HEBREOS 4

1Chuncha vanaj lay katanutachaʼau taʼan lay kastaknau chʼantaun kun Dios. Ex maqskʼiniy kamakau kuenta para jantu katamakaul xaqayntaun ni uxiknan ex jantu lay katanutachal. 2Ni kijnankʼan vachucha laqputeʼenikantau ni lajʼox chivinti yu lay kapulaqtaxtuu, va aqstanchun tacha jalaqputeʼenikal yu maqancha kintʼaʼisraelitaskʼan. Pero jantu katalhakapuʼal, xlhiyucha para yuʼuncha jantu tuʼuchun xtapal kaval mas taqasmaklhi ni anchanuʼ lajʼox chivinti. 3Ni kijnan yu lhakapuʼanau va yu tanuyachaʼau taʼan lay kastaknanau chʼantaun kun Dios. Yucha naul: Kitʼin klukujlal kun yu israelitas, va klakjunil ni jantu lay katatanuyanta chʼantaun kun kitʼin taʼan katastaknal. Ni Dios makaʼol ixlhitapatsa vanaj tus tejkan makalcha ni lakamunukpaʼ, ex astan jastaknalcha. 4Lakataun taʼan tsʼoqkanta la ixchivinti Dios lhichiviniy yu laqatujunuʼ julchan, inchineʼ najun: Tejkan laqatujuncha julchan val ni Dios ixmajkaniʼojotacha tachun ixlhitapatsa ex jastaknalcha. 5Alakataun najun taʼan tsʼoqkanta: Yuʼuncha jantu lay katastaknanaʼ kun kitʼin. 6Chuncha yu pʼunaj taqasmaklhi ni ox chivinti yu lay kʼapʼulaqtʼaxtʼu, yuʼuncha jantu lay katatanuchal por jantu kataqalasmaklhi. Pero chavaycha vananaj tsʼanqay lati yu katatanuyanta taʼan katastaknanaʼ kun Dios. 7Xlhiyucha ni Dios laksaklhi taun julchan para katatanul y yucha va chavaycha. Tapasal lhuu jachʼitin ex ni David tsʼoqlhi y Dios kintaxaqalayan por yucha. Va naul: Chavaycha incha uxiknan asmatʼatʼik yu najun ex jantu kʼalapʼaysnitʼik melhanutkʼan. 8Ni Josué jantu kalaqxtaqnil taʼan lay ox ixtastaknal ixtʼaʼisraelitas. Xlhiyucha Dios lhichivinil ataun julchan. 9Ex chuncha vananaj xajachal taʼan lay tastaknan ni ixlapanakni Dios. 10Yu jastaknan kun Dios yucha jastaknan la ixlhitapatsa, vachu chun tacha Dios jastaknal la ixlhitapatsa. 11Tsʼanqay katapʼasniu para katanuchaʼau taʼan lay kastaknau. Va jantu kaʼalil matichun yu kamakal tacha ni anchanuʼ lapanakni yu jantu katalhakapuʼal. 12Ni ixchivinti Dios yucha laqsaval kujta y vachu lhitʼajun tapʼasta. Ni anchanu chivinti apalay kikxtuy xajantu maqataun espada yu peʼextʼuy kikxtuy. Yucha lay tanuy tus taʼan ixpulmanixtu la ixjatsukunti ali ixjalhitsukunuʼ qayntaun lapanaki. Chuncha masuy incha ox yu jalakpastaknan kun yu makaputun. 13Tachun yu makal ni Dios jantu lay tamaqsaqniy. La ixlaqchul Dios ox laqtsʼin tachun yu makayau. Kaminaʼ julchan tejkan kajunau valiʼiycha chuncha makau. 14Ni Jesús, yu Sasʼatʼa Dios, yucha va xaʼay kuraj junita para kijnan. Yucha tanuchal taʼan vil ni Dios. Xlhiyucha maqskʼiniy kataylhaʼau lhakapuʼanan. 15Mas kintatsʼanqaniyan tapʼasta la kilhakapuʼatkʼan, ni Jesús yu kinkurajkʼan yucha lay kintapaxkayan. Yucha vachu laqtsʼintanukal incha lay kamakal talaqalhin vachu chun tacha kijnan pero yucha jantu kamaqtaqalhinil. 16Xlhiyucha maqskʼiniy kataʼukstsʼuniu sin talhanti taʼan jalhachimoʼonun ni Dios yu ox japaxkanan. Chuncha kintamapayniyan y kintaxtaqniyan yu lajʼox tejkan kamaqskʼiniyau.

will be added

X\