EFESIOS 4

1Kitʼin ktachʼin kunita por klaqltapatsay kiJalhachimoʼonukʼan. Chavaycha klatapayniniyau ni katʼiʼuntʼayatʼik makanan yu tapaxtoqniyan tacha talakʼulanin Dios y tajuntaʼin. 2Kʼamalakʼatʼunikʼantʼik la metsukuntikʼan y lajqalʼoxin kʼaʼuntʼik, ox kʼalamaʼantʼaqnitʼik kun japaxkanti. 3Kʼatʼapʼasnitʼik para chʼantaun kʼaʼuntʼik tacha tamakanin ni Espíritu Santo para oxamaktaun katʼiʼuntʼayatʼik. 4Va taun lakatunaj juntau y vachu va taun Espíritu lhitʼaunau, vachu chun tacha ni Dios tajuntaʼin para va putaun kʼapʼakxanʼitʼik. 5Va taun ni Jalhachimoʼonuʼ junita y va putaun ni lhakapuʼati y va taun ni aqchajʼauti. 6Va taun ni Dios yu kimPaykʼan junita kintachunkʼan. Yucha lhichimoʼojoy tachun yu alin y alinʼojota talakaʼakchun y vachu alinʼojota la metsukuntikʼan. 7Pero kijnankʼan mapaynikau qayntamin por qayntamin chuncha tacha naulcha ni Cristo ni kintaxtaqnin yu lay putapatsayau. 8Va tsʼoqkanta inchineʼ: Tejkan pataxtul talman ex jalaqmaqalhajaʼol tachun yu ixtaxkajiy y taxajchal tacha tachʼinin, ex chuncha jalaqxtaqnil lhacheʼevan ixlapanakni. 9¿Valiʼiycha najun ni pataxtul talman? Yu aniy naunputun ni pʼunaj kitanul taʼan pulman lakatʼun. 10Yu kilachil aniy lakatʼun va yucha yu pataxtuchoqol para apalay ay kaval ke tachun yu alin laktʼiyan, ex chuncha kun yucha kaʼaqtsaunʼol tachun yu alin. 11Por qayntamin kintaxtaqnin ni lhitapatsa yu kintapaxtoqniyan. Lati jalakʼulakal para kataval ixjamalaqachanti Cristo, lati para katalaqputeʼel ixchivinti Dios, lati para katamasul yu ox chivinti, lati para katalhistaklhi yu talhakapuʼan, y lati para katamalaninil. 12Chuncha makal para jantu tuʼuchun katatsʼanqanil ixlapanakni para katatapatsanil y chuncha katalhaval ixlapanakni. Yuʼuncha tacha ixlakatunaj Cristo tajunita. 13Chuncha kataylhaʼal tus tejkan chʼantaun kajunʼoyau la kilhakapuʼatkʼan y chʼantaun kamispaʼoyau Sasʼatʼa Dios. Va tacha qayntaun kajuu yu jantu tuʼuchun tsʼanqaniy tus kalaqentsaʼojou para kalhitsukuʼojoo tachun ixʼoxixtu ni Cristo. 14Ex chuncha jantucha kajuu tacha sʼatʼan, yu tatapuchoqotsukuy y jalaklhilhaankan ataklhun la ixjatapastakʼatkʼan. Chuncha tapasay tejkan jalakmalanikan aputaun chivinti. Jalakmakanukan taʼan taʼalin lapanakni yu ayaj talhitʼajun ixpamakanunkʼan. 15Tsʼanqay kataylhaʼau makanan yu laqsaval kun lhuu japaxkanti, chuncha kaʼaynʼau la ketsukuntikʼan tus kachaʼau tacha Cristo yu xaʼaqtsul junita tachun yu lhakapuʼanau. 16Vamun por Cristo tatapatsay ixlapanakni. Va tacha lakatunaj yu ox laqxtoqnun, ox takilnunun taʼan talachʼapata taʼan putapasay yu lhaʼan tapʼasta. Tejkan talakaʼakchun ni lakatunaxnan ox tapatsay ex ox ajin tachun ni lakatunaj kun lhuu japaxkanti. 