: “Va kʼilkaʼ aqxtaun tʼun. Ikmaqskʼiniy kteʼen laqtsʼiniʼ. Kʼaʼuneʼe miʼukxtin va kimalaqmixinil.” 19 Ex yu aqayntaun naul: “Va aniykaʼ kʼil laqakis par vakaxna yu tatapatsay laka kuxtu. Va klaqlaqtsʼinputun incha lay katatapatsal u jantu. Kʼaʼuneʼe miʼukxtin va kimalaqmixinil.” 20 Ex aqayntaun naul: “Va aniykaʼ klakxtuklata, xlhiyucha jantu lay kʼanachal.” 21 Ex ni oqxtamati laqchaanchoqol ixʼukxtin va puteʼeniʼol yu tanaul. Ex ni ukxtin aqtaylcha lukujlay. Va junchoqol ni oqxtamati: “Kʼapʼinchʼiy lakatinixnan laka putaulan. Kʼalaklhitʼanchiy ni kilpatanin ali ni lakmaknin ali ni talaknin ali ni laʼachʼixin.” 22 Ex chuncha chinchoqol ni oqxtamati, junchoqol ixʼukxtin: “Ikmakalcha yu naʼun pero vananaj xajyachal taʼan katataulal laka mesa.” 23 Ex va naunchoqol ni ukxtin: “Kʼapʼinchʼoʼochiy lakatinixnan maqspaʼ ni putaulan kalaklhiʼun laqatapʼasta katamil vaynin. Kitʼin knajun kataʼaqtsamal vaynin la kinchaqaʼ.” 24 Klajunau ni lapanakni yu ixlaklhijunkanta yu jantu katamil vaynin, yuʼuncha jantu katakilkʼatsayaʼ ni lakvayti. 25 Ex chuncha ixtalhavaxtu ni lapanakni ixtatʼaʼan ni Jesús. Ex ni yucha talaqaspʼiklhi, va lakjunil: 26 —Mas va taʼayucha yu apalay toʼoyay ixpay, ixnati, ixanati, yu sasʼatʼan, yu ixtʼalaqaunin, yu ixtʼalapanakni xajantu kitʼin, ex ni yucha jantu lay jun kintʼaltanaʼ. Vachu yu apalay toʼoyay ixjatsukunti xajantu kitʼin, jantu lay jun kintʼaltanaʼ. 27 Yu jantu laqaʼiputun maqanlqajnati tacha kitʼin, yucha jantu lay jun kintʼaltanaʼ. 28 Xataʼayuʼ uxiknankʼan incha kamakʼapʼutʼu putanʼay chaqaʼ, pʼunaj katʼaʼul, kʼapʼastʼaktʼi tachuncha ixtapal kunaʼ para kakʼatsʼatʼi incha kalaqchaʼaniyan yu lhitʼaʼun. 29 Incha jantu kapastakʼel, ex tejkan kʼamakʼaʼoj ni xaputayan chaqaʼ, jantu kalaqchaanaʼ mintumin para kamajkʼanitʼi. Ex tejkan katalaqtsʼinaʼ ni lapanakni kataʼaqtayniyancha laktuʼunun. 30 Katanaunaʼ: “Aniy lapanaki ixʼaqtajitacha makan ixchaqaʼ pero jantu kamajkanil.” 31 Vachuʼ incha qayntaun la ay lhachimoʼonuʼ yu lhitʼajun laqakau mil tropas, talachʼapaputun ixtʼalhachimoʼonuʼ yu lhitʼajun pʼuxaun mil ex pʼunaj kapastakʼelal incha lay katalhajal. 32 Ex incha najun jantu lay kalhajal, ex malaqachay lapanaki para kalhisakmil tas katamakal para jantu katalachʼapal. Chuncha kamakayaʼ tejkan vananaj la maqati mintachal ixtʼalhachimoʼonuʼ. 33 Ex vachu va chuncha uxiknankʼan. Incha jantu makaʼun tachun yu lhitʼaʼun ex jantu lay un kintʼaltanaʼ. 34 ’Ni matsati la ox pero tejkan jantucha sʼoʼo jun ex jantucha lay sʼoʼo junchoqoy. 35 Chuncha mas va para ni lakatʼun, mas va para laka abono, jantu ox kaval. Valiʼiy majʼankan. Incha alin mimpaqasmakkʼan, ex kaʼasmaktʼikcha.
