EFESIOS 2

1Yu uxiknan va tacha ixnitʼatʼikcha la metsukuntikʼan por mintalaqalhinkʼan ali milaqtaqalkʼan. 2Chuncha ixtʼiʼukxuyanantʼik y ixtʼaylhipʼinatʼik xatin aniy lakamunukpaʼ tacha lhinajun xaʼukxtin ni aqmoqxnuʼ yu takyautʼajun taʼakchun ni lakamunukpaʼ. Ni anchanuʼ espíritu va yucha yu jalakmapʼasniy ni lapanakni yu jantu taqalasmatʼa Dios. 3Tacha yuʼuncha tajunita vachu chun ixtiʼukxuyanau ni kintachunkʼan. Ixmakayau tacha tamakay yu valiʼiy lapanakni, ixmakayau yu ixlhinajun kilakatunajkʼan ali kijatapastakʼatkʼan. Chuncha ixkintapaxtoqniyan kalaqaʼiu ixlhilukuj ni Dios vachu tacha yu tapaxtoqniy tachun yu alati. 4Pero Dios yucha la ay ixjamapayninti y ayaj kintapaxkayan. 5Xlhiyucha kintamajkujuchoqon chʼantaun kun Cristo mas ixnitaucha la ketsukuntikʼan por kintalaqalhinkʼan. Laqtaxtutaucha por ixjamapayninti. 6Kintamajkujuchoqon chʼantaun kun Cristo y chʼantaun kintatʼaʼulan laktʼiyan. 7Chuncha makal para katasul mas va tavanancha ni va la ay ixjamapayninti yu kintalhipaxkayan por yu makal ni Cristo Jesús. 8Va tamapaynin y xlhiyucha pʼulaqtʼaxtʼutʼatʼik milhakapuʼatkʼan. Jantu va meʼemankʼan kʼalaqtʼaxtʼutʼik, va ixlhacheʼevan ni Dios. 9Jantu lay kʼapʼulaqtʼaxtʼu por yu kʼamakʼatʼi, xlhiyucha jantu matichun lay ay makakan. 10Dios kintamakan. Va chʼantaun kun Cristo juntau xlhiyucha kintamakan para kamakau yu lajʼox yu maqancha laksaklhi Dios para chuncha kaputiʼukxuntayau. 11Kapʼastʼaktʼik ni uxiknankʼan yu jantu israelitas kʼaʼuntʼik, va jantu ixlapanakni Dios ixʼuntʼatʼik porke chuncha pʼutsʼukʼutʼik. La milakatunajkʼan jantu kaxvililichʼukʼupʼuxnikʼantʼik, xlhiyucha jantu ox ixtalaqtsʼinan ni israelitas yu jalakxvililichukʼunikanta la ixlakatunajkʼan. 12Kʼapʼastʼaktʼik ni exnicha jantu ixlhitʼanumanantʼik kun Cristo, y jantu ixlhitʼanumanantʼik kun xalapanakni Israel. Chuncha jantu katapaxtoqnin kalaʼaʼitʼik ni lhacheʼevan yu Dios jalakjunil kalaqxtaqniyaʼ ixlapanakni. Ixtʼiʼukxuyanantʼik lakamunukpaʼ. Jantu ixpʼakxanʼiyatʼik yu ox y jantu ixmispʼayatʼik Dios. 13Chavaycha chʼantauncha untʼatʼik kun Cristo Jesús. Mas pʼunaj maqati ixtʼaunatʼik kun yucha pero chavaycha ni Cristo tamaʼukstsʼunitan por ixjakʼalna. 14Ni Cristo va yucha kintamaʼoxamaktamin. Yu oqxlaqtʼuy ixjuntau, ni israelitas kun yu jantu israelitas kataval, va taun lapanaki kintamakan. Lakpujʼol yu ixkintapulvaqyan yu ixmakay para tʼalaxkaynin kajuu. 15Chuncha makal ni Cristo tejkan nil la ixlakatunaj para jantucha kintapaxtoqnin ixlhachimoʼon Moisés kun yu ancha ixlhinaunkan. Chuncha makal para va oqxlaqtauncha kintamakan para jantucha kalaxkajiu. 16Chuncha val para ox kalalaqtsʼiu kun Dios ni kijnankʼan y tacha taun lakatunaj kajuu yu oqxlaqtʼuy ixjuntau. Chuncha val por yu makal laka kurus y chuncha pumamiʼonil yu laxkayati. 17Yucha kintakilaqputeʼenichin yu ox chivinti yu masuy tas laycha ox kalalaqtsʼiu kun Dios mas uxiknan yu maqati ixtʼaunatʼik kun Dios y vachuʼ kijnan yu israelitas yu ukstsʼuniy xaktʼaunau. 18Va chʼantaun juntau kun Cristo xlhiyucha ni Espíritu Santo va aqstanchunin kintaʼaqtayjuyan kataʼukstsʼuniu kun kimPay Dioskʼan mas va oqxlaqtʼuy ixjuntau. 19Pʼunaj jantu lay ixtʼanuyatʼik kun ixlapanakni Dios, jantu chʼantaun ixʼuntʼatʼik. Pero chavaycha vachuʼ tapaxtoqniyan tachun yu tapaxtoqniy ixlapanakni ni Dios, va tacha lakataun machaqan untʼatʼik kun kijnan. 20Tus tacha aqataun chaqaʼ makʼakʼanatʼik y tacha kʼapʼutʼayatʼik ixchivintikʼan ni lapanakni yu jalaqmalaqachal ni Jesucristo kun yu alati yu talaqputeʼey ixchivinti Dios. Ni Cristo Jesús va tacha yu xapʼunaj chiyux yu tanʼajvil yu ox puyal xamatau. 21Por yucha ni kijnan va tacha aqataun chaqaʼ yu ox talachʼapata y chuncha taʼayaʼan. Chuncha kajuu tacha taun lakatajtan yu ixnavin ni Jalhachimoʼonuʼ Dios. 22Ex chuncha uxiknan yu tʼanumanantʼik kun Cristo va chʼantaun makʼakʼanatʼik kun kijnan tacha aqataun chaqaʼ taʼan vil ni Dios por yu ixʼEspíritu Santo.

will be added

X\