HEBREOS 9

1Ni chivinti yu Dios pʼunaj jatʼatamakaul ixlapanakni yucha lhinaul tacha maqskʼiniy katʼoʼoyatʼi ni Dios. Vachu lhinaul ixmakaka ni chaqaʼ taʼan katʼoʼoyatʼi Dios aniy lakamunukpaʼ. 2Tamakal aqataun karpa yu pulaktʼuy ixjunita. Yu pulaktaun taʼan putanukanachal ancha ixʼalin yu pumachʼatakan ni maklku, vachuʼ yu mesa taʼan moqslanikan pan ni Dios. Anchanuʼ pulaktaun ixjunkan Taʼan ixnavin Dios. 3Ex yu xlhiʼavintʼi taʼan jukʼal ni laqchʼiti yu apulaktaun, ancha ixjunkan yu Vamun ixnavin Dios. 4Ancha ixyal ni altar yu jamakanti si oro taʼan ixtalaqxavay pun y vachu yu xakajun yu ixlhimaqapamilkanta oro yu masuy ni Dios va chʼantaun kun ixlapanakni. Ixpulakna ni anchanuʼ kajun ancha ixtamaʼay laqataun xaluj yu jamakanti oro taʼan yu ixtapumujuy maná. Vachu ni anchanuʼ kajun ixtʼajun ixpaliki Aarón yu maqlaqapʼul. Vachu ixtanun yu ltaʼal chiyux taʼan istsʼoqkanta ixlhachimoʼon Dios. 5La ixʼukxni ni kajun ancha ixtayanal pumatʼuy yu tacha lapanakni kun ixpaqachujkʼan yu ixtamasuy taʼan ixvil ixtapʼasta Dios. Ancha ixjamalaqmixinikan ixtalaqalhinkʼan ni lapanakni. Pero chavay jantucha maqskʼiniy iktaylhaʼal lhichiviniʼ. 6Tejkan chuncha laʼoxikal ex ni kuras lhilhiy ixtatanuy yu pulaktaun taʼan putanukanachal. Ixtamakay yu lhinaunkal para katatoʼoyal ni Dios. 7Pero yu xapulaktʼiyunuʼ yu apalay ixpulakna, ancha ixtanuy vamun yu xaʼukxtin kura y vamun aqtaun laka jachʼitin. Ixmaqskʼiniy kalhaʼal xajakʼalna ixtalhitsukutkʼan yu ixtamoqslay para kamalaqmixinikal ixtalaqalhin ni yucha y vachu ixtalaqalhinkʼan tachun ni lapanakni. 8Ex chuncha ni Espíritu Santo masuy ni va lakchajuy yu pulaktʼiyunuʼ taʼan vil ni Dios. Vamun laqltiʼay taʼan putanukanachal y jantu lay tapasakan xlhiʼavintʼi. 9Ancha taʼan putanukanachal yucha chavaycha masuy tas tajunita ixputsukukʼan ni lapanakni. Ancha yu lapaxkan yu moqslanikan Dios jantu lay laʼoxiy ixjatapastakʼatkʼan ni lapanakni yu chuncha talhitoʼoyay Dios. 10Vamun paxtoqniy kilakatunajkʼan tacha yu vayti ali yu lay oqkan y tacha maqskʼiniy kalaʼachʼaʼakʼa y tacha kalaʼoxikʼa yu ixlhimakan milakatunaj. Vamun ixpaxtoqniy tus kaʼalil yu sastʼi lhachimoʼon. 11Ex kilachil ni Cristo tacha xaʼukxtin kura yu lhimil ni ox putsuku. Ex al laktʼiyan y va tacha katanul aqataun karpa yu apalay ay y apalay ox. Anchanu karpa jantu katamakal lapanakni y jantu xanavin aniy lakamunukpaʼ kaval. 12Cristo aqtauncha tanuchal tus yu xapulaktʼiyunuʼ taʼan vil ni Dios. Ancha jantu katanul por kataxtul xajakʼalna chivo o xajakʼalna sasʼatʼa vakax para lapaxkan. Lay tanul por ixjakʼalna ni yucha. Va chuncha makal para lay kalaqtaxtuyau y katsukuyau mas va tavanancha. 13Yu xajakʼalna ni chivos ali toros ixtalhipuxvay ni lapanakni. Vachuʼ yu xajalkʼakʼa ni becerra yu xavakantacha ixlhiyajuy kun xkan y ixtalhipuxvay ni lapanakni para kalaqlaqachaʼakal y para ox kataval kun Dios. 14Incha chuncha val ex chavaycha apalay pʼays yu ixjakʼalna ni Cristo para katalaʼoxinin mijatapastakʼatkʼan. Kun ixtapʼasta ni Espíritu ni Cristo yucha xʼaman tamaqxtaqlhi la ixtamakaʼ Dios y jantu tuʼuchun talaqalhin kalhitsukul. Chuncha jantucha tapaxtoqniyan kamakʼatʼik lhitapatsa yu lhixajachal lhinin, va tapaxtoqniyan kʼatʼapʼatsʼanitʼik ni Dios yu kujta. 