SAN LUCAS 13

1Tejkan chuncha naul ni Jesús ancha tayanal lati lapanakni yu taputeʼenil yu tapasal Galilea. Va taputeʼenil tacha laqpumaqnil ni Pilato lati yu machaqan Galilea tejkan ixtatʼajun moqslanan ixlapaxkankʼan ni Dios y va lakmalhiyaul ixjakʼalnankʼan kun ixjakʼalnankʼan ni talhitsukukna yu ixlapaxkankʼan. 2Ex ni Jesús lakjunil: —Ni uxiknan pʼastʼakʼatʼik va tanil ni anchanu lapanakni va por apalay ixtalhitʼajun ixtalaqalhinkʼan xajantu yu alati yu machaqan Galilea. 3Pero kitʼin klajunau jantu laqsaval kaval. Va klajunau incha jantu kamapʼaxayapitik mijatapastakʼatkʼan ex katsʼanʼayapitik vachu va tacha ni anchanuʼ lapanakni yu machaqan Galilea. 4Vachu va taniʼol pumakautsajin lapanakni tejkan taqtal ni torre laka Siloé. ¿Ex va lhilayatʼik va apalay lhuu ixtalaqalhinkʼan xajantu yu alati lapanakni yu ixtavilanal Jerusalén? 5Jantu laqsaval kaval. Va klajunau incha jantu kʼamapʼaxayapitik mijatapastakʼatkʼan ex katsʼanʼayapitik vachu va tacha ni anchanu lapanakni. 6Ex va lakjunil ni Jesús yu aniy chivinti yu xtaʼa jatapastakʼati: —Qayntaun lapanaki va ixchʼanta taun kʼiu yu junkan higuera taʼan ixchʼanta ixʼuvas. Astan puxkaul xaʼunikan ni higuera pero jantu katemal. 7Ex junil yu xalhistaknaʼ lakatʼun: “Va laʼatʼutu jachʼitin iktiʼukxuyal puxkaunaʼ xaʼunikan, jantu aqtaun kaktemal. Kʼamaqtʼatʼicha. Vamun valiʼiy mapatsay ni lakatʼun.” 8Ex naul yu xalhistaknaʼ lakatʼun: “Kiʼukxtin kʼatʼi, kʼamakʼau ataun jachʼitin. Kitʼin kaklajʼajniyaʼ lakatʼun, kakmamaniyaʼ abono. 9Chuncha ka va lay kaʼalil xaʼunikan ataun jachʼitin. Pero incha jantu ex kakmaqtayacha.” 10Taun xajulchan jastaknati ni Jesús ixmalaninin laqa chaqaʼ taʼan ixtaqxtoʼa ni israelitas. 11Ancha ixtanun qayntaun xanati ixlaqtanun yu jantu ox espíritu. Xlhiyucha va ixtaqanʼay. Va laqakautsajin jachʼitin ixtamakataltanan. 12Tejkan ni Jesús laqtsʼil ni xanati, juntaʼil, va naul: —Xanati kʼatʼi, palaycha kʼaʼunchʼoʼo mintaqanʼati. 13Ex moqslanikal ixmakaʼ ni xanati, va nimancha vas tayal, aqtaylcha ay makay ni Dios. 14Ex ni xaʼukxtin ni anchanuʼ chaqaʼ taʼan ixtataqxtoʼa ni israelitas lhitalqamal va por kʼuchʼunul ni Jesús tejkan xajulchan jastaknati. Va lakjunil ni lapanakni: —Alin paqchaxan putapatsa laka semana. Yu ixkʼuchʼuka lapanaki va lhitapatsa. Kʼatʼantʼik laka semana para kʼakʼuchʼukʼantʼik, pero jantu kʼatʼantʼik yu xajulchan jastaknati. 15Ex va naul ni Jalhachimoʼonu Jesús: —Va tʼuy ukxpuʼ makʼayatʼik. Mas va xataʼayuʼ uxiknankʼan va xʼotʼatʼik mivakaxkʼan u mimburrokʼan, lhipʼinatʼik moʼotʼunun xkan mas va xajulchan jastaknati. 16Chavay yu aniy xanati yu ixpapanti Abraham, va laqakautsajin jachʼitin ixtaqanʼay, va ixlaqtanuy ni Satanás. Yucha vachu chun maqskʼiniy kaxʼoqnikal ixtaqanʼati para palay kaval mas va xajulchan jastaknati. 17Tejkan chuncha naul ni Jesús va tatamaxaniʼol tachun ixtʼalaxkaynin. Pero tachun yu alati lapanakni taʼaqtayl talhiʼachantajuy por tachun yu ay axtoqnuʼ yu lakmakal ni Jesús. 