EFESIOS 1

1Kitʼin kPablo ixtamalaqachan Jesucristo va por chuncha naul ni Dios. Klamastakʼayau ni uxiknankʼan yu vilanantʼik laka putaulan Éfeso yu ixnavin Dios untʼatʼik yu ox tʼaylhipʼinatʼik lhakapuʼanan chʼantaun kun Cristo Jesús. 2Katamapaynin yu ox y katamalakaʼulan ni kimPay Dioskʼan kun kiJalhachimoʼonukʼan Jesucristo. 3Ay kamakakal ni Dios yu ixPay kiJalhachimoʼonukʼan Jesucristo. Ni yucha kintamalaqachanitan tachun yu ox yu alin laktʼiyan para ketsukuntikʼan ni kijnan yu ukxuyanau chʼantaun kun Cristo. 4La maqancha tejkan jantukaʼ ixmakakan ni lakamunukpaʼ, vananaj exnicha ixkintalaksaktancha ni va chʼantaun ixjuu kun Cristo para vamun yuʼ ixnavin kajuu y jantu kintamukʼanin kilaqtaqalkʼan. Kintapaxkan 5y xlhiyucha la maqancha ixnajunta kintamakayan sasʼatʼan por yu makal Jesucristo porke chuncha ixʼachaniy ixmakal. 6Va chuncha ay kamakakal ni Dios por yu ay ixjamapayninti yu kintaxtaqnin por ixjatsukunti istsʼal yu apalay achaniy. 7Ni kijnankʼan yu lhitanumanau kun Cristo va kintamalaqtaxtun por mapalal kun ixjakʼalna. Xlhiyucha kintamalaqmixiniyan kintalaqalhinkʼan por yu ay ixjamapayninti. 8Kintalalhavanin ixjamapayninti y kintaxtaqnin tachun jatalaniti ali jatapastakʼati. 9Kintamamispanin yu maqancha ixpastakʼa kamakayaʼ. Jantu ixmispakan pʼunaj pero ox lhilal kintamamispan yu ixmakaputunta kun Cristo. 10Ex tejkan kaminaʼ ni anchanuʼ julchan va katapasayaʼ tachun yu ixnajunta ixmakal. Kamaqxtoqniʼoyaʼ la ixpalhachimoʼon ni Cristo tachun yu alin, kaval laktʼiyan kaval lakamunukpaʼ. 11Va por Cristo kintapaxtoqniyan yu lajʼoxi yu tapaxtoqniy sasʼatʼan Dios. Ni yucha la maqancha ixlhilkamaʼatachal ni kijnan yu kintalaksaknitan. Va chuncha ixnajunta kamakal y vamun yuʼ lay makay tachun yu yucha najun. 12Chuncha makal para ay kamakakal ni Dios la ketsukuntikʼan ni kijnan yu pʼunaj ixpakxanʼitau yu kalaqaʼiu kun Cristo. 13Tejkan uxiknan vachu asmaktʼik yu laqsaval yu ox chivinti yu pʼulaqtʼaxtʼutʼik ex va lhakʼapʼupʼintʼik. Ex por chʼantaun untʼik kun Cristo, ni Dios va taxtaqnin ni Espíritu Santo yu naul ni laqsaval kaxtaqyaʼ para kaseyolakʼantʼikcha la milhitsukunukʼan. 14Xtaqnikantaucha ni Espíritu Santo para kapukʼatsau ni Dios laqsaval kintaxtaqniyan yu paxtoqniy sasʼatʼan. Kintaxtaqniyan tejkan kalaqchaanacha ni anchanuʼ julchan para katalaqtaxtuʼol ixlapanakni yu laksaklhi. Ex chuncha katoʼoyakanaʼ por ixʼoxixtu. 15Kintajunin ni ox lhakʼapʼupʼinatʼik kiJalhachimoʼonukʼan Jesús y vachu ox jalakpʼaxkʼayatʼik ixlapanakni Dios tus chavaycha. 16Xlhiyucha jantu ijkastaknan ixtaqnika lhimalaqpuchuncha ni Dios por uxiknan, va si klapastakʼau tejkan kskʼin Dios. 17Ktapayninin ni Dios yu ixPay kiJalhachimoʼonukʼan Jesucristo, vamun yu ay jaPay junita. Va kskʼin para kataxtaqnin jatapastakʼati yu minchal kun ixʼEspíritu para kʼamalaʼasitʼik yu kintamasuniyan Dios para apalay ox kamispʼatʼik. 18Vachu kskʼiniy Dios katamasunin yu tsʼanqay la melhanutkʼan para katapulkuʼol mijatapastakʼatikʼan. Chuncha kʼamispʼayapitik yu ox junita yu pʼakxanʼiyatʼik yu talhijuntaʼin ni Dios. Ex kʼamispʼayapitik yu ayaj ay maqaliti yu kalaqxtaqniyaʼ ixlapanakni. 19Vachuʼ kʼamispʼayapitik yu ay ixtapʼasta, yu jantu alin taʼan katamaktal, yu kintaʼaqtayjuyan ni kijnankʼan yu lhakapuʼanau. Ni anchanu ay tapʼasta va yucha yu putapatsay ni Dios. 20Ni anchanu tapʼasta va yucha yu pumajkujuchoqol ni Cristo tejkan ixnitacha y lhiʼulal la ixlhijakanaj ancha laktʼiyan. 21Chuncha ni Cristo va apalay ay junita xajantu tachun ni jalhachimoʼonun ali machʼalkʼakni ali yu lajʼay ukxtinin laktʼiyan ali yu ancha talhitʼajun tapʼasta. Chuncha vachuʼ apalay ay katoʼoyakanaʼ ixtaqaʼuti xajantu tachun yu lay lhimapaqaʼukan, mas va yu aniy lakamunukpaʼ mas va yu kaʼalinakaʼ. 22Ni Dios maqxtaqniʼol la ixtamakaʼ ni Cristo tachun yu alin y vachuʼ jamaqxtaqnil tachun ixlapanakni yu talhakapuʼan para yucha xaʼaqtsul kaval. 23Yu ixlapanakni ni Cristo va ixlakatunaj tajunita y chuncha taqayntsaycha ni yucha y Cristo laqentsaʼojoy tachun yu alin.

will be added

X\