GÁLATAS 6

1Ketʼalaqaunin, incha matichun lapanaki makay tuʼuchun laqtaqal, ex uxiknankʼan yu tʼiʼuyanantʼik kun ni Espíritu Santo kaʼaqtʼayʼutʼik para kaʼostaulchoqol. Pero jantu ay kʼakʼatsʼantʼik tejkan chuncha aqtʼayʼuyatʼik. Ox kʼalhistʼajkʼantʼik para jantu vachu chun kʼalhitʼapʼasatʼik. 2Kʼalaʼaqtʼayʼutʼik kun yu lhitaʼay la metsukuntikʼan ex chuncha kʼamakʼaʼotʼik yu lhinajun la ixlhachimoʼon ni Cristo. 3Incha matichun lhilakan ay lapanaki junita, mas jantu ay kaval va makanukan ixʼaman. 4Taun taun lapanaki maqskʼiniy kamakal kuenta tacha junita ixputsuku kun Dios. Ex chuncha lay ox kakʼatsal por yu makay xʼaman y jantu maqskʼiniy kapastaklhi yu makay aqayntaun. 5Qayntamin lapanaki maqskʼiniy kamakal ixlhitapatsa xʼaman yu paxtoqniy. 6Yu malanikan ixchivinti Dios tsʼanqay katʼaʼul yu ox axtoqnu yu malaninin yu lay kaputapasal la ixjatsukunti. 7Jantu kamakʼanukʼantʼik meʼemankʼan, jantu matichun lay laktuʼuy ni Dios. Tachun yu kachʼantʼi, aqtsʼiyaj va yucha kaxqaʼiyeʼe. 8Incha kachʼantʼi yu jantu ox tacha makaputun valiʼiy lapanaki ex vachu va chun kaxqaʼiyeʼe yu jantu ox yu lhixajachal lhinin. Incha kachʼantʼi yu lhinajun ni Espíritu Santo ex por yucha kaxqaʼiyeʼe jatsukunti yu jantu aqtaun kamiʼoyaʼ. 9Chuncha jantu maqskʼiniy kalaqalhoqoo ixmakaka yu lajʼoxi. Incha ox taylhaʼanau ex astan kalaqaʼiyau ox jaxqanti. 10Xlhiyucha tejkan kalal mas va tavanancha, tsʼanqay kalakmakaniu yu ox tachun ni lapanakni, pero apalay maqskʼiniy ox kalakmakaniu yu kintatʼalhakapuʼanan. 11Kʼamakʼatʼik kuenta ni aniy klatsʼoqnitau la kimakaʼ kun lajʼay letra. 12Ni lapanakni yu laqatapʼasta talhijunan kʼaxvililichʼukʼupʼuxnikʼantʼik va chuncha tamakay vamun para ox katatamakaul kun lapanakni. Va para jantu kalaqmamaqanlqajnivakal tejkan talaqputeʼey yu tapasal ni Cristo nil laka kurus. 13Mas yu talhinajun kʼaxvililichʼukʼupʼuxnikʼantʼik jantu tamakaʼojoy tachun ixlhachimoʼon Moisés. Vamun chuncha talhinajun kʼamakʼatʼik para ay katakʼatsal por yu makʼanikʼantʼik la milakatunajkʼan. 14Pero kitʼin jantu lay ay kajkʼatsal por tuʼuchun, vamun por yu makal kiJalhachimoʼonukʼan Jesucristo laka kurus. Xlhiyucha ni lakamunukpaʼ jantucha xtapal kaval para kitʼin. Va tacha jantucha kaʼalil. Vachu va tacha kaknil ni kitʼin y jantucha kimpaxtoqniy yu jantu ox yu alin lakamunukpaʼ. 15La ketsukuntikʼan kun Cristo Jesús va jantu xtapal kaval mas kaxvililichukʼupʼuxnikau o jantu. Yu maqskʼiniy vamun yu sastʼi jatsukunti. 16Tachun yu chuncha tʼaylhipʼinatʼik oxamaktamin katʼaulatʼik y kʼamapʼaynikʼantʼik. Chuncha kataval tachun ixlapanakni Dios yu tacha sasʼatʼan Israel kataval. 17Chavaycha jantucha apalay iknajun matichun kimaqanchapul. La alin la kilakatunaj taʼan laklhimiu vamun por ixlaqputeʼeka ni Jesús. 18Ketʼalaqaunin, katamapaynin la metsukuntikʼan kiJalhachimoʼonukʼan Jesucristo. Va chuncha kavalcha.

will be added

X\