SAN LUCAS 1

1Pumalhuu lapanakni tatsʼoqʼulata tacha tapasal aniy taʼan tʼaunau kijnankʼan. Ixtatsʼoqʼulaputun yu tapasal 2vachu va tacha kintajunin ni lapanakni yu talaqtsʼinʼol. Yuʼuncha talhimasul ni ox chivinti yu lhichiviniy ni Jesús. 3Xlhiyucha, Teófilo, ay lapanaki kʼatʼi, vachuʼ kilhipaʼinil kaktsʼoqnin kitʼin tachun yu tacha tapasal. Va klaniʼojota tachun mas va yu xapʼunaj. 4Va chuncha kakʼatsʼatʼi ni chivinti yu masunikʼantʼa laqsaval val. 5Tejkan Herodes ixlhichimoʼoy xalakatʼun Judea, ex ixʼalin qayntaun xakura israelitas yu ixjunkan Zacarías. Yucha va lhiyal ni kuras yu ixlapanakni Abías ixtajunita. Ixlhitʼajun ixanati yu ixjunkan Elisabet. Yucha va ixpapanti ixjunita yu pʼunaj xaʼay kuraj yu ixjunkan Aarón. 6Ixlaʼatʼuykʼan va la ox ixtatiʼukxuyanal kun Dios, ixtamakay tachun yu ixnajun la ixlhachimoʼonkʼan ali ixlhachimoʼon ni Dios, jantu katamakal tuʼuchun laqtaqal. 7Pero jantu tʼujuʼ ixjunita sasʼatʼakʼan, va jantu lay ixlhitsukuy jasʼatʼa ni Elisabet. Vachuʼ ayaj lhuvajcha ixjachʼitinkʼan ixtalhitʼajun yuʼuncha. 8Taval taun julchan ixtʼajun tapatsan ni Zacarías va tacha kura. Va tapaxtoqnil ixlapanakni katatapatsanil ni Dios. 9Ex va tamakal taun suerte yu ixtamakay xakuras israelitas, va paxtoqnil ni Zacarías. Ex va yucha tanuchal yu la ay lakatajtan, va aqtaylcha jamapuvanaʼ taʼan ixvil ni Dios. 10Yu tachun ixtalhavaxtu lapanakni yuʼuncha va maqspaʼ ixtatamoʼoy ixkiltalakxtuti ni ay lakatajtan taʼan ixmapuvanan ni Zacarías. 11Ex va tasunil ixmayul ni Jalhachimoʼonu Dios, va la ixlhijakanaj ni altar. 12Ex ni Zacarías tejkan chuncha laqtsʼil taʼan ixtʼajun mapuvan, va ayaj talhanal. 13Pero ni ixmayul Dios va najun: —Jantu katʼalhan, Zacarías. Ni Dios yu skʼinin, yucha qalasmatʼan. Chavay mixanati Elisabet kalhitsukuyacha qayntaun jasʼatʼa, kʼaʼuneʼe ixtaqaʼuti va Juan. 14Va ayaj lhuvaj achati kalhitsʼukʼuyeʼe y vachuʼ ni lapanakni ayaj kataʼachaxʼiyaʼ. 15Ni anchanu jasʼatʼa, yucha la ay kunaʼ kun Dios. Jantu kaʼotʼaʼ xaxkan uva nisin lhiʼotʼati. Tejkan jantukaʼ tsukuy, yucha kalaqtanuyaʼ ni Espíritu Santo. 16Kaxaqalayaʼ ni lapanakni yu aniy machaqan Israel ex pumalhuu katalhakapuʼanchoqoyaʼ ni Dios ixJalhachimoʼonukʼan. 17Yucha kapʼulayaʼ ex astan kaminaʼ ni Jalhachimoʼonuʼ. Vachuʼ kunaʼ tacha ixjunita Elías yu ixlhichiviniy Dios, va chuncha kunaʼ ixjatsukunti kun ixtapʼasta. Kamakayaʼ ni chʼantaun kataval ixjalhanutkʼan ni xapaynin ali sasʼatʼankʼan para katalapaxkal. Kalaqxtaqniyaʼ jatapastakʼati yu chavay jantu taqalasmaknan para vas katatiʼukxuntayal. Ex chuncha kalaʼoxiyacha ni lapanakni para katalaqaʼil ni Jalhachimoʼonuʼ. 