GÁLATAS 4

1Klajunau ni sʼatʼa yu kamapasanikanaʼ ni ixmaqaliti ixpay, yucha tejkan sʼatʼakaʼ jun taylhaanikan ixlhistakka tacha oqxtamati, mas xaʼukxtin tachun ni chaqaʼ kunaʼ. 2Alin lapanakni yu talhistakʼa ni sʼatʼa y alin yu tamaʼaniy ixtumin tus kalakachil ni julchan tejkan ixpay kanaul ni laycha kamakal xʼaman. 3Vachu chun kijnankʼan tejkan jantukaʼ ixlhakapuʼanau, ex va tacha sʼatʼan ixjuntau y ixmakayau yu ixlhinajun ni lakamunukpaʼ tacha ixʼoqxtamatin kajuu. 4Tejkan lakachil ni julchan yu naul ni Dios ex yucha malaqachal Sasʼatʼa, para kamil jatsukunuʼ kun qayntaun xanati. Tsukul tacha qayntaun yu maqskʼiniy kamakal tacha lhinajun ni lhachimoʼon. 5Chuncha val para kintamalaqtaxtun yu ixlhinaunkan laka lhachimoʼon para kintalaqaʼin ni Dios tacha sasʼatʼan. 6Ex chuncha para katasul ni sasʼatʼan Dios untʼatʼik, yucha tamalaqachanin ixʼEspíritu ni Sasʼatʼa la melhanutkʼan y yucha juniy ni Dios: “KimPay, kimPay kʼatʼi.” 7Ex chuncha jantucha oqxtamatin kʼaʼuntʼik, va sasʼatʼan untʼatʼik. Va sasʼatʼan Dios untʼatʼik, ex xlhiyucha katamapasaniyan ixmaqaliti por yu makal ni Cristo. 8Pʼunaj tejkan jantukaʼ ixmispʼayatʼik Dios, va ixʼuntʼatʼik ixʼoqxtamatin axtoqnuʼ yu jantu laqsaval dioses kataval. 9Pero chavaycha mispʼatʼikcha ni Dios pero apalay ox kaknaul ni Dios tamispan uxiknan. Ex chavaycha, ¿valiʼiycha tʼaspʼikchʼoʼoyatʼikcha taʼan kamakʼachʼoʼotʼik yu lhinajun axtoqnu yu jantu kalhitsukul tapʼasta yu jantu tuʼuchun xtapal kaval? ¿Valiʼiycha chuncha unchʼoʼoyatʼikcha tacha oqxtamatin yu kanaqlhitsʼukʼukʼantʼik? 10Vananaj makʼayatʼik kuenta xajulchan kʼatanaxnan tacha lhinaunkan laka julchan, laka malkuyuʼ, ali laka jachʼitin. 11Tus kilamaqsvayau ni kilhitapatsa va laycha kilamaqatsʼanqaniʼojou yu klamakaniu. 12Ketʼalaqaunin, klatapayniniyau ni va kʼatsʼukʼutʼik tacha kitʼin junita kimputsuku. Tejkan klalaqkilachaʼau kitʼin ikmakakal tacha uxiknan mas jantu israelitas kʼaʼuntʼik. Jantu tuʼuchun kilamakaniu. 13Uxiknankʼan ox kʼatsʼayatʼik ni tejkan skutsaj klalaqkilachaʼau va xaktaqanʼay. Xlhiyucha ancha iktaulal y klalaqputeʼeniu ni ox chivinti. 14Pero ox kilalaqaʼiu y kilalhiʼajiu mas kintaqanʼati la lhitaʼay ixjunita kun kitʼin. Kilalaqaʼiu tacha ixmayul Dios kakval tus va tacha Jesucristo kakval. 15¿Tas ancha makʼatʼik ni achati yu ixlhitʼaunatʼik por kitʼin? Kitʼin ox ijkʼatsay ni ixlal ixmaxtʼunikʼantʼik milaqchulkʼan para ixkilaʼaqtayjuu incha chuncha xaknaul. 16¿Ex chavaycha mintʼalaxkayakʼan kilamakayau vamun por klajunau yu laqsaval? 17Ni anchanu lapanakni yu ixtaʼanachaʼan makanunun ayaj tapastakʼuy por uxiknan pero jantu ox yu tamakaniputunan. Va tapakxanʼiy kalhitʼaxtʼutʼik kun kitʼin para katʼoʼoyatʼik yuʼuncha. 