GÁLATAS 2

1Tejkan laqakautʼaticha jachʼitin val, kitʼin aaqtaun ijkilachoqol Jerusalén kun Bernabé y vachu klhaʼal ni Tito. 2Va chuncha kimasunil ni Dios ni kajkʼal. Va klaktʼachivinil xʼamankʼan yu ancha laktoʼoyakan tacha xaʼayan yu talhakapuʼan. Va klakmasunil tacha klaqputeʼeniy ni ox chivinti yu jantu israelitas kataval. Chuncha ikmakal para jantu valiʼiy katsʼanqal tachun kilhitapatsa. 3Ni Tito yu ixkintʼaʼanta jantu kalhijunkal kaxvililichʼukʼunikal tacha talhinajun ni israelitas, mas ixtakʼatsay ni yucha va griego. 4Ancha tatamaqsaqtanuchal lati israelitas yu jantu laqsaval ketʼalaqaunin kataval. Tatamaqsaqtanul para katalaqtsʼil tacha ni Cristo kintamakan oxamaktaun. Ixtamakaputun para kamakachoqoo ixputsukukʼan. Ex chuncha kajuu tacha oqxtamatin yu laqnaqlhitsukukan laka lhitapatsa. 5Pero kijnankʼan ni tsʼuniy jantucha kaklaqxtaqkau para katalhajal. Ex lay ox kataylhaʼal la metsukuntikʼan ni ox chivinti yu laqsaval. 6Ancha ixʼalin yu laktoʼoyakan tacha xalajʼayan, mas kitʼin jantu ikmakay kuenta va taʼayucha kaval. Ni Dios va mustaun jamakay ni lapanakni. Pero ni anchanu lapanakni jantu kintamasunil aputaun chivinti yu maqskʼiniy kaklaqputeʼel. 7Va la ox talhilal yu ikmakay, va takʼatsal ni Dios ixkimaqxtaqnita lhitapatsa para kaklaqputeʼenil ni ox chivinti yu jantu israelitas kataval. Vachu va chun tacha ni Pedro ixlhimaqxtaqnikanta kalaqputeʼenil yu israelitas. 8Ni Dios xtaqniy tapʼasta ni Pedro para kamalaqachakal laqputeʼeni taʼan tavilanal ni israelitas. Vachu kixtaqniy tapʼasta ni kitʼin para kakmalaqachakal laqputeʼeni taʼan tavilanal yu alati lapanakni. 9Yu Jacobo ali Pedro ali Juan, yu ancha laktoʼoyakan tacha xalajʼayan, yuʼuncha takʼatsal ni va Dios kimaqxtaqnil ni aniy lhitapatsa por ixjamapayninti. Ex xlhiyucha kintamaktuntajin kitʼin kun Bernabé tacha ox ketʼalaqauninkʼan. Va chʼantaun ikmakau kijatapastakʼatkʼan para kijnankʼan kajkʼau tapatsanin kun yu jantu israelitas kataval y yuʼuncha katataylhaanil ixlhitapatskʼan kun yu israelitas. 10Vamun kintajunin kajkalakpastakvi para kaklaqʼaqtayjuu yu kilpatanin. Va yucha yu xakmakaputunta kitʼin kun tachun la kiʼachati. 11Astan tejkan xakvil laka putaulan Antiokía vachu chinchal ni Pedro. Ex kitʼin klaqʼaymal la ixlakaʼukxpu. Va taun laqtaqal yu ixtʼajun makan. 12Tejkan tachil lati ixlapanakni ni Jacobo ex Pedro aqtayl jalakmakauntijlay yu jantu israelitas kataval. Jantucha apalay chʼantaun kalaktʼavayl mas pʼunaj ixjalaktʼavajin. Ni israelitas yu ixtalhinajun kaxvililichʼukʼunikʼa, yuʼuncha ixtanajun ni jantu maqskʼiniy kalaktʼavay. Ex Pedro ixlaktalhauniy. 13Yu alati israelitas ancha vachu tʼuy ukxpuʼ tamakal tacha makal ni Pedro. Mas kaval Bernabé vachu jalaqtsʼiʼil y tʼuy ukxpuʼ makal. 14Pero kitʼin klaqtsʼil ni jantu ox ixtamakay yu masuy ni ox chivinti yu laqsaval. Ex kunil ni Pedro la ixlakaʼukxpukʼan tachun ni lapanakni, va iknaul: “Uxintʼi, mas va israelita kʼatʼi tʼiʼukxuntʼayay tacha yu jantu israelitas kataval. ¿Ex chavaycha valiʼiycha naʼun yu jantu Israelitas kataval maqskʼiniy katamakal xaputsuku ni Israelitas?” 15Kijnankʼan tus ikpupaqvi kilhiʼisraelitakʼan y jantu kakpupaqvi tacha yu alati lapanakni yu lakjunau jamaqtaqalhinin. 16Pero mas chuncha kuntau vachu klhakapuʼanau ni Cristo para ox kintalaqtsʼin ni Dios. Jantucha klhakapuʼanau va por ixlhachimoʼon Moisés ox kintalaqtsʼin ni Dios. Dios jantu matichun ox laqtsʼin incha vamun por kamakal yu lhinaunkan laka lhachimoʼon. 17Va lakxkauyau ni ox kintalaqtsʼin ni Dios por yu makal Cristo. Ex chuncha chʼantaun juntau kun yu alati lapanakni yu jalakjunau jamaqtaqalhinin. Chuncha lhixajachal lati lapanakni talhilay ni Cristo va kintamakayan maqtaqalhinin. Pero jantu laqsaval kaval. 18Incha kitʼin iktaspʼikchoqoy ni anchanu xaputsuku ex kintaukʼaniyachal laqtaqal. Va tacha kakmakachoqoputul aqataun chaqaʼ yu klaktʼilhil. 19Va tacha kaknilcha, xlhiyucha jantucha kimpaxtoqniy yu lhinaunkan laka lhachimoʼon. Ex chuncha lay kaktsukul kun jatsukunti yu minchal kun Dios. 20La ketsukunti va chʼantaun iktʼaxtukmukʼakanta kun Cristo. Jantucha kitʼin kaktsukul la ketsukunti, va Cristo yu tʼajun la ketsukunti. Yu jatsukunti yu chavay klhitʼajun va por klhakapuʼan Sasʼatʼa Dios. Yucha kiʼachanil y maqxtaqkal para kanil por kitʼin. 21Chuncha jantu klaktanchay ixjamapayninti ni Dios. Incha matichun lhiʼajin kamaxtunikal ixlaqtaqal por kamakal yu lhinaunkan laka lhachimoʼon, ex chuncha ni Cristo va tacha jantu por tuʼuchun kaval mas nil.

will be added

X\