18Ex va naul ni Zacarías, va junkal ixmayul Dios: —¿Tas kakpukʼatsayaʼ licha laqsaval yu kiʼuniy? Yu kitʼin va ayaj xapaycha, vachu kixanati la lhuvajcha ixjachʼitin. 19Ex qaltayl ni mayul: —Kitʼin va Gabriel yu kmakay ixlhitapatsa ni Dios. Va kmalaqachakal para kaktʼachivinin ni uxintʼi, va para kunin ni aniy ox chivinti. 20Chavaycha jantu kalhakʼapʼupʼi kinchivinti, mas laqsaval chuncha katapasayaʼ tejkan kalaqchaanaʼ ni julchan. Xlhiyucha janunucha kʼaʼuneʼe. Jantucha lay kʼachʼivinineʼe tus kaʼalinaʼ yu tacha xajkunan, ex kʼachʼivininchʼoʼoyeʼe. 21Tachun ni lapanakni va maqspaʼ ixtapakxanta ni Zacarías, va la ixtapastakʼutacha, va maqtoqoxatanul lakatajtan ni Zacarías. 22Ex tejkan taxtuchoqol va jantucha lay chiviniy. Ni lapanakni tapastaklhi ni va laqtsʼil taun tuʼuchun ni lakatajtan. Ex vamuncha ixlakmajkuniy, va chuncha janunucha tiʼukxuntayal. 23Ex mamaktalcha ixlhitapatsa lakatajtan ni Zacarías, va anchoqolcha la ixchaqaʼ. 24Ex astan va jaʼaynaʼ val ixanati Elisabet. Jantu katataʼaxtul tus laqchaʼal laqakis malkuyuʼ, va naul: 25“Chuncha kimakanil ni Jalhachimoʼonu Dios para jantucha apalay kintalaktuʼul ni lapanakni.” 26Tejkan laqchaʼal laqachaxan malkuyuʼ, ni Dios va malaqachal ixmayul yu junkan Gabriel laka estado Galilea, lakataun putaulan yu junkan Nazaret. 27Va laqkilachil qayntaun jatsiʼi yu ixjunkan María. Ni yucha iskʼininti ixjunita qayntaun tsʼal yu ixjunkan José. Yu José minchal kun ixlapanakni David yu maqancha ay jalhachimoʼonuʼ ixjunita. 28Tejkan laqchinchal ni mayul Gabriel, va mastakʼal ni María, va junil: —Dios mapayniyan, va alinta kun uxintʼi. Apalay ox kaxajtachal mijatsukunti xajantu matichun xanati. 29Ex ni María va pastakʼul, aqtayl pastakʼa tisuncha naunputuncha ni anchanu chivinti yu pumastakʼakal. 30Ex va najun ni mayul: —Jantu katʼalhan, María. Dios kaxtaqniyan taun ay japaxkanti. 31Uxintʼi aynacha kʼaʼuneʼe, kʼalhitsʼukʼuyeʼe qayntaun tsʼal, kʼaʼuneʼe ixtaqaʼuti va Jesús. 32Yucha vamun yuʼ pʼas kunaʼ, kunkanaʼ Sasʼatʼa Dios. Ni Dios kaxtaqniyaʼ ixpalhachimoʼon tacha ixlhachimoʼon ixpapaʼ David yu ay jalhachimoʼonuʼ ixjunita maqancha. 33Mas va tavanancha yucha miJalhachimoʼonukʼan kunaʼ mintachunkʼan yu israelitas untʼatʼik. Ixlhachimoʼon jantu aqtaun kamiʼoyaʼ. 34Ex ni María va najun: —¿Tas va kunacha? Yu kitʼin va keʼemankaʼ, jantukaʼ klhitsukuy kixapay. 