SAN LUCAS 12

1Ex tataqxtoqnil ixtalhavaxtu lapanakni por miles tus ixtalapatsʼiuksta. Ni Jesús va jalakjunʼelal ixtʼaltanan, va naul: —Kʼalhistʼajkʼantʼik para jantu kalhakʼapʼupʼintʼik ixchivintikʼan ni fariseos yu tʼuy ukxpuʼ tamakay, va tacha levadura. 2Tachun yu chavay aqxtaqmanti kamispakanaʼ y tachun yu makakan laqatamaqsaq, kamispakanaʼ. 3Yu naunatʼik laka putsʼista para jantu kaqasmajkal, va kaqasmajkanaʼ laka tunkunaʼ. Tachun yu chʼivinanatʼik laksniy la minchaqakʼan para jantu kamispakal, va kamispakanaʼ tacha katʼasakal talman. 4’Kintʼalaqaunin, jantu kʼatʼalhaunitʼik ni lapanakni yu lay katamaqniyan. Yuʼuncha astan tejkan kaniyapitik jantucha lay tuʼuchun katamakaniyan. 5Pero klajunau taʼayucha kʼatʼalhaunitʼik. Kʼatʼalhaunitʼik ni Dios yu lay tamaqniyan y vachuʼ astan lay tamalaqachayan laqnin. Yucha kʼatʼalhaunitʼik. 6’Laqakis tsʼoʼon lhistʼakan aqxtʼuy pero mas va tsʼuniy ixtapalkʼan, Dios jantu lajkʼapʼa ni yuʼuncha. 7Mas miʼajikʼan yu alin la miʼaqtsulkʼan tus taputeʼeniʼotan ni maqatamin por maqatamin. Xlhiyucha jantu maqskʼiniy katʼalhanantʼik. Uxiknankʼan apalay xtapal untʼatʼik xajantu lhuvajcha tsʼoʼon. 8’Incha qayntaun najun la ixtalakaʼukxpukʼan ni lapanakni ni va kilapanaki junita, ex kitʼin yu kval Sasʼatʼa Lapanaki vachuʼ kaknaunaʼ la ixtalakaʼukxpukʼan ixmayulnin Dios, ni va kilapanaki junita. 9Pero incha najun la ixtalakaʼukxpukʼan ni lapanakni ni jantu kilapanaki junita, ex kitʼin vachuʼ kaknaunaʼ la ixtalakaʼukxpukʼan ixmayulnin Dios, ni jantu kilapanaki kaval. 10Yu kinkiltaukʼaniy ni kitʼin yu Sasʼatʼa Lapanaki, yucha ni Dios kamalaqmixiniyaʼ. Pero yu jantu ox lhichiviniy ni Espíritu Santo yucha jantu kamalaqmixinikanaʼ. 11’Tejkan kalhipʼinkʼanapitik laqa chaqaʼ taʼan tataqxtoʼa y la ixtalakaʼukxpukʼan ni lhachimoʼonun, jantu kapastakʼun tas kʼalhaʼaltʼayananapitik u tisuncha kʼanaunapitik. 12Ni Espíritu Santo katamalakpastakʼaniyan tas kanaunapitʼik. 13Ex chuncha qayntaun yu ancha ixyal va naul, va junkal ni Jesús: —Jamalaniniʼ, kʼaʼun keeyaʼ kixtaqnil pakltaun ixlhitapatsa kimPaykʼan yu kimpaxtoqniycha ni kitʼin. 14Ex va najun ni Jesús: —Lapanaki, kitʼin jantu kimpaxtoqniy kaklaʼoxil. 15Ex chuncha ni Jesús va lakjunil ni lapanakni: —Kʼalhistajkʼantʼikcha, jantucha aqtaun kaʼakchʼipʼintʼik. Jantu vamun mimaqalitkʼan kʼapʼutsʼukʼuyapitik. 