HEBREOS 1

1Maqancha ni Dios aqlhuvaj jalaktʼachivinil kepayankʼan kun pulhuu axtoqnuʼ yu makal. Jalaktʼachivinil por ni lapanakni yu ixtalaqputeʼey ixchivinti. 2Pero chavaycha kintatʼachivinin por isTsʼal. Ni Dios lakʼulal isTsʼal para ixnavin kaval tachun yu alin. Vachuʼ junil isTsʼal ni kamakal ni lakamunukpaʼ kun laktʼiyan. 3La ixjatsukunti ni Jesucristo ox tapulkuy y ancha tasuy ixʼayaxtu ni Dios. Vachuʼ la ixjatsukunti ancha tasuʼojoy tacha junita ni Dios. Ixchivinti lhitʼajun tapʼasta y por yucha taylhaaniy tachun yu alin. Yucha nil para kamalaqmixinikau kintalaqalhinkʼan, ex astan taulchal laktʼiyan la ixlhijakanaj Dios yu ay junita. 4Jesucristo apalay ay val xajantu yu ixmayulnin Dios. Xlhiyucha ni Dios mapaqaʼuy Jesucristo Sasʼatʼa y chuncha masuy ni apalay ay junita. 5Ni Dios jantu aqtaun kajunil qayntaun ixmayul chuncha tacha junil ni Jesucristo: Uxintʼi va keSʼatʼa kʼatʼi. Chavay ikxtaqnincha metsukunti. Vachu jantu aqtaun kalhichivinil qayntaun ixmayul tacha inchineʼ: Kitʼin kajkunaʼ ixPay, yucha kajunaʼ kinTsʼal. 6Vachu tejkan ni Dios malaqachal aniy lakamunukpaʼ Sasʼatʼa yu pʼunaj ixlhiʼalinta, ex naul: Katatoʼoyal tachun ixmayulnin ni Dios. 7La ixchivinti Dios taʼan lhichiviniy ixmayulnin, najun: Ni yuʼuncha Dios jalakmapaxay tus tacha un kataval y vachuʼ tacha jikmi. Yuʼuncha tatapatsaniy tacha ixʼoqxtamatin. 8Pero yu Dios juniy ni Sasʼatʼa: Ni uxintʼi, Dios kʼatʼi, ni mimpalhachimoʼon jantu aqtaun kamiʼoyaʼ mas va tavanancha kaval. Uxintʼi si vas jalhachʼimoʼonun. 9Uxintʼi vamun achʼaniy yu la ox junita y xkʼaʼiy yu talaqalhin. Xlhiyucha ni miDios apalay ay lakʼulatan xajantu yu mintʼaltanan. Chuncha xtaqnitan apalay lhuu achati. 10Vachu junkan Sasʼatʼa: Uxintʼi Jalhachimoʼonu kʼatʼi, tejkan pʼunaj aqtaynil ni lakamunukpaʼ va uxintʼi makʼatʼi xaputayan. Vachuʼ kun mimakaʼ lakmakʼatʼi ni laktʼiyan. 11Tachun yu anuʼ kamiʼoyaʼ pero uxintʼi va tacha kʼaʼalineʼecha. Tachun si kapuchʼiyaʼ tacha laqchʼiti, 12uxintʼi kʼasmiliyeʼe tacha aqxtaun laqchʼiti. Kʼamapʼaxayeʼe kun yu laqsastʼi. Pero uxintʼi jantu aqtaun tʼapʼaxay, yu metsukunti jantu aqtaun kamiʼoyaʼ. 13Vachuʼ Dios jantu aqtaun kajunil matichun ixmayul chuncha tacha junil Jesús tejkan naul: Kʼalhachʼimoʼoncha la kilhijakanaj, tus tejkan klaqmaqalhajaʼoyaʼ tachun mintʼalaxkayan tus kalakʼakchʼintʼamatʼi. 14Yu ixmayulnin Dios tatapatsaniy tacha ixʼoqxtamatin y va espíritus tajunita. Dios jalaqmalaqachay katamil aqtayjunun ni lapanakni yu katalaqtaxtuyaʼ.

will be added

X\