SANTIAGO 3

1Ketʼalaqaunin, apalay ox kaval jantu qaynlhuu kʼaʼuntʼik yu jamalaninanatʼik. Ni kijnan kʼatsayaucha yu jantu vas jamalaninanau, ni Dios apalay kamakayaʼ kuenta kintalaqalhinkʼan. 2Tachun kijnan pulhuu laqtaqal makayau. Incha qayntaun lapanaki jantu aqtaun kiltaxtuy tuʼuchun chivinti yu jantu ox, ex yucha vas tiʼukxuyal, jantu tuʼuchun tsʼanqaniy y vachuʼ lay lhichimoʼoy tachun ixlakatunaj. 3Tejkan jamakiltanuyau ixfrenoskʼan ni jukin para kintatoʼoyan ex lay japulhaʼanau taʼan japulhiʼuxaʼanau. 4Vachu ni barcos, mas ayaj lajʼay y yu un pʼays sunlhaʼan, pero yu xamaltananaʼ va kun lakatʼuniy kʼiu lay pulhaʼan taʼan pulhiʼuxaʼan. 5Vachu ni kisimaʼatikʼan mas va lakatʼuniy yu alin la kilakatunajkʼan pero lay makay axtoqnuʼ yu lajʼay. Ni jikmi mas va lakatsʼuniy pero vachu lay xavaʼojoy taʼakchun lakakʼavinan. 6Ni kisimaʼatikʼan va tacha lakatsʼuniy jikmi junita. Va ancha minachal puchux xatalaqalhin ni lakamunukpaʼ. Yucha laqalhiʼojoy tus tachun kilakatunajkʼan, va tacha kamaqtaytaulal tapanchun la ketsukuntikʼan y pumaqtajiy xajikmi laqnin. 7Ni lapanakni lay tamamansujlay puchux talhitsukuti, lay tamamansujlay tsʼoʼon ali tsapulin y vachuʼ yu alin lakxkan y chavay tamamansujlatacha. 8Pero jantu matichun lay mamansujlay isimaʼati. Tejkan tsukuy maqtaqalhiniʼ ni simaʼati ex lhiʼakxajachal tacha kʼalhitsʼukʼucha taun xalhinin para kʼamaqnin. 9Kun kisimaʼatikʼan putoʼoyayau kimPaykʼan Dios y vachu va yucha pulaktuʼuyau ni lapanakni yu jalakmakal Dios para kataval tacha yucha. 10Kun kinkilnakʼan kiltaxtuyau chivinti para kaputoʼoyau ni Dios y vachuʼ para laqxtoqnuʼ kachiviniu. Ketʼalaqaunin, jantu maqskʼiniy chuncha kaval. 11Taʼan taxtuy xkan jantu lay putʼuy taxtuy. Jantu lay lakataun taxtuy yu saqsi xkan kun yu suniya xkan. 12Ketʼalaqaunin, vachu ni xakʼiu higo jantu lay xtaʼa xaʼunikan olivas y yu xakʼiu olivas jantu lay xtaʼa xaʼunikan higos. Vachu va chun taʼan alin xkan yu sʼoʼo jantu lay taxtuy yu saqsi xkan. 13Incha alin qayntaun yu ox jalakpastaknan y chux malaqasiy ex tsʼanqay jantu ay kamakakal y kamasul yu ox ixputsuku yu minachal kun ox ixjatapastakʼati. 14Uxiknan incha alin akchaʼati kun taqspukniti la melhanutkʼan ex jantu maqskʼiniy ay kakʼatsʼantʼik. Chuncha va si jalaklkʼananatʼik para jantu lay kamispakal yu laqsaval. 15Ni anchanu jatapastakʼati yucha jantu kaminchal kun Dios, yucha va xajatapastakʼati aniy lakamunukpaʼ yu pastakʼa yu valiʼiy lapanaki y minachal kun ni aqmoqxnuʼ. 16Taʼan alin akchaʼati kun taqspukniti ancha jantu lay vas xajachal tuʼuchun y puchux talaqalhin alin. 17Pero yu talhitʼajun ni jatapastakʼati yu minachal kun Dios yuʼuncha talhixajyachal jatsukunti yu jantu tsʼuniy kalhitayal laqtaqal, va oxamaktaun tajunita, vachu qalʼox tajunita, vachu jantu ay takʼatsan, va talhitsukuy jamapayninti, tachun yu tamakay si ox xajachal, va taun jalaqtsʼinkan y jantu tʼuy ukxpu tamakay. 18Yu talaqlaʼoxinin yu talalhixkajiy para ox katalalaqtsʼinchoqol, yuʼuncha ox tamakay. Va tacha katachʼal yu ox para kataxqaʼil yu vas jatsukunti.

will be added

X\