18Ex chuncha naul ni Jesús: —Chavay klamasuniyau tacha junita tejkan lhachimoʼonun ni Dios. 19Va tacha ni lakatʼuniy xatʼin yu junkan mostasa. Qayntaun lapanaki chʼal ni lakatʼuniy tʼin la ixtʼun. Ancha aynlhi tus ay kʼiu val. Ancha tamakal ixpaqtamankʼan ni tsʼoʼon la ixmaqlaqapʼu. 20Ex chuncha vachu naul ni Jesús: —Klamasunichoqoyau tacha junita tejkan lhachimoʼonun ni Dios. 21Va tacha levadura yu qayntaun xanati lhiyajuy kun laʼatʼutu kualtil harina, va tus kalhitayaʼol tachun ni skititi. 22Ex ixʼanchoqota lakatin ni Jesús ni Jerusalén, va ixtapasaʼanta taun taun putaulan yu lajʼay kun yu lakstʼuniy. Va ixmalaniniʼanta. 23Qayntaun lapanaki va lhisakmil: —Jalhachimoʼonuʼ, ¿vamun tsʼuniy yu kalaqmalaqtaxtukanaʼ? Ex ni Jesús va naul: 24—Kamakʼatʼik tachun la mintapʼastakʼan para kalal kʼatʼanutʼik taʼan putʼuniy matiʼ. Klajunau astan katatanuputunaʼ lhuvaj lapanakni ex jantucha kalayaʼ. 25Incha jantu chuncha makʼayatʼik, ex va kaʼostaulaʼ yu machaqaʼ, kamalakchauyaʼ ni matiʼ. Ex kʼatʼayayapitik maqspaʼ, kʼamakʼasayapitik ni matiʼ, kʼaʼunapitik: “Jalhachimoʼonuʼ, kilamalaqltiʼaniu.” Ex yucha katajunan: “Jantu klamispayau. Jantu kʼatsay toʼoxtaycha machaqan untʼatʼik.” 26Ex kʼaʼunapitik: “Klatʼavajiu uxintʼi y klatʼaʼoqnuu y la kinputaulankʼan kilamasuniu.” Chuncha kʼanaunapitik. 27Ex katajunchoqoyan: “Jantu klamispayau. Jantu kʼatsay toʼoxtay machaqan untʼatʼik. Kapʼintʼikcha. Kilamakajuucha uxiknankʼan yu laktʼuʼununatʼik”, chuncha katajunan. 28Ex ancha kaʼalhunapitik y kʼalaktsʼakʼalhitsʼukʼuyapitik mintatsalatikʼan. Kʼalaqtsʼinapitik ni Abraham ali Isaac ali Jacob ali tachun yu ixtalaqputeʼey ixchivinti Dios taʼan lhachimoʼonun Dios. Pero ni uxiknankʼan va kʼatʼanʼalhumaxtʼukʼanapitik. 29Pero lapanakni yu machaqan talakachux ni lakamunukpaʼ, taʼan putakʼutʼa ni julchan y vachu taʼan puʼanachal, yu machaqan ixlhitoʼanta, ixpaxtoʼanta, va kataminaʼ, katataulaʼ, katavaynʼoyaʼ taʼan lhachimoʼonun ni Dios. 30Ex chuncha yu jantu ay kʼatsan chavay, ex anchanu julchan va ay lapanaki kunaʼ. Yu la ay kʼatsan chavay, va jantu ay kunaʼ. 31Ex tejkan chuncha naul ni Jesús, va talaqchil lati ni fariseos, va tajunil: —Katʼaxtʼucha aniy. Kapiticha. Ni jalhachimoʼonuʼ Herodes va maqniputunan. 32Ex ni Jesús va lakjunil: —Kalaqpʼinchipitik ni anchanuʼ jamakanunu xanixʼoy. Kʼaʼunapitik va chavaycha kun lhiy kaklakmaxtuyaʼ aqmoqxnun y kajkʼuchʼununaʼ. Ex yu paqtʼutunuʼ kakmajkaniʼoyaʼ kilhitapatsa. 33Pero chavaycha kun lhiy kun tʼuxaun maqskʼiniy kaktaylhaʼal kilakatin. Qayntaun yu laqputeʼey ixchivinti Dios maqskʼiniy kanil laka putaulan Jerusalén. 34Jerusalén, xalapanakni Jerusalén. Jamaqniyatʼik yu talaqputeʼey ixchivinti Dios y laktʼalmaqniyatʼik yu tamalaqachaniyan Dios. Tacha ni piyuʼ jamaqxtoʼa sasʼatʼan la ixpaqachuj, va chuncha ni kitʼin aqlhuvaj xaklalhistakputunau pero jantu aqtaun kʼaʼuyujnauntʼik. 35Kʼalaqtsʼintʼikcha, minchaqakʼan kamakaunkanacha. Chavay klajunau, jantucha aqtaun kilalaqtsʼinchoqoyau tus tejkan inchine kʼanaunapitik: “Ay kamakakal yu mintacha la ixtaqaʼuti ni Jalhachimoʼonu Dios.”

will be added

X\