18La ox incha ayaj tʼoʼoyayatʼik yu ox. Pero tsʼanqay chuncha kaval mas klatʼataulau u jantu. 19Kesʼatʼanin ikmaqanlqajnanchoqoy tacha qayntaun xanati yu tsukuy jamaqlaqavan por uxiknan y chuncha iktaylhaanaʼ tus tejkan katʼiʼuntʼayayapitik tacha Cristo. 20La ox ixval va ancha xaklatʼataulau para jantu xaklaxaqalau laqatapʼasta chuncha tacha chavaycha. Chavaycha jantu ijkʼatsay tacha lay klaʼaqtayjuyau. 21Uxiknankʼan yu makʼapʼutʼunatʼik tacha lhinajun ixlhachimoʼon Moisés, ¿jantu aqtaun kʼapʼutʼeʼetʼik tacha najun ancha? 22Ancha tsʼoqkanta ni Abraham lhitsukul qayntʼuy tsʼalan, qayntaun lhitsukunil ixmaqtsukuʼ yu ixnaqpatsay. Yu aqayntaun lhitsukunil yu laqsaval ixanati yu oxamaktaun ixtʼavil. 23Ni tsʼal yu lhitsukul yu maqtsukuʼ, yucha lhitsukukal tacha valiʼiy lapanaki. Pero yu lhitsukul ixanati, yucha tsukul va por Dios naul ni katsukuyaʼ. 24Ni Dios aqtʼuycha chʼantaun jalaktʼatamakaul ixlapanakni, yucha kintamasuniyan ni aniy qayntʼuy xanatin. Yu Agar yucha kintamasuniyan tacha val laka aspajun Sinaí. Ancha Dios chʼantaun jatʼatamakaul kun ixlapanakni para katamakal ixlhachimoʼon Moisés. Yuʼuncha va tacha sʼatʼan yu jalhitsukukan para kalaqnaqpatsakal. 25Yu ixputsuku Agar yucha xajchal tacha ixlhachimoʼon Moisés yu xtaqnikal laka Sinaí ni aspajun yu vil xalakatʼun Arabia. Ni Agar ali yu sasʼatʼan va jalaqnaqpatsakal. Chuncha va tacha ni lapanakni yu chavaycha tavilanal laka putaulan Jerusalén yu tataylhaʼan kun ixlhachimoʼon Moisés. 26Pero ni xaputaulan laktʼiyan yu vachuʼ Jerusalén junkan, yucha va tacha ni xanati yu oxamaktaun vil. Ancha laktʼiyan minchal ketsukuntikʼan y chuncha ni laktʼiyan xajachal tacha kinatikʼan kaval. 27Va tsʼoqkanta la ixchivinti Dios: Uxintʼi yu jantu aqtaun lhitsʼukʼuy sʼatʼa, kʼalhiʼachʼantʼaʼutʼi. Tus kʼalhiʼachʼantʼaʼutʼi mas jantukaʼ lay lhitsʼukʼuy sʼatʼan. Ni xanati yu chavay makauntijlakanta, kaminaʼ julchan tejkan apalay lhuu katajunaʼ sasʼatʼan xajantu ni xanati yu lhitʼajun ixapay. 28Ketʼalaqaunin, kijnankʼan juntau va tacha Isaac istsʼal ni Sara, vachu va chuncha lhitsukukau va por Dios chuncha ixnajunta. 29Ex chuncha kun istsʼalan ni Abraham, qayntaun lhitsukukal tacha valiʼiy lapanaki. Yucha mamaqanlqajnival yu aqayntaun tsʼal yu tsukul por ixtapʼasta ni Espíritu Santo. Vachu va chun tapasay chavaycha. 30Va inchine tsʼoqkanta la ixchivinti Dios: “Kʼatʼinaqxtʼu ni maqtsukuʼ kun istsʼal. Yu istsʼal jantu lay chʼantaun katʼalaqaʼiyaʼ yu kakxtaqniyaʼ istsʼal ni xanati yu oxamaktaun vil.” 31Ex chuncha, ketʼalaqaunin, jantu kajuu tacha sasʼatʼan ni maqtsukuʼ yu ixlaqnaqpatsakan, va kajuu tacha sasʼatʼan yu oxamaktaun ixvil.

will be added

X\