35Ex qaltayl ni mayul, va junil: —Ni Espíritu Santo kachinaʼ la milakatunaj, ixtapʼasta ni Dios chuncha kamakayaʼ. Xlhiyucha ni tsʼal yu katsukuyaʼ, yucha ox kunaʼ kun Dios, va kunkanacha Sasʼatʼa Dios. 36Vachuʼ mintʼalapanaki Elisabet kalhitsukuyaʼ qayntaun jasʼatʼa mas ayaj xanaticha. Ixtanajun jantu aqtaun lay kalhitsukul jasʼatʼa pero chavay laqachaxancha malkuyuʼ tiʼukxuyal aynaʼ. 37Yu Dios xoqta lay makay, jantu kaʼalil yu jantu lay makay. 38Ex ni María va naul: —Chavaycha kitʼin kunita ixʼoqxtamati ni Jalhachimoʼonu Dios. Kimakalcha va yu kimakaputuncha, yu tacha uxintʼicha naʼun. Ex va anchoqolcha ni mayul. 39Ex taxtul ni María, va soqol tus chaʼal taun putaulan laka xaʼaspajunuxnan xaʼestado Judea. 40Tanuchal la ixchaqaʼ Zacarías, va mastakʼal ni Elisabet. 41Tejkan qasmaklhi Elisabet ni jamastakʼanti, ex ni jasʼatʼa va laklal la ixpajan. Ni Elisabet laqtanuʼol ni Espíritu Santo. 42Va la pʼas naul: —Apalay ox kaxajtachal mijatsukunti xajantu matichun xanati. Vachuʼ ni jasʼatʼa la mimpajan. 43¿Valiʼiycha kimpaxtoqniy ni kilaqminta ixnati kiJalhachimoʼonuʼ? 44Tejkan xkʼili ijqasmaklhi mimastakʼanti, va laklal kun achati ni jasʼatʼa la kimpajan. 45Va lhakʼapʼupʼi ni laqsaval kunaʼ yu naul ni Jalhachimoʼonu Dios, xlhiyucha ox kaxajtachal mijatsukunti. 46Ex va naul ni María: La kelhanuti, kitʼin la ay kmakay ni Dios. 47La ketsukunti va klhiʼachantajuy ni Dios yu kimalaqtaxtuta. 48Kimapaynil mas va klakatʼuniy ni kitʼin yu ixʼoqxtamati kunita. Chavaycha tachun ni lapanakni mas va tavanancha va si kintajunaʼ ni ox xajachal kijatsukunti. 49Dios lhitʼajun tapʼasta, va yucha kimakanita yu lajʼay. Yucha va si ox junita. 50Mas va tavanancha lakmapayniy tachun ni lapanakni yu tatoʼoyay. 51Tachun yu makay yucha va masuy ixtapʼasta. Ni lapanakni yu lajʼay takʼatsʼan la ixjatapastakʼatkʼan, va lakstʼuniy lakmakatacha. 52Va lakmaxtunil ixtapʼastakʼan ni lajʼay lapanakni, va lajʼay lakmakal yu lakstʼuniy takʼatsan. 53Yu tachavaniy va ox lakmaʼotsanil. Yu maqalinin va lakmaxtuniʼol yu ixtalhitʼajun, valiʼiy jalakmakaul. 54Yucha kintaʼaqtayjuyan yu israelitas juntau, yu ixʼoqxtamatin juntau. Jantu aqtaun kʼapʼa, va si kintamapayniyancha. 55Vachu va tacha lakjunil ni kepayankʼan yu maqancha ixtatʼajun. Vachu va tacha junkal ni Abraham, kalakmapaynikanaʼ mas va tavanancha tachun sasʼatʼan. 56Ex chuncha ni María va tʼataulal ni Elisabet va tacha laʼatʼutu malkuyuʼ. Taval anchoqolcha la ixchaqaʼ. 57Taval laqchaʼal ni julchan, va maqlaqavanalcha ni Elisabet, lhitsukul va tsʼal. 58Ex ixlapanakni kun yu ancha ixtʼataulnin va takʼatsal ni Dios xtaqnil taun ay jamapayninti. Tachun talhiʼachantajuʼol. 