HEBREOS 6

1Xlhiyucha kijnan maqskʼiniy kataylhaʼau para kalhitsukuu yu vas jatsukunti. Kataylhaʼau laninin alati yu lhichiviniy Cristo para laqpʼas kajuu la kilhakapuʼatkʼan. Maqancha laniu y jantucha maqskʼiniy kalanichoqoo ni chivinti yu najun ni maqskʼiniy kʼamakʼauntʼik lhitapatsa yu jantu xtapal y kalhakʼapʼupʼintʼik ni Dios. 2Vachuʼ jantucha maqskʼiniy kalanichoqoo tisuncha ixlhiʼatal kaʼaqchajʼau y vachuʼ tavanancha kʼamoqslanin kimakakʼan qayntaun yu lhakapuʼan, yucha lanitaucha. Vachuʼ ni chivinti yu masuy ni katakujchoqoyaʼ ni janinin, y vachuʼ yu najun ni Dios kalakmukʼaniyaʼ jamaqanlqajnati yu jantu aqtaun kamiʼoyaʼ. Tachun yu anuʼ lanitaucha. 3Chavaycha kataylhaaniyau laninin alati incha Dios kintaʼaqtayjuyan. 4Lati tamakauntijlay ixlhakapuʼatkʼan, ex jantucha lay aaqtauncha katamapaxachoqol ixjatapastakʼatkʼan. Tamalaqasil yu ox chivinti y tamispal yu kintaxtaqniyan Dios y tamispal ixlhitapatsa ni Espíritu Santo, 5vachuʼ takʼatsal ni ayaj ox ixchivinti Dios y vachuʼ tamispal ixtapʼasta Dios yu kaminaʼ astan. 6Incha yuʼuncha tamakauntijlay ixchivinti Dios, ex astan jantucha lay chʼantaun katajunchoqol kun Dios. Va tacha tamakxtukmukʼachoqoy ni Sasʼatʼa Dios laka kurus y talaktuʼuy la ixlakaʼukxpukʼan ni lapanakni. 7Yu taylhaʼan kun Dios va tacha tʼun yu laqchʼuchʼuy xkan yu tamay. Ni anchanuʼ tʼun xtaʼa lhiʼuti para kataʼul yu jamanavin y ni Dios najun ox kaval ni tʼun. 8Pero yu tamakauntijlay ni Dios va tacha tʼun yu vamun jaltukun ajin kun tachun yu jantu lajʼoxi. Ex jantu tuʼuchun xtapal kaval, ex ni Dios kamukʼaniyaʼ laqtaqal, ex astan kalaqxavayaʼ kun jikmi. 9Mas chuncha klajunau, va klaʼachaniyau, va ijkʼatsayau ni mimputsukukʼan jantu chun kaval tacha ni anchanuʼ tʼun. Kijnan ikpakxanʼiyau ni kaxajchal yu apalay ox la metsukuntikʼan y chuncha katasuyaʼ ni kʼalaqtʼaxtʼuyapitik. 10Ni Dios tachun axtoqnuʼ si ox makay. Yucha jantu aqtaun kakaukyaʼ yu lajʼoxi yu makʼatʼatʼikcha. Dios vachuʼ makay kuenta tacha jalakpʼaxkʼatʼik yu ixlapanakni y jalaqʼaqtʼayʼutʼik por ox lhakʼapʼupʼinatʼik. Tus chavaycha vananaj jalaqʼaqtʼayʼuyatʼik. 11Kijnan iknaunau por qayntamin si ox katʼaylhipʼintʼik japaxkanan para jantu tuʼuchun katatsʼanqanin yu pʼakxanʼiyatʼik. 12Jantu kʼamakʼakʼantʼik malhaqnin. Maqskʼiniy kalaqtsʼiʼitʼik ixputsukukʼan yu ox talhakapuʼan y tamaqantaulay y xlhiyucha talaqaʼiy yu Dios naul kaxtaʼaʼ. 13Tejkan ni Dios maqxtaqnil ixchivinti ni Abraham va jurado makal. Va xʼaman lhimapasukal ixtaqaʼuti. Jantu alin aqayntaun yu apalay ay kaval yu kalhimapasukal chuncha tacha Dios. 14Ex chuncha naul, va junkal ni Abraham: “Kakxtaqniyan lhuu achati y kaklalhavaniyan lhuu mepapanakni.” 15Ni Abraham pakxanil kun lhuu maqantaulati yu junil ni Dios. Ex astan laqaʼil yu junkal. 16Tejkan ni lapanakni taxtaqniy ixchivintikʼan, va jurado tamakay. Va talhimapasuy aqayntaun yu apalay ay kaval xajantu yuʼuncha. Ex jantucha apalay talhilakchiviniy. 17Xlhiyucha ni Dios astan, tejkan jamaqxtaqnil ixchivinti ixpapanakni ni Abraham, va ixlakmasuniputun ni jantu mapaxay ixjatapastakʼati. Xlhiyucha jurado makal tejkan jamaqxtaqnil ixchivinti. 18Chuncha alin putʼuy chivinti yu jantu lay tapaxay. Va maqxtaqnil ixchivinti y vachuʼ jurado makal. Ni Dios jantu lay jalaklkanan. Va lakxkauyau ni Dios para kintaʼaqanixtun. Chavaycha ixchivinti kintamalakaʼulayan incha ox lhakapuʼanau ni laqsaval kintaxtaqniyan yu pakxanʼiyau. 19Ox pakxanʼiyau yu kintaxtaqniyan Dios y xlhiyucha ox taylhaʼanau la ketsukuntikʼan mas va yu kalhitapasalcha. Chuncha xajachal para saq kataulau la ketsukuntikʼan. Yu pakxanʼiyau va laqsaval, va minachal tus ixlhipulakna taʼan vil ni Dios. Va xlhiʼavintʼi taʼan kiltay ni laqchʼiti. 20Ni Jesús ancha tanuchal por kijnankʼan para kintamalaqltiʼanin yu xatin. Chuncha ni Jesús yucha val xaʼay kura por kijnan, mas va tavanancha, vachu chun tacha ni Melkisedek.

will be added

X\