16Ex va chuncha jalaqputeʼenil taun chivinti yu xtaʼa jatapastakʼati. Va lakjunil: —Qayntaun maqaliʼ va la ox ixlhitʼajun ixtʼun, va lhuvaj lhiʼuti xqal. 17Ex va pastaklhi: “¿Tas kakmakayacha ni kijaxqanti? Kimpakʼatsa aqtsamalcha, jantucha lhijun.” 18Ex va pastakchoqol ni maqaliʼ: “Kakmaqtayacha ni kimpakʼatsa. Ataun kakmakachoqoyaʼ sastʼi yu apalay ay kaval ex ancha kakmaʼaʼoyaʼ tachun kilaqxoqta, ex chuncha la ox kunaʼ para kalaqchaanacha lhuvaj jachʼitin. 19Ex kakstaknanacha, vamuncha kakvaynaʼ, kajqoqnunaʼ, jantucha kaktapatsayaʼ, oxamaktauncha kajkʼalinaʼ”, va naul ni anchanu lapanaki. 20Pero yu Dios va junil ni maqaliʼ: “¡Tontoj! Jantu pʼastʼakʼa yu makʼay chavaycha. Apanchʼix putsʼista kalaqmixacha metsukunti. ¿Ex yu milaqxoqta tas kʼapʼulhitsʼukʼuyeʼecha?” 21Ex tejkan ni Jesús lakjunil ni anchanu chivinti yu xtaʼa jatapastakʼati, va naul: —Va chuncha kaniyaʼ yu vamun pastakʼa para kalalhaval ixmaqaliti, pero jantu pastakʼa tacha kapulaqaʼil ixlhilhajati kun Dios. 22Ex va lakjunil Jesús ixtʼaltanan: —Xlhiyucha kitʼin klajunau jantu katapastakʼun la metsukuntikʼan suncha kʼaʼuyapitik, vachu jantu katapastakʼun la milakatunajkʼan suncha kʼaʼulayapitik. 23Apalay ixtapal ni metsukuntikʼan xajantu ni vayti y apalay ixtapal ni milakatunajkʼan xajantu ni laqchʼiti. 24Kalaqtsʼintʼik ni laʼa. Mas yuʼuncha jantu tachʼan, mas jantu taxqanan, mas jantu tʼujuʼ ixmoqltakʼan, mas jantu tʼujuʼ ixpakʼatsakʼan, va lakvavay ni Dios. Yu uxiknankʼan apalay ixtapal metsukuntikʼan xajantu yu tsʼoʼon. 25¿Taʼayucha siya uxiknankʼan lay apalay putanʼay kʼaʼunaʼ vamun por pastakʼuy? 26Ex incha jantu chuncha lay makʼayatʼik mas va tsʼuniy, ¿ex valiʼiycha tapastakʼuyan kʼamakʼatʼik yu apalay lhitaʼay? 27Kalaqtsʼintʼik tacha taʼajin ni xanti. Jantu tatapatsay, jantu tamakay isijuntikʼan. Pero kitʼin klajunau ixlaqchʼiti yu ay lhachimoʼonuʼ Salomón mas ayaj ox ixlakatayay, jantu kalaqchaʼal tacha ixʼoxixtu laqataun xanti. 28Ni javan yu chavay alinta lakakʼavin, lhiy kalaqxauyacha laka horno pero ni Dios ayaj kʼus jamalaqchʼiniy. Ex apalay ox katamalaqchʼiniyan ni uxiknan mas va lakatsʼuniy milhakapuʼatkʼan. 29Jantu kʼapʼuxkʼautʼik vamun yu kʼaʼuyapitik kun yu kʼaʼotʼapitik. Jantu tuʼuchun katapastakʼun. 