LOS HECHOS 8

1Ni Saulo ayaj ox lhilal por tamaqnil ni Esteban. Ex ni anchanu julchan aqtaynil pʼays laqmamaqanlqajnivakan tachun yu ixtalhakapuʼan ni Jesús yu ancha ixtavilanal Jerusalén. Tus taqosʼol y taʼanʼolcha taulnin taʼakapuchun xalakatʼun ni Judea ali Samaria. Tatamakaul vamun yu jamalaqachal ni Jesús. 2Lati lapanakni yu ox ixtalhakapuʼan va tamaknul ni Esteban, va pʼays talhiqalhul. 3Pero ni Saulo aqtayl laqlhimaqchapuy yu ixtalhakapuʼan ni Jesús. Ixtanuy jachaqan por jachaqan, ixjalaqxaqaxtuy joʼakna kun xanatin para kalakmanul laka pachʼin. 4Ex chuncha ni lapanakni yu taqosnunchal Jerusalén mas va toʼoxtaycha taʼan ixtapuʼan va si ixtalaqputeʼey yu lay katapulaqtaxtul ni lapanakni. 5Qayntaun yu ixjunkan Felipe, yucha al lakataun xaputaulan Samaria y aqtayl lhichiviniy ni Cristo. 6Lhuu lapanakni ixtaʼaqxtoqnun y ixtalaqtsʼin yu lajʼay axtoqnuʼ yu ixmakay ni Felipe. Va ox ixtasuy ni laqsaval yu ixnajun. Xlhiyucha ox tamakal kuenta yu ixlaqputeʼey. 7Qaynlhuu lapanakni palay tajunchoqol yu ixtalhitʼajun jantu ox espíritus la ixlakatunajkʼan. Si pʼays ixtalaktʼasay ni jantu ox espíritus tejkan ixtataxtuchoqoy la ixlakatunajkʼan. Vachuʼ qaynlhuu lapanakni yu ixtalakanita kun alati yu jantu lay ixtaltanan va si palay tajunchoqol. 8Xlhiyucha tachun si talhiʼachantajul yu ixtavilanal ni anchanu laka putaulan. 9Ancha ixʼalinta qayntaun jachavanaʼ yu ixjunkan Simón y tachun ni lapanakni si lakmakanul. Vachuʼ ixkilhuntsukuy ni yucha ma vamun yuʼ ay lapanaki ixjunita. 10Tachun ni lapanakni lajʼay kun lakstʼuniy si talhakapuʼanil yu ixnajun ni yucha. Si ixtanajun: —Yu aniy lapanaki yucha va yu la ay ixtapʼasta Dios junita. 11Ox ixtamakaniy kuenta yu ixnajun porke maqancha ixtʼajun jalakmakanun por ixjachavanti yu ixmakay. 12Pero tejkan chinchal ni Felipe va jalakjunil tacha lhachimoʼonun ni Dios y lhichivinil ni Jesús yu ixtanajunta kamalaqachayaʼ Dios ex talhakapuʼal y taʼaqchajʼaul joʼakna kun xanatin. 13Ex chuncha ni Simón vachuʼ lhakapuʼal y aqchajʼaul. Yucha tus vak kʼatsal tejkan laqtsʼil yu lajʼay axtoqnuʼ yu ixmakay ni Felipe yu ixmasuy ixtapʼasta ni Dios y xlhiyucha aqtayl tʼatiʼukxuntayay ni yucha. 14Ex ancha Jerusalén yu jamalaqachal ni Jesús va takʼatsal va ixtalhakapuʼanta ixchivinti Dios lati yu tavilananchal Samaria. Ex chuncha tamalaqachal ni Pedro ali Juan para kataʼal ancha Samaria. 15Tejkan tachaʼal va taskʼinil Dios para katalaqtanuʼol ni Espíritu Santo ni lapanakni yu ancha ixtavilanal. 16Ni yuʼuncha ixtaʼaqchajʼajutacha la ixtaqaʼuti ni Jesús, pero jantukaʼ ixtalaqtanuy ni Espíritu Santo. 17Ex ni Pedro ali Juan tamoqslanil ixmakakʼan yu ixtalhakapuʼanta y va chuncha talaqtanuʼol ni Espíritu Santo. 18Ni Simón yu jachavanaʼ jalaqtsʼil ni ixtalaqtanuy ni Espíritu Santo tejkan ixjamoqslanikan ni ixmakakʼan, ex ixjalaqxtaqniputun tumin. 19Va lakjunil ni Pedro ali Juan: —Kilaxtaqniu vachuʼ ni aniy tapʼasta para kalaqtanul ni Espíritu Santo mas va taʼayucha yu kakmoqslanil kimakaʼ. 20Ex ni Pedro junil: —Ni uxintʼi kapiticha laqnin kun mintumin incha lhakʼapʼupʼin ni lay lhiʼikan tumin yu xtaʼa ni Dios. 21Ni uxintʼi jantu paxtoqniyan kalaʼaʼitʼi yu xtaʼa Dios, la melhanuti va jantu ox katʼiʼuntʼay kun Dios. 22Chavay kʼamapʼaxacha mijatapastakʼati, kamakʼauntʼijlacha milaktuʼunti. Kʼatʼapʼayninin Dios, yucha kʼatsay incha kamalaqmixiniyan yu pʼastʼakʼa la melhanuti. 23Kitʼin ijkʼatsay ni uxintʼi ayaj akchʼipʼin y vachuʼ milaktuʼunti ox laqalhumanitan la mijatapastakʼati. 