17Chuncha klalhijunau kun kiJalhachimoʼonukʼan Jesús ni jantucha katʼiʼukxuntʼayatʼik tacha alati yu jantu israelitas kataval yu jantu tamispay Dios, yu tataylhaaniy makanan tacha ixjatapastakʼatkʼan yu jantu xtapal kaval. 18Yuʼuncha talhitʼajun jatapastakʼati tus tacha kaputsʼislhi la ixjatsukuntikʼan, jantu tamispay ni jatsukunti yu xtaʼa Dios. Jantu tuʼuchun tamispay va por pʼays tamakay ixjalhanutkʼan. 19Yuʼuncha tus jantu tuʼuchun talhimaxanan la ixjatapastakʼatkʼan. Vamun tatamaqxtaʼa para katamakal talaqalhin y tatiʼukxuntayay makanan tachun yu jantu ox kun achati. 20Pero uxiknankʼan jantu chun kʼalanitʼik tejkan mispʼatʼik ni Cristo. 21Laqsaval asmaktʼatʼikcha yu lhichiviniy Cristo y tejkan ixtʼanumanantʼik kun yucha ex lanitʼik yu laqsaval chivinti yu minchal kun yucha. 22Yu mimputsukukʼan yu ixlhitʼaunatʼik maqancha yu tacha ixpʼutʼiʼukxuyanantʼik, chavaycha maqskʼiniy kamakʼauntʼijlatʼikcha. Ni anchanuʼ putsuku va tacha taun tuʼuchun yu niman puchʼiy y va xʼaman makanukan por yu makaputun. 23Kʼalasastʼikʼantʼikcha la mijatsukuntikʼan kun mijatapastakʼatkʼan. 24Kalhilakʼatʼayatʼikcha yu sastʼi jatsukunti yu paxtoqniy kun Dios. Ex chuncha kʼalhitsʼukʼutʼik yu laqsaval jatsukunti yu vas junita y ox alin kun Dios. 25Xlhiyucha klajunau ni jantucha kʼalaklkʼanantʼik. Aqstanchunin ox vas kʼalaxaʼalatʼik kun tachun mintʼamachaqankʼan porke va taun lakatunaj laqxtoqnunau. 26Tejkan tʼalʼaunatʼik jantu kʼamakʼatʼik talaqalhin, jantu kʼaxtʼaqkʼantʼik kataqmaqal milhilukujkʼan tus kapuʼanchal ni julchan. 27Jantu kʼaxtʼaqnitʼik lakatin ni aqmoqxnuʼ. 28Taʼayuʼ yu ixʼalhavanan jantucha kaʼalhavanal, va kamakal lajʼox lhitapatsa kun ixmakaʼ para chuncha kalhitsukul axtoqnuʼ yu lay kalaktʼaʼul yu tatsʼanqaniy. 29Jantu kakʼiltʼaxtʼutʼik laqxtoqnuʼ chivinti. Kachʼivinintʼik chivinti vamun yu lajʼox yu lay kʼapʼuʼaqtʼayʼutʼik yu tamaqskʼiniy para katamaʼachajul yu taqasmatʼa. 30Jantu kamamaʼanixvatʼik ixʼEspíritu Santo ni Dios. Yucha xtʼaqnikʼantʼik para katʼasutʼik ni va laqsaval ixlapanakni kʼaʼunapitik ni anchanu julchan tejkan kintamalaqtaxtuyan. 31Kʼamakʼauntʼijlaʼotʼikcha tachun yu tus lhitsʼisiti laqtsʼinkan, jantucha kʼalukʼujlatʼik, jantucha katʼalʼauntʼik, jantucha kʼamakʼatʼik lhilukuj, jantucha kakʼiltʼayanantʼik, jantucha kʼalaxkʼaytʼik. 32Va lajqalʼoxin kʼaʼuntʼik, kʼalhitsʼukʼutʼik jamapayninti aqstanchunin siya uxiknan y kʼalamalaqmixinitʼik chuncha tacha Dios tamalaqmixinin uxiknankʼan por Cristo.

will be added

X\