HEBREOS 13

1Katʼaylhipʼintʼik lapaxkanan tacha tʼalaqaunin. 2Ox kʼalaʼaʼitʼik la minchaqaʼ mas kaval lapanakni yu jantu mispʼayatʼik. Lati mas jantu ixtakʼatsay, va ixmayulnin Dios tamaloqojnil. 3Kalakpʼastʼaktʼik yu tatanumanal laka pachʼin. Kakʼatsʼantʼik va tacha kalaktʼachʼikʼantʼik ni uxiknan. Vachu yu jalaqlhimaqchapukanta, va kʼakʼatsʼantʼik tacha chʼantaun kʼaʼuntʼik. 4Tachun maqskʼiniy katʼoʼoyatʼik ni lakxtuklati. Ox katʼaylhipʼintʼik yu lakxtuklati, jantu kamaqtʼaʼalhinintʼik. Ni Dios kalakmukʼaniyaʼ ixlaqtaqalkʼan tachun yu tatʼatamay yu jantu ixnavinkʼan kaval. 5Jantu kaʼachʼanitʼik tumin, va katʼaʼoxamaktʼamitʼikcha kun yu lhitʼaunatʼikcha. Ni Dios va naul: “Jantu aqtaun klamakaunau, va si klaʼaqtayjuyau.” 6Xlhiyucha jantu talhananau, va naunau: Ni Dios kintaʼaqtayjuyan, jantu katalhananau. Yu lapanakni jantu tuʼuchun lay kintamakaniyan. 7Kalakpʼastʼaktʼik yu xalajʼaynin yu tamasunin ixchivinti Dios. Kʼamakʼatʼik kuenta tas lhixajchal ixputsukukʼan y katʼaylhipʼintʼik tacha ixlhakapuʼatkʼan. 8Ni Jesús jantu tapaxay, va aqstanchun mas va kutancha, mas chavaycha, mas va tavanancha. 9Jantu kʼamakʼanukʼantʼik mas lati tamalaniputunan aputaun jatapastakʼati yu jantu paxtoqniy. Talhinajun tisuncha lay kaʼutʼi pero yu talhinajun jantu matichun aqtayjuy. La ketsukuntikʼan vamun ixjamapayninti ni Dios lay kintaʼaqtayjuyan. 10Ni kilapaxkankʼan va tacha yu ixtamoqslay maqancha yu jantu jalaqxtaqnikan lakatin para kataʼul ni yuʼuncha. 11Tejkan ixtamakay ni anchanuʼ lapaxkan yu ixtamoqslay, ex yu xaʼukxtin kura lhaʼal xajakʼalna talhitsukuti tus ixpulakna ni chaqaʼ taʼan ixtatoʼoyay Dios. Va para kalaqmalaqmixinikal ixtalaqalhinkʼan. Pero ixlakatunajkʼan ni talhitsukuti ixtaxavay ixlhimaqspaʼ ni putaulan. 12Chuncha vachuʼ ni Jesús va maqnikal ixlhimaqspaʼ ni laka putaulan para kalaqmalaqmixinikal ixtalaqalhinkʼan ixlapanakni por ixjakʼalna. 13Ex kijnankʼan vachuʼ maqskʼiniy kaʼau taʼan alin ni Jesús. Jantucha katanuu la ixputsukukʼan ni lapanakni mas kintalaktuʼuyan. 14Aniy taʼan vilanau kamiʼoyaʼ. Va lakxkauyau ataun putaulan yu kaminakaʼ. 15Por yu makal Jesús va si ay makayau ni Dios. Ex chuncha kalhixajchal tacha kilapaxkankʼan yu minachal la kinkilkʼan tejkan ox lhichivinau ixtaqaʼuti. 16Kʼamakʼatʼik yu lajʼoxi y kalaʼaqtʼayʼutʼik. Chuncha lhixajachal tacha lapaxkan yu lhipaʼiniy Dios. 17Kaʼalʼasmaktʼik yu xalajʼaynin yu talhakapuʼanan y kamakʼatʼik kuenta yu talhijunan. Yuʼuncha talhistakʼan la metsukuntikʼan y kataxtaqniyaʼ kuenta ni Dios por ixlhitapatsakʼan. Ex kaʼalʼasmaktʼik para lay katatapatsal kun achati. Incha ayaj lhitaʼay para yuʼuncha ex jantu ox lhixajachal para uxiknan. 18Kaskʼintʼik Dios por kijnankʼan. Ox ijkʼatsayau ni jantu alin kilaqtaqalkʼan. Tachun yu ikmakayau va ox iktiʼukxuntayaputunau. 19Ni kitʼin va klaskʼiniyau ni kaskʼintʼik Dios para niman aaqtauncha lay klatʼataulchoqochaʼau. 20Ni Dios oxamaktaun kintamakayan. Yucha majkujuchoqol kiJalhachimoʼonukʼan Jesús tejkan ixnitacha. Ni Jesús va la ay y kintalhistakʼan tacha ixborregos. Ixjakʼalna masuy ni Dios chʼantaun kintatʼamakajun mas va tavanancha. 21Xlhiyucha ni Dios kataxtaqnin tachun yu lajʼoxi yu maqskʼiniyatʼik. Ex lay kʼamakʼatʼik yu lhinajun. Vachuʼ kamakal Dios la ketsukuntikʼan va yu kalhipaʼinil. Chuncha kamakal por ixjatsukunti ni Jesucristo yu paxtoqniy katoʼoyakal mas va tavanancha kaval, jantu aqtaun katamaktal. Va chuncha kavalcha. 22Klaskʼiniyau, ketʼalaqaunin, ox kʼalaʼaʼitʼik ni chivinti yu klalhixaqalau kun yu aniy lakatʼuniy karta. 23Va iknajun kakʼatsʼatʼik ni kilaqajkʼan Timoteo taxtuchoqotacha laka pachʼin. Incha niman kachinaʼ ex iktʼaʼantachal tejkan klalaqʼanchoqoyau. 24Kʼamastʼakʼatʼik tachun yu talhichimoʼoyan y tachun ixlapanakni ni Dios. Vachuʼ tamastakʼayan yu aniy tavilanal xalakatʼun Italia. 25Ni Dios katamapaynin mintachunkʼan.

will be added

X\