GÁLATAS 5

1Ex chuncha ni Cristo oxamaktaun kintamakan para oxamaktaun katiʼukxuntayau. Ox katʼaylhipʼintʼik tacha lapanakni yu oxamaktaun tatʼajun, jantu katʼaspʼikchʼoʼotʼik makanan yu lhinaunkan taʼan jalaqnaqpatsakan ni lapanakni. 2Ox kʼamakʼatʼik kuenta yu kitʼin Pablo klajunau. Incha xtʼaqkʼantʼik para kʼaxvililichʼukʼupʼuxnikʼantʼik ex para uxiknan ni Cristo jantu tuʼuchun xtapal kaval. 3Aaqtaun klajunchoqoyau ni taʼayuʼ lapanaki yu xvililichukʼupʼuxnikanta para katalaqtaxtul vachu tsʼanqay kamakaʼol tachun yu lhinajun la ixlhachimoʼon Moisés. 4Lati uxiknan naunatʼik ni Dios ox katalaqtsʼin por kamakʼatʼik yu lhinaunkan, xlhiyucha tʼaxtʼutʼatʼikcha kun Cristo. Ex jantucha tapaxtoqniyan ixjamapayninti ni Dios. 5Pero kijnankʼan ikpakxanʼiyau ni Dios ox kintalaqtsʼinan por yu makay ni Espíritu Santo por kilhakapuʼatkʼan. 6Incha chʼantaun juntau kun Cristo ex jantu maqskʼiniy mas kʼaxvililichʼukʼupʼuxnikʼa u jantu. Yu maqskʼiniy va kalhakapuʼau y chuncha katapatsau kun japaxkanti. 7La ox ixʼukxpʼupʼintʼatʼik. ¿Maticha talaktanchanin para jantucha kaʼalasmaktʼik yu laqsaval? 8Ni jatapastakʼati yu chavay lhitʼaunatʼik jantu kaminchal kun Dios yu tajuntaʼiyan. 9Tacha tanajun: “Mas va tsʼuniy levadura yu kalhiyau xaskititi harina va lhitayaʼojoy tachun.” 10Ox ijkʼatsay ni uxiknan vachu va chun kʼapʼastʼakʼapitik tacha kitʼin. Pero yu talaktʼilhiniyan mijatapastakʼatkʼan yucha Dios kamukʼaniyaʼ maqanlqajnati mas va taʼayucha kaval. 11Ketʼalaqaunin, ni kitʼin klhinajun ni jantucha maqskʼiniy kaxvililichʼukʼupʼuxnikʼa. Xlhiyucha kintaxkayan. Tejkan klhichiviniy yu tapasal laka kurus jantu katalukujlal incha kaknaul ni maqskʼiniy kʼaxvililichʼukʼupʼuxnikʼa. 12Ni anchanu lapanakni yu talaktʼilhiyan y talhijunan para kʼaxvililichʼukʼupʼuxnikʼantʼik, kitʼin iknajun, ¡apalay ox kalakchʼukʼupʼuxniʼokal! 13Ketʼalaqaunin, ni Dios tajuntaʼin para oxamaktaun kʼaʼuntʼik pero mas oxamaktaun untʼatʼik jantu maqskʼiniy kʼamakʼatʼik tacha yu makaputun yu valiʼiy lapanaki. Va kʼalapʼaxkʼatʼik y kʼalaʼaqtʼayʼutʼik. 14Tachun yu lhinaunkan laka lhachimoʼon va lhinaunkan kun taun chivinti, yu najun: “Kapʼaxkʼatʼi mintʼamachaqaʼ vachu va tacha pʼaxkʼakʼan meʼeman.” 15Incha kalamatʼiʼutʼik y kalalakʼatsʼakʼamatʼik ex kʼalhistʼajkʼantʼik para jantu kalalaktʼilhitʼik. 16Va inchine klajunau, ni katʼiʼukxuntʼayatʼik tacha lhinajun ni Espíritu Santo y jantu kʼamakʼatʼik tacha yu makaputun yu valiʼiy lapanaki. 17Yu makaputun yu valiʼiy lapanaki, yucha jantu chʼantaun tʼajun kun yu lhinajun ni Espíritu Santo. Va putʼuy jatapastakʼati tajunita, jantu tapaxtoqniy. Xlhiyucha jantu tsʼuniy lay makʼay yu makʼapʼutʼun. 18Incha ni Espíritu Santo tamaltanayan la milakatinkʼan ex jantucha tapaxtoqniyan kʼamakʼatʼik ixlhachimoʼon Moisés. 19Ox mispakan tacha yu makaputun la ixjatapastakʼati yu valiʼiy lapanaki. Va tatʼatamay yu jantu ixnavinkʼan kataval, talaktuʼunun, tamakay axtoqnu yu jantu lajʼoxi kaval, 20tatoʼoyay dioses yu makakanta laka makaʼ, tachavanan, jatʼalaxkayan talamakay, talachʼapay, talaxiyaxa, talalukujlaniy, laqʼaqspʼuknin, tatalaqlvaʼa, va taun taun talay, 21talaʼakchaʼaniy, jamaqninin, taʼapʼanin, tamakay xakʼatan ay lakvayti taʼan tamaqtaqalhinin y tamakay alati axtoqnu yu chuncha. Klajunchoqoyau vachu va tacha pʼunaj klajuniu: ni lapanakni yu chuncha tataylhaʼan makanan jantu aqtaun katatanuyaʼ taʼan jalhachimoʼonun ni Dios. 22Pero yu laqxtaʼa ni Espíritu Santo yucha va japaxkanti, jaʼachanti, oxamaktaun jamakanan, xtaʼa maqantaulati, qalʼox jamakanan, makaniyan para ox kʼamakʼanin yu alati, para lay kʼalhakʼapʼupʼinikʼa yu naʼun, 23para kʼalalakʼatʼunikʼa, para kʼalhistʼakkʼa yu kʼamakʼatʼi. Jantu intachun alin laka lhachimoʼon taʼan kalhinaunkal yu jantu chun kʼamakʼatʼi. 24Ixlapanakni Cristo juntau. Va tacha maqniʼojoo laka kurus ni talaqalhin yu ixmakaputunau, chuncha jantucha kintapaxtoqniyan kamakau yu jantu maqskʼiniy. 25Incha ni Espíritu Santo kintaxtaqnin ketsukuntikʼan ex vachu maqskʼiniy katijuntayau kun ni Espíritu Santo. 26Jantu maqskʼiniy ay kamakakau, vachu jantu kalamalukujlau, vachu jantu kalaʼakchaʼaniu.

will be added

X\