SAN LUCAS 10

1Taval ni Jesús jalaksaklhi setenta alati lapanakni y jamalaqachal pumatʼiyun katapʼulʼal talakachux putaulanin va toʼoxtaycha kaval taʼan yucha astan kaʼanaʼ. 2Pʼunaj lakjunil: —Va tacha taun ay jaxqanti tajunita ni lapanakni yu talakapuʼuxaʼan ni Dios, pero tsʼanqay oqxtamatin yu kataxqanal. Xlhiyucha kʼatʼapʼayninitʼik ni Dios para kajamalaqachal oqxtamatin la ixlhijaxqanati. 3Ex kapʼintʼik. Klamalaqachayau taʼan kʼaʼunapitik tacha sasʼatʼan borregos taʼan alin maqtalin. 4Jantucha kalhipʼintʼik ixpupachʼikan mintuminkʼan, nisin mintiyutkʼan, nisin mivarachikʼan. Jantucha matichun katamataqmaqanin kʼamastʼakʼatʼik lakatin. 5Tejkan kachʼipʼinapitik laqa chaqaʼ, kʼamastʼakʼananapitik, kʼanaunapitik: “Oxamaktauncha katsʼukʼutʼik yu vilanantʼik laqa chaqaʼ.” 6Va chuncha incha alin lapanaki yu oxamaktaun tsukuputun ex oxamaktaun kunaʼ. Incha jantu, ex jantu paxtoqniy. 7Va ancha katʼaulapitik laqa chaqaʼ. Kaʼuyapitik y kaʼotʼapitik yu kataxtaqniyan. Paxtoqniy kaxtaqnikal ixlhilhajati yu tapatsan. 8Tejkan kachʼipʼinapitik taun putaulan taʼan katalaqaʼiyan, kʼaʼuyapitik yu kataxtaqniyan. 9Palay kalakmakʼachʼoʼotʼik yu taqanʼanin yu ancha taʼalinta. Kʼalakʼunapitik: “Va laycha kachil tejkan Dios katalhichimoʼoyan.” 10Pero incha kachʼipʼinapitik taun putaulan taʼan jantu katalaqaʼiyan ex kapʼinapitik lakatin, kʼanaunapitik: 11“Ni pʼoqxni yu tsʼantsʼaunau kakchʼankʼalhakanau la kinchʼajakʼan para kakʼatsʼatʼik ni jantu ox yu ixkilamakaniyau. Pero kakʼatsʼatʼik ni va ukstsʼuniycha chil ixlhachimoʼon Dios.” Chuncha kʼanaunapitik. 12Va klajunau kaminaʼ julchan tejkan apalay pʼas kunaʼ ixmaqanlqajnatkʼan ni lapanakni yu machaqan ni anchanu putaulan taʼan jantu katalaqaʼin xajantu yu machaqan laka putaulan Sodoma. 13’Payniʼincha ni uxiknan yu machaqan laka putaulan Corazín. Payniʼincha uxiknan yu machaqan laka putaulan Betsaida yu jantu mapʼaxapʼutʼunatʼik mijatapastakʼatkʼan. La mimputaulankʼan klamakaniu yu lajʼay axtoqnuʼ. Ni lapanakni yu machaqan laka putaulanin Tiro kun Sidón yu maqancha ixtatʼajun, jantu katalaqtsʼil yu chavay klamasuniu. Va ixtalaqtsʼil ex va niman ixtamapaxal ixjatapastakʼatkʼan. Va ixtaʼulal puchʼiniʼ laqchʼiti y va ixtataulal laka lkʼakʼan para katasul ni talhimaqaninin. 14Xlhiyucha tejkan kamukʼanikanaʼ ixtalaqalhinkʼan ni lapanakni yu machaqan xaputaulan Tiro ali yu machaqan xaputaulan Sidón, ex va apalay pʼas kunaʼ mimaqanlqajnatkʼan. 