30Yu valiʼiy lapanakni aniy lakamunukpaʼ, yuʼuncha ayaj tapastakʼuy yu aniy axtoqnuʼ. Pero mimPaykʼan Dios, yucha kʼatsay ni maqskʼiniyatʼik tachun ni anchanu axtoqnuʼ. 31Va kʼalhipʼuxkʼauyapitik ni kalhachimoʼonul Dios, ex kaʼalinaʼ tachun yu maqskʼiniyatʼik. 32’Jantu katʼalhanantʼik. Ni uxiknankʼan yu ixnavin Dios va tacha kiborregos untʼatʼik. Mas jantu qaynlhuu kʼaʼuntʼik, ni Dios va maqamay kataxtaqnin palhachimoʼon. 33Kastʼatʼik yu lhitʼaunatʼik y kʼaxtʼaqnitʼik ni tumin yu tamaqskʼiniy. Chuncha va tacha kamaʼatʼik milhilhajatikʼan laka bolsas yu jantu aqtaun tapuchʼiy. Chuncha kalalhavatʼik laktʼiyan mimaqalitikʼan yu jantu aqtaun kamiʼoyaʼ. Ancha laktʼiyan jantu tanuyachal alhavanan, vachuʼ jantu laqlvajiy ni matapil. 34Taʼan maʼalinatʼik mimaqalitkʼan, va ancha pʼastʼakʼatʼik la mejalhanutikʼan. 35’Kakʼujtʼikcha. Va kamaqtaylcha mimaklkukʼan. Va listujcha kʼaʼuntʼik kun mimaklkukʼan maqtajitacha. 36Kʼaʼuntʼik tacha oqxtamatin yu tapakxan kachinchoqol ixʼukxtinkʼan yu al taʼan lakxtuklakan. Va chuncha kʼapʼakxantʼik ni Dios miJalhachimoʼonukʼan. Tejkan kachinaʼ ni ukxtin va kamakasayaʼ ni matiʼ y va niman katamalaqltiʼal. 37Ox kaxajtachal para ni anchanu oqxtamatin yu kalaktemakanaʼ takujtacha tejkan kachinaʼ ixʼukxtinkʼan. Laqsaval klajunau, yu ukxtin kamakakanaʼ ixʼaman tacha oqxtamati kaval. Yucha kalakmulayaʼ ixʼoqxtamatin laka mesa y ancha kalakmulaniyaʼ ixvaytikʼan. 38Mas kachil pakltaun tsʼis, mas kachil katunkumil, incha kalaktemakanaʼ takujtacha ni oqxtamatin, ex ox kaxajtachal ixjatsukuntikʼan. 39Laqsaval klajunau, va kakʼatsal ni machaqaʼ tavanan kachil ni alhavanaʼ ex va kakujtaulal, ex jantu kaxtaqlhi lakatin kaʼalhavanankal ixchaqaʼ. 40Uxiknankʼan vachu kʼakʼujtʼikcha. Jantu kʼatsʼayatʼik tavanancha kakminchoqoyaʼ kitʼin yu kval Sasʼatʼa Lapanaki. 41Ex ni Pedro va lhisakmil: —Jalhachimoʼonuʼ, ¿vamun ni kijnan kilajuniu ni aniy chivinti yu xtaʼa jatapastakʼati u va lakʼunʼoj tachun ni aniy lapanakni? 42Ex va junil ni Jesús: —¿Taʼayucha ni xalhistaknaʼ oqxtamati yu lhiʼaynkan y mispay lhitapatsa? Va yucha ni ixʼukxtin kamakaunaʼ para kalaklhistaklhi oqxtamatin y para kalakvaval tejkan tachavaniy. 43Ayaj lhiʼachantajuycha yu oqxtamati yu tʼajuncha makaʼonaʼ yu ixlhijunkanta tejkan chinchoqoy ixʼukxtin. 44Laqsaval klajunau ni ixʼukxtin kamakauniyaʼ kalaklhistaklhi tachun ixmaqaliti. 