SANTIAGO 2

1Ketʼalaqaunin, uxiknan yu lhakʼapʼupʼinatʼik ni ay Jalhachimoʼonu Jesucristo va aqstanchunin kʼalatʼoʼoyatʼik y jantu siya tumpaj kʼalalaqtsʼintʼik. 2Tejkan tʼaqxtʼoqyatʼik, ex katanuchal qayntaun maqaliʼ yu kamaqtanul kʼus ixmaqtanuti yu jamakanti kun oro y vachu kaʼulal yu ox laqchʼiti, ex vachuʼ katanuchal ancha qayntaun yu oxicha atʼaliʼ ixlaqchʼita, 3ex chuncha ka va ox kalaʼaʼitʼik yu maqaliʼ y kaʼunitʼik: “Uxintʼi aniycha katʼaulchiy taʼan alin yu ox siya.” Ex yu kilpataniʼ yucha ka va kaʼunitʼik: “Uxintʼi ancha katʼaycha u katʼaʼulcha lakatʼun taʼan chʼatay.” 4Incha va chuncha makʼayatʼik ex jantucha aqstanchunin latʼoʼoyayatʼik. Ex va untʼatʼik tacha jueces yu jantu vas tamakay. 5Ketʼalaqaunin yu klapaxkayau, ox kʼaʼasmaktʼik yu klajunau. Ni Dios jalaksaklhi yu kilpatanin aniy lakamunukpaʼ para kataval tacha maqalinin por ixlhakapuʼatikʼan y vachuʼ para katalaqaʼil ixmaqalitikʼan yu tapaxtoqniy taʼan jalhachimoʼonun, yu kamaqxtaqniyaʼ tachun yu taʼachaniy. 6Uxiknan ox jamamaxaniyatʼik ni kilpatanin pero yu maqalinin va yuʼuncha yu talhimaqchapuyan y talaqxaqamayan tejkan talhaʼanan laka pulakchivin. 7Vachu va yuʼuncha yu takiltajiy ixtaqaʼuti ni Cristo yu lhimapʼaqaʼukʼantʼatʼik. 8Uxiknankʼan ayaj ox makʼayatʼik incha laqsaval makʼayatʼik tacha yu lhinajun kiJalhachimoʼonukʼan Dios yu najun inchineʼ: “Kapʼaxkʼatʼi mintʼamachaqaʼ chuncha tacha pʼaxkʼakʼan milaqʼaman.” 9Pero incha jantu va aqstanchun japʼaxkʼananatʼik ex makʼayatʼik talaqalhin y la ixlhachimoʼon Dios tamukʼaniyan laqtaqal por jantu makʼayatʼik yu lhinajun. 10Incha qayntaun lapanaki tus makaʼojoy tachun yu lhinajun la ixlhachimoʼon Dios pero vamun kun laqataun jantu vas makay, ex vachuʼ lhitsukuʼojoy laqtaqal kun yu alati yu lhinaunkan. 11Ni Dios naul: “Jantu katʼatʼamatʼi aqayntaun lapanaki yu jantu minavin kaval y jantu kʼamaqnin.” Ex chuncha incha qayntaun jantu tʼatamay aqayntaun yu jantu ixnavin kaval, pero incha jamaqninin ex makaycha taun laqtaqal yu jantu lhinajun laka lhachimoʼon. 12Uxiknan tsʼanqay vas kachʼivinintʼik y ox vas katʼiʼuntʼayatʼik porke katapuxkaulaqtsʼiniyan mimputsukukʼan ni anchanu lhachimoʼon yu oxamaktaun jamakanan. 13Yu jantu tamapayniy yu alati lapanakni yuʼuncha jantu kamapaynikanaʼ tejkan kapuxkaulaqtsʼinkanaʼ ixlaqtaqalkʼan. Pero yu tamapayninin, yuʼuncha katalhajayaʼ tejkan kalakmakanikanaʼ kuenta ixputsukukʼan. 14Ketʼalaqaunin, ¿tisuncha xtapal incha qayntaun najun lhakapuʼan ni Dios pero jantu makay yu lhinajun? Yucha jantu lay kalaqtaxtuyaʼ mas najun lhakapuʼan. 15¿Tas kalhixajchalcha incha kaʼalil qayntaun kintʼalaqajunkʼan u kintʼalapanatkʼan yu katatsʼanqanil ixlaqchʼitkʼan y vachuʼ katatsʼanqanil yu kataʼul laka julchan? 16Ex incha xaqayntaun uxiknankʼan kajunil: “Laksniycha kapʼinchʼoʼocha, kʼaʼulatʼacha yu qaltanʼay milaqchʼiti y ox kʼavay.” Pero incha jantu xtʼaqniyatʼik yu maqskʼiniy ex jantu tuʼuchun xtapal kaval minchivintikʼan. 17Vachu chun lhitapasay kun milhakapuʼatikʼan, incha jantu makʼayatʼik yu lhinaunkan, ex jantu tuʼuchun ixtapal kaval milhakapuʼati, va tacha kanilcha. 18Qayntaun lay kanaul inchineʼ: “Uxintʼi lhakʼapʼupʼin ni Dios y kitʼin kmakay yu lhinajun.” Pero ni kitʼin va knajun ni jantu lay kʼimasunin ni lhakʼapʼupʼin incha jantu makʼay yu lhinajun. Kitʼin kmasuniyan ni laqsaval klhakapuʼan va por kmakay yu lhinajun. 19Uxintʼi lhakʼapʼupʼin ni Dios va laqataun alin. Chuncha ox makʼay. Ni aqmoqxnun vachu chun talhakapuʼan pero kun talhanti. 20Jantu kaʼuntʼi tontoj, mas naʼun ayaj xtapal milhakapuʼati pero chavay kmasuniyan ni jantu tuʼuchun xtapal kaval incha jantu makʼay yu lhinaunkan. 21Ni Abraham yu maqancha kimpaykʼan ixjunita, ni Dios ox laqtsʼinil ixjatsukunti tacha qayntaun yu jantu kalhitsukul tuʼuchun laqtaqal. Ni yucha ox laqtsʼinkal va por yu makal tejkan ixmaqxtaqputun tacha taun lapaxkan yu istsʼal Isaac. 22Ex chuncha malaqasikan ni Abraham lhakapuʼal pero vachuʼ makal yu lhinaul ni Dios. Chuncha por yu makal tasul ni laqsaval ixlhakapuʼan. 23Ex chuncha val tacha tsʼoqkanta la ixchivinti Dios yu najun inchineʼ: “Ni Abraham lhakapuʼal ni Dios xlhiyucha ni Dios laqaʼil tacha qayntaun lapanaki yu jantu kalhitsukul laqtaqal.” Ex ni Abraham lhimapaqaʼukal ixʼamigo ni Dios. 24Ex chuncha kʼatsʼayatʼik ni Dios ayaj ox laqtsʼin qayntaun lapanaki por yu makay y jantu vamun por yu lhakapuʼan. 25Ni Dios vachu ox laqaʼil ni Rahab, ni anchanu xanati yu ixmakata talaqalhin kun joʼakna. Yucha ox laqaʼikal por yu makal tejkan jalaqaʼil yu ixjalaqmalaqachata Josué ex astan jalaqmalaqachachoqolcha alakataun lakatin. 26Ni lakatunaj yu jantucha kalhitsukul ixlhitsukunuʼ yucha nitacha. Vachu chun junita milhakapuʼati incha jantu makʼay yu lhinajun ni Dios ex tacha kanilcha milhakapuʼati.

will be added

X\