15Uxiknan, xalapanakni Kapernaum, ¿lhakʼapʼupʼinatʼikcha ni kapʼinapitik laktʼiyan? Yu uxiknan kʼatʼanʼalhukʼanapitik laqnin. 16Ex lakjunil ixtʼaltanan: —Yu taqalasmatʼan uxiknankʼan kintaqalasmatʼa ni kitʼin. Yu jantu talaqaʼiyan, jantu kintalaqaʼiy ni kitʼin. Yu jantu kintalaqaʼiy ni kitʼin jantu talaqaʼiy yu kimalaqachata. 17Tejkan taminchoqol ni setenta yu ixjamalaqachata ni Jesús, va ayaj talajʼachal. Tajunil ni Jesús: —Jalhachimoʼonuʼ, mas ni aqmoqxnun kintaqalasmatʼan tejkan ikmapaqaʼuyau mintaqaʼuti. 18Ex ni Jesús lakjunil: —Klaqtsʼil ni Satanás va tsʼalaj patajul laktʼiyan tacha taun makaliukniti. 19Kitʼin klaxtaqnitau tapʼasta para lay kaltʼanantʼik taʼan alin tsapulin kun statsuku y para lay kalhaʼatʼik ni aqmoqxnuʼ kun tachun ixtapʼasta y jantu tuʼuchun kʼalhitʼapʼasatʼik. 20Mas taqalasmatʼan ni jantu ox espíritus jantu va yucha kʼalhiʼachʼantʼaʼutʼik. Kalhiʼachʼantʼaʼutʼik ni tsʼoqmulakantachalcha mintaqaʼutikʼan laktʼiyan. 21Ex ni Jesús va niman lhiʼachantajul ni Espíritu Santo, va naul: —KimPay kʼatʼi, xaJalhachimoʼonuʼ kʼatʼi laktʼiyan kun lakamunukpaʼ, kitʼin ktoʼoyayan. Va lakmalanitʼa minchivinti ni lakstʼuniy lapanakni y jamaqsaqnitʼa yu talakpastaknan, yu lhuu ixtalanitkʼan. Ay mijamapayninti xlhiyucha chuncha lhinaʼun kaval. 22Ex lakjunil ni lapanakni: —Ni kimPay va tachun kimaqxtaqnita. Jantu matichun kimispay taʼayucha ni kitʼin yu Sasʼatʼa, vamun kimPay kimispay. Vachu va chun jantu matichun mispay taʼayucha ni kimPay, vamun ni kitʼin vachu ni lapanakni yu klakmamispaniputun. 23Ex talaqaspʼiklaqtsʼil ixtʼaltanan, va lakjunil ixʼamankʼan: —Kʼalhiʼachʼantʼaʼutʼik ni laqtsʼinatʼik yu chavay tʼajun tapasanaʼ. 24Laqsaval klajunau la maqancha qaynlhuvaj ixlapanakni ni Dios yu ixtalaqputeʼey ixchivinti kun yu lhachimoʼonun va ixtalaqtsʼinputun yu chavay laqtsʼinatʼik, pero jantu kalal katalaqtsʼil. Va ixtaqasmakputun yu chavay asmatʼatʼik pero jantu kalal kataqasmaklhi. 25Ex chuncha va tayal qayntaun yu ixmasuy ixlhachimoʼonkʼan ni israelitas, va ixlaqtsʼintanuputun ni Jesús. Junkal ni Jesús: —Jamalaniniʼ, ¿tisuncha kakmakalcha para kaklhitsukul jatsukunti yu jantu aqtaun kamiʼoyaʼ? 26Ex naul ni Jesús: —¿Tisuncha jatsʼoqnucha la kilhachimoʼonkʼan? ¿Tisuncha pʼuʼteʼecha ancha? 27Ex yu ixmasuy ixlhachimoʼonkʼan va naul: —Ni kilhachimoʼonkʼan najun: “Kaʼachʼanin ni Dios miJalhachimoʼonuʼ kun tachun melhanuti ali tachun metsukunti ali tachun mintapʼasta ali tachun mijatapastakʼati.” Vachu najun: “Kapʼaxkʼatʼi mintʼamachaqaʼ tacha pʼaxkʼakʼan meʼeman.” 