HEBREOS 2

1Xlhiyucha tsʼanqay apalay kamakau kuenta yu kintamalanitan, para jantu kamakauntijlau ni lakatin taʼan alin ox jatsukunti. 2Maqancha ni ixmayulnin Dios talhiminil ni lapanakni ixchivinti Dios y anchanu chivinti va laqsaval. Ex chuncha ni lapanakni yu jantu kataqalasmaklhi, si talaqaʼil maqanlqajnati yu ixtapaxtoqniy. 3Ex chuncha ni kijnankʼan, ¿tas ancha kapuqosaucha, incha jantu makayau kuenta yu xtaʼa Dios para kintamalaqtaxtun? Ni Jalhachimoʼonuʼ Jesucristo, yucha pʼunaj aqtayl lhichiviniy tacha lay kalaqtaxtuu. Ni lapanakni yu taqalasmaklhi, yuʼuncha astan kintamapasanin kijnan y kintamasunin ni yucha va laqsaval. 4Ni Dios vachuʼ kintamasunin ni va laqsaval por masul lajʼay axtoqnuʼ y kintaxtaqnin ni Espíritu Santo. Va jaxtaqnil ixlapanakni tacha yucha xtaqputul. 5Ni Dios jantu kamaqxtaqnil ixmayulnin para katalhachimoʼonul ni sastʼi lakamunukpaʼ yu kaʼalinaʼ astan. Klhichivinanau ni anu lakamunukpaʼ. 6Alin la ixchivinti Dios taʼan chiviniy qayntaun lapanaki y Dios va inchineʼ junkan: ¿Valiʼiycha kilalaqtsʼinau ni kijnan yu valiʼiy lapanakni kuntau? Ni kijnan vamun sasʼatʼan lapanakni, ¿valiʼiycha pastakʼuyan por kijnan? 7Uxintʼi apalay lakatʼuniy kilamakau xajantu yu mimayulnin pero lajʼay kilamakau, va tacha kilamaqxtaqniu taun korona para kaktoʼoyakau. Vachuʼ kilamaqxtaqniu lhachimoʼon para kaklhachimoʼonuu kun tachun axtoqnuʼ yu makʼatʼi. 8Tachun axtoqnuʼ yu alin si la kinchʼajakʼan lhilakʼulatʼi. Va chuncha makal ni Dios, xlhiyucha jantucha alin tuʼuchun yu jantu lay lhichimoʼoyau. Pero mas chuncha makal tus chavaycha, jantukaʼ tasuy ni lay kalhichimoʼoo tachun axtoqnuʼ. 9Pero laqtsʼinau ni Jesús. Yucha ayaj lakatʼuniy makakal taun panchʼix, apalay lakatʼuniy xajantu ixmayulnin Dios. Ni Dios kintamapaynin, xlhiyucha ni Jesús nil por tachun ni lapanakni. Chavaycha ayaj ay xajtachal ni Jesús para katoʼoyakal por maqanlqajnal y nil. 10Tachun axtoqnuʼ yu alin va si Dios ixnavin y va si por yucha alil. Yucha najun katapaxtoqnil laktʼiyan tachun sasʼatʼan. Xlhiyucha malaqachal ni Jamalaqtaxtunuʼ Jesús kamil jamaqanlqajnaʼ para jantu tuʼuchun katsʼanqal la ixjatsukunti ni yucha. 11Ni Jesús yu kintamaqosunin kintalaqalhinkʼan y tachun ni kijnan yu jamaqosunikau va qayntaun jaPay lhitʼaunau. Xlhiyucha ni Jesús jantu maxanan kintajunin ixtʼalaqaunin ali ixtʼalapanakni. 12Xlhiyucha la ixchivinti Dios taʼan tsʼoqkanta najun inchineʼ: Kaklhichivinanan tejkan kaklaktʼachivinaʼ ketʼalaqaunin. Vachuʼ kaklhimilpayan y kaktoʼoyayan taʼan katataqxtoʼaʼ. 13Vachuʼ najun: Kitʼin kaktaylhaanaʼ lhakapuʼan ni Dios. Alakataun vachuʼ tsʼoqkanta: Aniy kʼalinta kun kesʼatʼan yu Dios kimaqxtaqnil. 14Ni kijnan va yu jasʼatʼan y kilakatunajkʼan va jamakanti vakax ali jakʼalnan. Xlhiyucha vachuʼ ni Jesús lhitsukul ixlakatunaj yu vakax ali jakʼalnan tacha valiʼiy lapanaki para lay kanil. Ex chuncha lay kamaqalhajal ni aqmoqxnuʼ yu lhitʼajun ixtapʼasta lhinin. 15Chuncha ni lapanakni ayaj ixtatalhauniy lhinin tus va tacha lakchʼikanta por ixtalhantikʼan pero chavaycha ni Jesús jalakmakaul oxamaktamin. 16Yucha jantu kamil para kaʼaqtayjul ni angeles. Va kilachil para kaʼaqtayjul ni sasʼatʼan Abraham. 17Xlhiyucha ixmaqskʼiniy kaval vachu va tacha kijnankʼan yu ixlapanakni juntau para kintamapaynil y kaval tacha qayntaun kura yu si vas tapatsaniy Dios. Chuncha val para kintaxakanin kintalaqalhinkʼan. 18Ni yucha tejkan maqanlqajnal va laqtsʼintanukal incha kamakal laqtaqal. Xlhiyucha lay kintaʼaqtayjuyan ni kijnan tejkan maqanlqajnanau para jantu kamakau laqtaqal.

will be added

X\