COLOSENSES 2

1Va knajun kakʼatsʼatʼik ni la pʼays iktapatsay por uxiknankʼan ali yu tavilanal laka putaulan Laodicea y por tachun ni lapanakni yu talhakapuʼan yu jantukaʼ taks kintalaqtsʼin. 2Chuncha iktapatsay para kalaksastʼinikal ixjalhanutkʼan y chʼantaun katalapaxkal para jantu tuʼuchun katsʼanqal la ixjatapastakʼatkʼan. Vachu ayaj iktapatsay para chuncha lay katamalaqasil ni anu chivinti yu kimPay Dioskʼan ixmaqsaqta yu lhichiviniy Cristo. 3La ixjatsukunti ni Cristo alin tachun yu apalay ixlaqmiti yu jatapastakʼati kun yu jatalaniti. 4Chuncha klajunau para jantu matichun katamakanun mas va qalʼoxicha kachivinil pero jantu laqsaval yu najun. 5Mas jantu klatʼataulchaʼau la kilakatunaj pero la kijatapastakʼati va tacha klatʼataulchaʼau chʼantaun kun uxiknan. Va klhiʼachantajuy ni ijkʼatsay va chʼantaun untʼatʼik y la pʼays lhakʼapʼupʼinatʼik ni Cristo. 6Chuncha tacha tejkan laʼaʼitʼik ni Cristo Jesús miJalhachimoʼonukʼan, chuncha katʼiʼukxuntʼayatʼik chʼantaun kun yucha. 7Chʼantaun kun yucha kʼaʼuntʼik, ox katʼaylhipʼintʼik kun yucha. Kʼatʼapʼasnitʼik milhakapuʼatkʼan chuncha tacha tamasunitan. Chuncha apalay katalhaval milhakapuʼatkʼan y va si kaxtʼaqnitʼikcha lhimalaqpuchuncha ni Dios. 8Kʼalhistʼajkʼantʼik para jantu matichun katalhimakanun por yu talaniy ixlaqʼamankʼan, por chivinti yu tacha lajʼoxi kaval pero jantu laqsaval. Yucha vamun ixputsukkʼan lapanakni ali xajatakpastakʼati aniy lakamunukpaʼ. Jantu chʼantaun kataval kun Cristo. 9Tachun yu Dios junita va la ixlakatunaj ni Cristo alinʼojota. 10Va por Cristo lhitʼaunʼoyatʼik tachun yu maqskʼiniy. Yucha va xaʼaqtsul tachun yu lhachimoʼonun ali tachun yu talhitʼajun tapʼasta laktʼiyan. 11Uxiknan va tacha kʼaxvililichʼukʼupʼuxnikʼantʼik yu talaqalhin la metsukuntikʼan. Jantu valiʼiy lapanaki kaval yu taxvililichukʼupʼuxnin. Va Cristo yu taxvililichukʼupʼuxnin. 12Tejkan aqchʼajʼautʼik va tacha katʼaʼaknutʼik chʼantaun kun yucha. Lhakʼapʼupʼintʼik ni Dios yu majkujuchoqol la ixlhinin. Xlhiyucha va tacha tʼatʼakʼukchʼoʼotʼik chʼantaun kun yucha. 13Tejkan jantukaʼ ixakʼanikʼanatʼik mintalaqalhinkʼan, va ixtʼiʼukxuyanantʼik laka lhinin. Ex ni Dios taxtaqnin sastʼi jatsukunti y tamalaqmixinin mintalaqalhinkʼan. 14Ixʼalin yu ixlhaaniyau por jantu ixmakayau yu ixlhinaunkan, pero yucha malaqmixiʼol. Va tacha aqxtaun jalhiki taʼan istsʼoqmulakanta kilhaanintikʼan. Yucha maxtul y xtukmukʼal laka kurus. 15Va lakmaxtuniʼol ixtapʼastkʼan ni xaʼukxtinin lakamunukpaʼ ali yu talhachimoʼonun y jalakmalakatʼunil. Laka kurus ni Cristo jalaqmaqalhajal, ex va tacha jalaqmaqalchoqonil tacha tachʼinin. 16Xlhiyucha jantu matichun lay tamukʼaniyan laqtaqal por yu uyatʼik ali yu oqyatʼik. Vachu jantu lay tamukʼaniyan laqtaqal por yu talhinajun israelitas xakʼatanax, por yu talhinajun tamin malkuyuʼ, o por yu lay kʼamakʼatʼi xajulchan jastaknati. 17Yu anchanu ixlhinaunkan yu tasul pʼunaj va tacha ixmaqtsʼansilaqa ni Cristo yu ixminta, pero yu laqsaval maqskʼiniyatʼik vamun ni Cristo. 18Jantu kʼamakʼauntʼik katamakanun y katamaxtunin milhilhajatkʼan anchanu lapanakni. Yuʼuncha va tacha lakstʼuniy lakmakakan y vachuʼ tatoʼoyay angeles. Yuʼuncha vamun talhichiviniy yu jantu laqsaval katalaqtsʼil y lajʼay jalakmakakan ixlaqʼamankʼan. Tapastaknan tacha valiʼiy lapanakni. 19Yuʼuncha jantu chʼantaun tatʼajun kun Cristo. Ni yucha xaʼaqtsul yu lhakapuʼanau, kijnan va ixlakatunaj. Yucha kintaxtaqniyan tapʼasta y Dios makay para kaʼaynlhi kilhakapuʼatkʼan. Va tacha taun lakatunaj ajin tejkan ixjasivikna malakatanuy tapʼasta y ox laqxtoʼa taʼan talachʼapata. 20Uxiknankʼan va tacha kʼanitʼik chʼantaun kun Cristo xlhiyucha jantucha talhichimoʼoyan xaʼukxtinin aniy lakamunukpaʼ. ¿Valiʼiycha tʼaunatʼikcha tacha vananaj katalhichimoʼon yu xaʼukxtinin aniy lakamunukpaʼ? 21Yuʼuncha tanajun: “Jantu kachʼapʼa yu aniy, jantu kʼaʼutʼi yu anuʼ, jantu klakchʼapʼa yu avintʼi.” 22Tachun yu chuncha lhinaunkan va lhichiviniy yu niman tatantsiniy tejkan kʼaʼutʼi. Ni anchanu va yu talhinajun y tamalaninin yu valiʼiy lapanakni. 23Ni anchanu chivinti lhijunticha ox jatapastakʼati y lhijunticha laqsaval ox para katoʼoyau Dios y para kamalakatʼunikau y para laqatapʼasta kalhistakvi kilakatunajkʼan. Pero ni anchanu chivinti jantu kintaʼaqtayjuyan para kamakajuu yu talaqalhin yu makaputunau.

will be added

X\