28Ex va naul ni Jesús: —La ox yu altʼiyanan. Va chuncha kʼamakʼatʼi ex jantu aqtaun kamiʼol ni metsukunti. 29Pero ni anchanu lapanaki ixmakaputun para jantu lay kamukʼanikal ixlaqtaqal. Va lhisakmil ni Jesús: —¿Ex tas ayucha kintʼamachaqaʼ? 30Ex naul ni Jesús: —Qayntaun lapanaki ixtaxtuta Jerusalén, va ixʼuxaʼan tus Jericó pero tachʼapayaul alhavanan. Maqaʼasas tamakal y talaqanaqmal. Ex taʼalcha, tamakaumalcha, va laycha ixnil. 31Ex chuncha qayntaun xakura Jerusalén tapasal ancha lakatin, va laqtsʼil ni kilpataniʼ pero yucha va maqachoqol ni lakatin. 32Vachu va chun qayntaun Levita yu ixtapatsay xalakatajtan Jerusalén tapasal ni ancha lakatin, va laqtsʼil y vachu vamun maqachoqol ni lakatin. 33Ex qayntaun yu machaqaʼ Samaria taʼan talaxkajiy yu machaqan Jerusalén ixʼukxuntayay ancha lakatin va chaʼal taʼan ixmal. Tejkan laqtsʼil va ayaj mapaynil. 34Ex chuncha niman taʼukstsʼuninil, lhikʼuchʼul aceite kun vino taʼan talaqalhil, va lhichʼinil laqchʼiti. Ex mukʼalcha la ixjuki, va lhaʼalcha taʼan loqojkan, ex va lhistaklhi. 35Ex ataun julchan val, yu machaqaʼ Samaria va xtaqnil aqxtʼuy tumin ni manavin yu taʼan loqojkan. Va junil: “Kʼalhistʼaktʼi ni aniy lapanaki y tachun yu kamaʼakxayeʼe mintumin, kitʼin kakxtaqnichoqoyan tejkan kakminchoqoyaʼ.” 36Ex naul ni Jesús, va junkal ni yu masuy ixlhachimoʼonkʼan: —¿Tas naʼuncha? ¿Taʼayucha ixpumatʼutukʼan yu ixtʼamachaqaʼ ni kilpatani ni yu tachʼapayaul alhavanan? 37Ex yu masuy ixlhachimoʼonkʼan va naul: —Va yu mapaynil, yucha ixtʼamachaqaʼ. Ex junil ni Jesús: —Kʼapʼinchʼiycha, vachu va chuncha kamakʼatʼi. 38Ex chuncha ni Jesús anchoqol lakatin va chaʼal taun putaulan. Qayntaun xanati yu junkan Marta va yucha lhijunil ni Jesús kamil la ixchaqaʼ. 39Marta ixlhitʼajun qayntaun ixtʼalapanaki va ixjunkan María. Yucha taulnil taʼan taulal ni Jesús va ixqasmakputun yu ixnajun. 40Yu Marta vamun pastakʼuy tas kapulaqlaʼoxil ixvayti. Ex laqʼal ni Jesús va naul: —Jalhachimoʼonuʼ, ka jantu kʼilhipʼastʼakʼa. Ni yu kintʼalapanaki va kimakaunil ni lhitapatsa. Kʼaʼun kiʼaqtayjul. 41Pero ni Jesús qaltayanal: —Marta, Marta. La alin milhitapatsa yu makʼapʼutʼun, va pastakʼuyan milhilati. 42Pero vamun taun tuʼuchun yu maqskʼiniy kʼamakʼatʼi. Va yu la ox yu laksakta ni María. Jantu matichun kamaxtuniyaʼ.

will be added

X\