HEBREOS 3

1Ketʼalaqaunin, uxiknan yu ixnavin Dios untʼatʼik, ni Dios va talaksakni para kʼaʼuntʼik ixlapanakni. Kʼamakʼatʼik kuenta ni Jesús yu Dios malaqachal. Yucha yu xaʼay kuraj yu kintajunan tacha maqskʼiniy kalhakapuʼau. 2Ni Jesús ayaj ox makaʼol ni lhitapatsa yu lhinaul ni Dios. Vachu va chun ni Moisés makaʼol ni lhitapatsa yu lhinaul ni Dios para ixlapanakni. 3Pero ni Jesús apalay ay junita xajantu ni Moisés vachu va chun tacha qayntaun lapanaki yu makay aqataun chaqaʼ apalay toʼoyakan xajantu yu chaqaʼ. 4Aqataun chaqaʼ si alin matichun yu makata pero Dios yucha makaʼol tachun axtoqnuʼ yu alin. 5Ni Moisés ayaj ox tapatsal kun ixlapanakni ni Dios. Va ixʼoqxtamati ixjunita y va yucha ixpaxtoqniy kalaqputeʼel tachun yu Dios astan kanaunaʼ. 6Ni Cristo vachuʼ ox tapatsay kun ixlapanakni ni Dios pero va Sasʼatʼa Dios junita. Kijnan va ixlapanakni juntau incha ox lhakapuʼanau y vas taylhaʼanau y si pakxanʼitau yu lajʼoxi. 7Xlhiyucha ni Espíritu Santo inchineʼ najun: Chavaycha incha kilaqalasmakyau, 8jantucha pʼays kʼamakʼatʼik melhanutkʼan. Chuncha tamakal ni israelitas tejkan jantucha kataqasmaklhi yu klhinaul, tejkan kintalaqtsʼintanul lakakʼavin. 9Chuncha la maqancha mepayankʼan talaqtsʼil tachun yu lajʼox axtoqnuʼ yu ikmakal para yuʼuncha tus cuarenta jachʼitin. Pero mas talaqtsʼil vanaj kintalaqtsʼintanul incha kaklaqʼaqtayjul. 10Xlhiyucha iktalqaunlhi kun ni anchanuʼ lapanakni, va knaul: “Jantu aqtaun ox katamakal ixjalhanutkʼan. Jantucha katamakal kuenta kilakatin.” 11Xlhiyucha kitʼin ayaj klukujlal kun yuʼuncha y klakjunil: “Jantu lay katastaknanaʼ chʼantaun kun kitʼin.” 12Ketʼalaqaunin, kʼalhistʼajkʼantʼik para jantu matichun kataylhaʼal kun yu jantu ox jatapastakʼati y jantu matichun kamakauntijlal ni Dios yu kujta. 13Vananaj Dios talhijunan para chavaycha kʼaʼalasmaktʼik. Xlhiyucha uxiknan tsʼanqay lhilhiy kʼalamapʼaysnitʼik para jantu matichun kamakanukal kun talaqalhin y jantu pʼays kaval ixjalhanuti. 14Chʼantaun juntau kun Cristo incha ox kataylhaanau lhakapuʼanan tacha pʼunaj lhakapuʼau mas va tavanancha. 15Chavaycha kapʼastʼaktʼik yu najun ni Dios taʼan tsʼoqkanta: Chavaycha incha kilaqalasmakyau, jantucha pʼays kʼamakʼatʼik melhanutkʼan tacha tamakal ni israelitas tejkan jantucha katalaqaʼil kilhachimoʼon. 16¿Tas ayuʼuncha lapanakni yu taqasmaknil ixchivinti ni Dios y jantu katalaqaʼil ixlhachimoʼon? Yuʼuncha ixtajunita ni lapanakni yu jamaxtul ni Moisés xalakatʼun Egipto. 17¿Taʼayucha lukujlanil ni Dios tus cuarenta jachʼitin? Va kun lapanakni yu tamakal talaqalhin. Yuʼuncha tanil ni anchanuʼ lakakʼavin. 18¿Tas ayuʼuncha lapanakni jalakjunil ni Dios yu jantu lay katastaknanaʼ chʼantaun kun yucha? Va lapanakni yu jantu kataqalasmaklhi. 19Chuncha kijnan laqtsʼinau ni jantu katalhakapuʼal. Xlhiyucha jantu lay katatanuchal taʼan Dios lay kalakmastaknil.

will be added

X\