15Chuncha ni Jesucristo kintamapasaniyan ni sastʼi chivinti yu Dios jalaktʼatamakaul ixlapanakni. Ex chuncha ni lapanakni yu Dios jalakjuntaʼita lay laqaʼiyau tachun yu lajʼoxi yu jantu aqtaun kamiʼoyaʼ. Yucha Dios naul kintaxtaqniyan. Ixʼalin kilaqtaqalkʼan por jantu kamakau yu ixlhinajun ni chivinti yu pʼunaj jatʼatamakaul ixlapanakni. Pero nil ni Cristo y xlhiyucha kintamalaqmixinin kilaqtaqalkʼan. 16Tejkan pastakʼa ni kanil qayntaun lapanaki, va tsʼoqmulay laka jalhiki taʼayucha ixnavin kunaʼ ixmaqaliti tejkan kaniyaʼ. 17Yu tsʼoqʼulanti ni anchanuʼ laka jalhiki vamun lhitsukuy tapʼasta tejkan niy yu tsʼoqlhi. Chavay incha vananaj kujta ex jantukaʼ kalhitsukul tapʼasta. 18Vachu va chun ni chivinti yu Dios pʼunaj xtaqlhi, yucha ixmaqskʼiniy kanil tuʼuchun y kataxtul ixjakʼalna para kalhitsukul tapʼasta. 19Chuncha ni Moisés jalaqputeʼeniʼol ni lapanakni tas lhinajun ni lhachimoʼon. Ex malhiyaul xajakʼalna becerros ali chivos ali xkan y matsamal maqataun kʼiu yu akchʼimukʼanta kun jachʼauti. Ex jalaklhipuxval ni lapanakni y vachuʼ ni jalhiki taʼan tsʼoqʼulanti ni lhachimoʼon. 20Ni Moisés lakjunil ni lapanakni: “Yu aniy jakʼalna masuy ni Dios chʼantaun tatʼamakaunan ixchivinti kun uxiknan.” 21Ex vachu lhipuxval ni jakʼalna ni karpa taʼan ixtatoʼoyay Dios y vachuʼ tachun ni axtoqnuʼ yu ixtamapatsay tejkan ixtatoʼoyay Dios. 22Ni anchanuʼ lhachimoʼon lhinaul katalaʼoxil tachun kun jakʼalna. Najun incha jantu taxtuy jakʼalna ex jantu lay malaqmixikan ni talaqalhin. 23Ex chuncha tachun yu ixtamapatsay tejkan ixtatoʼoyay ni Dios talaʼoxil tejkan ixtamoqslay lapaxkan. Tachun ni anchanuʼ axtoqnuʼ vamun tamasuy tsʼuniy tas junita laktʼiyan taʼan vil ni Dios. Xlhiyucha para katʼoʼoyatʼi Dios laktʼiyan maqskʼiniy yu apalay ox lapaxkan. 24Ni chaqaʼ yu tamakal ni lapanakni taʼan kataputoʼoyal Dios vamun masuy tsʼuniy tacha junita laktʼiyan. Pero Cristo jantu katanul anchanu chaqaʼ, va tanuchal yu laktʼiyan taʼan laqsaval vil ni Dios y ancha vil chavaycha para kintaʼaqtayjun. 25Yu xaʼukxtin kura va si ixtanuy aqtamin laka jachʼitin yu pulaktaun taʼan junkan Vamun ixnavin Dios. Va ixlhaʼan jakʼalna yu jantu ixnavin, va tacha lapaxkan. Pero ni Cristo va aqtaun tanul taʼan vil Dios para katamaqxtaqlhi. 26Incha aqlhuu katanul para katamaqxtaqlhi ex maqskʼiniy aqlhuu kanil mas tejkan aqtaynil ni lakamunukpaʼ tus chavaycha. Pero jantu chuncha kaval. Chavaycha tachun va tʼajun miʼonuʼ y va aqtauncha tanuchal. Va tamaqxtaqlhi tacha lapaxkan para chuncha kalaqmixlhi talaqalhin. 27Maqskʼiniy tachun va aqtaun kaniu, ex astan Dios kalakmukʼaniyaʼ laqtaqal yu tapaxtoqniy. 28Vachu va chun ni Cristo va aqtaun tamaqxtaqlhi para kanil para kalaqmixlhi ixtalaqalhinkʼan pumalhuu lapanakni. Ex kaminchoqoyaʼ aaqtauncha, jantucha para kalaqmixlhi talaqalhin, va kalaqmalaqtaxtuyaʼ ni lapanakni yu tapakxanʼita.

will be added

X\