59Tejkan laqchaʼal paqtsajin julchan, va taʼal xvililichukʼuninin ni jasʼatʼa. Ex chuncha ni lapanakni va ixtajunputun Zacarías yu ixtaqaʼuti ixpay. 60Pero ixnati qaltayanal, va najun: —Jantu yuʼ kajunkanaʼ, kajunkanaʼ va Juan. 61Ex tanaul: —¿Valiʼiycha? Jantu matichun katsukul milapanaki yu chuncha kajunkal. 62Ex talhisakmil yu ixpay yu janunuʼ y aqatapa, va tamajkunil: —¿Tisuncha taqaʼuti kʼaʼuneʼe ni mintsʼal? 63Ex yu xapay skʼil aqxtaun tabla, ancha tsʼoqmukʼal: “Kintsʼal kajunkanaʼ va Juan.” Ex ni lapanakni va tus tachun saq tatayal. 64Ex taʼoxichoqolcha ixkil ni Zacarías, laycha malaklanichoqoy isimaʼati, chivinchoqolcha, va ay makal ni Dios. 65Ex chuncha tatalhanal tachun ixtʼataulnin. Talajunil yu tapasal tus takʼatsaʼol tachun ni lapanakni laka aspajunuxnan xaʼestado Judea. 66Tachun yu taqasmaklhi taʼaqtayl tapastakʼa, va tanajun: —¿Tis va suncha kunacha ni anu jasʼatʼa? Ni Jalhachimoʼonu Dios ixʼaqtayjuy ni jasʼatʼa. 67Ex ni xapay Zacarías laqtanuʼol ni Espíritu Santo, laqputeʼel ixchivinti Dios, va naul: 68Ay kamakakal ni Dios kiJalhachimoʼonukʼan yu israelitas juntau. Kintalaqminan y kintamalaqtaxtuyan kijnan yu ixlapanakni juntau. 69Kintamalaqachaniyan qayntaun Jamalaqtaxtunuʼ yu lhitʼajun tapʼasta. Yucha ixpapanti kunaʼ ni David yu maqancha ixʼoqxtamati Dios ixjunita. 70Tejkan talhichivinil ni ixlapanakni yu maqancha ixtalaqputeʼey ixchivinti Dios, va inchine tanaul. 71Kintamalaqtaxtuyan la ixtamakakʼan yu kintʼalaxkayninkʼan y tachun yu jantu ox kintalaqtsʼinan. 72Lakmapaynil ni kepayankʼan yu maqancha ixtatʼajun. Vachu pastakʼa yu maqancha naul ni kamakayaʼ. 73Dios xtaqnil ixchivinti ni Abraham yu kimpaykʼan yu maqancha ixtʼajun, naul laqsaval katapasayaʼ. 74Naul ni kintamalaqtaxtuyan la ixtamakakʼan yu kintʼalakxkayninkʼan, ex lay katapatsaniu ni yucha sin talhanti. 75Najun jantucha kaʼalil kintalaqalhinkʼan, vas katiʼukxuntayau, mas va tavanancha. 76Chavaycha uxintʼi kesʼatʼa kʼatʼi, kalhimispʼakʼaneʼe tacha qayntaun lapanaki yu laqputeʼey ixchivinti Dios yu vilchal laktʼiyan. Pʼunaj kʼapʼulpʼiniyeʼe ni Jalhachimoʼonuʼ taʼan kapuʼanaʼ, kʼalaklaʼoxiniyeʼe ixjatapastakʼatkʼan ni lapanakni. 77Kʼalakmakʼatsʼaniyeʼe ni lapanakni ni lay katapulaqtaxtul y kalaqmalaqmixinikal ixtalaqalhinkʼan. 78Ni Dios ayaj kintamapayniyan, xlhiyucha kintaxtaqniyan xamaklku laktʼiyan. 79Va tacha katunkul para jantucha kaputsʼislhi la ixjatapastakʼatkʼan ni lapanakni para kapuʼau la ixtin Dios y laqalajʼox kajuu kun yucha. 80Ex ni tsʼal va aynlhi, va ixtʼajun mispanaʼ Dios. Va ixtiʼukxuyal taʼan jantu alin chaqan tus laktasunil xalapanakni Israel.

will be added

X\