45Pero incha ni xalhistaknaʼ oqxtamatin pastakʼa ixʼaman kataqmaqayaʼ ixʼukxtin y aqtaylcha jalakasamay ixtʼaʼoqxtamatin ali yu maqtsukunin y vamun vajin, oqnun, taʼapʼay, 46ex chuncha va kaminchoqoyaʼ ixʼukxtin taun julchan tejkan jantu pakxanʼiy y taun hora tejkan jantu kʼatsay. Kamaxtunikanaʼ ixlhitapatsa y kamakakanaʼ tacha yu lapanakni yu jantu talhakapuʼan. 47Qayntaun oqxtamati yu mispay tacha najun ixʼukxtin pero jantu listuj kaval y jantu makay yu lhijunkan yucha ox kalaqanaqmakanaʼ. 48Pero qayntaun oqxtamati yu jantu mispay tacha najun ixʼukxtin y jantu listuj kaval yucha tsʼuniy lamaqanaqni kalaqaʼiyaʼ. Yu apalay lhuu ixtaqnikan, yucha apalay lhuu kaskʼinichoqokanaʼ. Yu apalay ox lhiʼaynkan para lhuu kalhistaklhi, yucha apalay lhuu kaskʼinichoqokanaʼ. 49’Va chuncha kmil va tacha kakmamaqtiyal jikmi ni lakamunukpaʼ. Va knajun kamaqtaylcha. 50Kitʼin ayaj kakmaqanlqajnanaʼ y ayaj kmaqaninin tus katamaktal ni maqanlqajnati. 51¿Lhakʼapʼupʼinatʼik ni kminta para chʼantaun kaval ni lapanakni ni aniy lakamunukpaʼ? Jantu laqsaval kaval. Va kminta para kaʼalil laʼatʼuy ixjatapastakʼatkʼan ni lapanakni. 52Chavaycha aqataun chaqaʼ taʼan tavilanal pumakis lapanakni ancha kaʼalinaʼ laʼatʼuy jatapastakʼati. Qayntʼuy yuʼuncha ataun jatapastakʼati katalhitsukuyaʼ y yu qayntʼutu ataun jatapastakʼati katalhitsukuyaʼ. 53Yu japay kaxkayyaʼ istsʼal, yu jatsʼal kaxkayyaʼ ixpay. Yu janati kaxkayyaʼ istsiʼi, ni jatsiʼi kaxkayyaʼ ixnati. Ni xaʼatinaʼ kaxkayyaʼ ixpʼuti, ni ixpʼuti kaxkayyaʼ ixʼatinaʼ. 54Ex ni Jesús lakjunil ni lapanakni: —Tejkan laqtsʼinatʼik ni ostaulay taputsʼi ixlhitoʼanta, naunatʼik katamayaʼ xkan y chuncha jun. 55Tejkan laqpaqnan, laktʼasakan paxtoʼanta, naunatʼik kataylhaanaʼ skunuʼ y chuncha jun. 56Tʼuy ukxpuʼ makʼayatʼik. Uxiknankʼan kʼatsʼayatʼik tas katapasayaʼ lakamunukpaʼ kun laktʼiyan. ¿Valiʼiycha jantu malaʼasiyatʼik yu tapasay chavaycha aniy taʼan tʼaunatʼik? 57’¿Valiʼiycha jantu laksakʼatʼik meʼemankʼan yu lajʼoxi para metsukuntikʼan? 58Chavay incha matichun chivintanuputun laka machʼalkʼati por makʼanin laqtaqal, ex tejkan tʼapʼin lakatin kʼalaʼoxitʼi, para jantu kamaqxtaqnin kun machʼalkʼati. Incha jantu, ex yu machʼalkʼati kamaqxtaqniyan ixpolisia ex yu polisia kamanuyan laka pachʼin. 59Kitʼin ijkunan ni jantu katʼaxtʼuyeʼe incha jantu kʼamapʼalʼoyeʼe tachun mijalhaaninti.

will be added

X\