24Ex chuncha ni Simón jaqaltaychoqol va lakjunil: —Kʼatʼapʼayninitʼik ni jalhachimoʼonuʼ Dios por kitʼin para jantu chun kaktapasal tacha kilajunau. 25Ex chuncha ni Pedro ali Juan jalaqputeʼenil ni lapanakni yu talaqtsʼil yu makal ni Jesús y vachuʼ talaqputeʼenil ixchivinti Dios. Astan tachʼapachoqolcha ixlakatinkʼan para kataʼanchoqolcha laka putaulan Jerusalén. Ni lakatin taʼan ixtapuʼanta si ixtatapasatijlay laka putaulanaxna xaʼestado Samaria y ancha ixtalaqputeʼey yu lay katapulaqtaxtul ni lapanakni. 26Ex chuncha taval qayntaun ixmayul Dios laqchaʼal ni Felipe, va junil: —Kaʼostʼaycha, kapiticha taʼan ixlhisur ni Jerusalén. Kʼachʼapʼa xatin yu puʼankan laka putaulan Gaza yu tapasay ni lakatʼun taʼan jantu matichun kataulal. 27Ex chuncha ni Felipe ostayal, va alcha. Ancha lakatin paxtoqlhi qayntaun lapanaki. Yucha va qayntaun yu ay lapanaki yu machaqaʼ xalakatʼun Etiopía taʼan ixlhachimoʼonun qayntaun xanati yu ixjunkan Kandace. Ni anchanu lapanaki yu paxtoqlhi ni Felipe va yucha yu ixlhistakniʼojota tachun ixtumin ni Kandace. Yucha kilal laka putaulan Jerusalén para katoʼoyal ni Dios. 28Chuncha va ixʼanchoqotacha la ixtʼun. Ex chuncha taʼan ixpuʼanta la ixkarro yu taxaqalhaʼan jukin ancha ixtʼajun puteʼeniʼ ni jalhiki yu tsʼoqlhi ni Isaías yu maqancha ixlaqputeʼey ixchivinti Dios. 29Ex ni Espíritu Santo junil ni Felipe: —Kapiticha, katʼematʼi ni anu karro. 30Tejkan talakanunil ni Felipe, qasmaknil ixchivinti taʼan ixtʼajun puteʼeniʼ ni jalhiki yu tsʼoqlhi Isaías yu maqancha ixlaqputeʼey ixchivinti Dios. Ex ni Felipe lhisakmil: —¿Malaʼasiy yu tʼaʼun puteʼeniʼ? 31Ex ni anu ay lapanaki va naul: —¿Tas kakpumalaqasilcha incha jantu alin matichun yu lay kimasunil? Ex chuncha lhijunkal ni Felipe kataukʼalcha y katʼataulal. 32Yu ixtʼajun puteʼeniʼ va inchine istsʼoqkanta: Qayntaun lapanaki lhaʼankal ixmaqnika tacha laqataun borrego. Va tacha taun sasʼatʼa borrego yu jantu tʼasay tejkan makasikkan, yucha vachuʼ jantu tsij najun. 33Ni lapanakni jantu katalhiʼaynlhi, yuʼuncha tamukʼanil laqtaqal y jantu matichun kaʼaqtayjul. Va niman tamaqnil, xlhiyucha jantucha lay lhichivinkan ixlapanakni. 34Ex ni ay lapanaki va lhisakmil ni Felipe, va junil: —Kitʼin kskʼiniyan taun jatapayniti ni uxintʼi, kiʼun tasʼayucha lapanaki lhichiviniy yu tsʼoqlhi ni aniy jalhiki. ¿Va lhichivinkan xʼaman yu tsʼoqlhi u va lhichiviniy aqayntaun lapanaki? 35Ex chuncha ni Felipe aqtaylcha laqputeʼeniy tacha naunputun ixchivinti Dios yu ixtʼajun puteʼeniʼ y vachuʼ laqputeʼenil ni ox chivinti yu lhichiviniy Jesucristo. 36Ex chuncha tejkan ixtaʼanta lakatin va tachaʼal taun lakxkan. Ex yu ay lapanaki va junil ni Felipe: —Aniy alin xkan. Kitʼin knajun ka ox kaval kajkʼaqchajʼaul. 37[Ex ni Felipe va junil: —Incha lhakʼapʼupʼin kun tachun la melhanuti ex chun kalal kʼaʼaqchʼajʼau. Ex ni yucha va qaltayanal, va naul: —Kitʼin klhakapuʼan ni Jesucristo va yucha yu Sasʼatʼa Dios junita.] 38Ex chuncha lhinaul kaʼulakal ni karro. Ex tapatajul ni yucha kun ni Felipe taʼan ixʼalin xkan. Ex ni Felipe maqchajʼaval ni anu lapanaki yu machaqaʼ Etiopía. 39Tejkan tatakukchoqolcha lakxkan ex ni ixʼEspíritu ni Jalhachimoʼonuʼ Dios va taun laqatsʼalaj lhaʼal ni Felipe. Ex yu ay lapanaki jantucha aqtaun kalaqtsʼinchoqol. Ex va chʼapachoqolcha ixlakatin kun achati. 40Astan ni Felipe xtaqnil kuenta va ixyachal taʼan ixʼalinachal taun putaulan yu ixjunkan Azoto. Tejkan taxtuchal ni Azoto ex taun taun putaulan yu ixtapasay va si ixjalaqputeʼeniy ni lapanakni yu ox chivinti yu lhichiviniy Cristo, tus chaʼal taʼan laka putaulan Cesarea.

will be added

X\