LOS HECHOS 6

1Chuncha ni anchanu julchan ixtatalhavay ni lapanakni yu ixtalhakapuʼan ni Jesús. Ex lati yu ixtachiviniy griego taʼaqtaylcha tachivintanuniy yu ixtachiviniy hebreo por ni xanatin yu tiyaunin. Ixtanajun jantu qayntsay yu lhilhiy ixjalaqlvaqnikan ixlhiʼutikʼan yu ixtʼamachivinkʼan griego y yu hebreos chun. 2Ex yu pumakautʼuy yu jamalaqachal ni Jesús tamaqxtoqʼol tachun yu ixtalhakapuʼan, va tajunil: —Kijnan jantu maqskʼiniy kakmakajuu ixlaqputeʼeka ixchivinti Dios para kaklatsukuu laqlvaqninin milhiʼutikʼan. 3Xlhiyucha klajunau, ketʼalaqaunin, kalaksaktʼik pumatujun lapanakni siya uxiknan yu ox jalaktoʼoyakan y yu talaqtanuʼojota ni Espíritu Santo la ixjatsukuntikʼan y vachuʼ yu lhuu jatapastakʼati talhitʼajun. Va yuʼuncha katataylhaʼal makanan ni aniy lhitapatsa. 4Pero ni kijnankʼan kaktaylhaʼanau skʼinin ni Dios y vachuʼ kaktaylhaʼanau laqputeʼenin ixchivinti —chuncha tanaul yu jamalaqachal ni Jesús. 5Ex ni lapanakni tachun talhipaʼinil yu tanaul. Ex talaksaklhi Esteban yu ox ixlhakapuʼan, yu ixlaqtanuʼojota ni Espíritu Santo. Vachuʼ talaksaklhi Felipe, ali Prókoro, ali Nikanor, ali Timón, ali Parmenas y vachuʼ Nicolás yu machaqaʼ Antiokía. Yucha jantu israelita ixjunita pero tejkan jantukaʼ ixlhakapuʼan Jesús, ixlhakapuʼanta Dios vachu chun tacha yu israelitas. 6Ex ni yu jalaksakkal jalaklhaʼankal taʼan ixtayanal yu jamalaqachal ni Jesús. Yuʼuncha taskʼinil Dios y tamoqslanil ixmakakʼan. 7Ex chuncha apalay maqati ixputaukʼay ixchivinti Dios y apalay qaynlhuu ixtalhakapuʼan ni Jesús xalakaputaulan Jerusalén. Vachuʼ qaynlhuvaj xakuras ni israelitas talhakapuʼal. 8Ni Dios ox ixʼaqtayjuy ni Esteban y ixtaqniy lhuu ixtapʼasta. Va yucha ixpumakay lajʼay axtoqnuʼ yu lay katapalakpastaknal ni lapanakni y vachuʼ ixmasuy yu jantu aqtaun ixlaqtsʼinkan. 9Ancha ixʼalin lapanakni yu taminchal taʼan ixtataqxtoʼa israelitas yu ixlakjunkan Oqxtamatin yu Tamakauntijlal Ixʼukxtinkʼan. Vachuʼ ixʼalin lati yu machaqan Cirene ixtajunita y lati yu machaqan Alejandría, ali lati yu machaqan xalakatʼun Cilicia vachuʼ kun yu machaqan xalakatʼun Asia. Ixtachunkʼan va si talhilakchivinil ixlhakapuʼati ni Esteban. 10Pero yuʼuncha jantu aqtaun lay katamaqalhajal ni Esteban por ixjatapastakʼati yu ixtaqnil ni Espíritu Santo. 11Ex chuncha lakmapalkal lapanakni para katamanul jalaklkanti. Xlhiyucha tanaul: —Kijnan ijqalasmakvi ni Esteban kiltaxtul laqxtoqnu chivinti, va lhichivinil Moisés kun Dios. 12Ex chuncha talapumalukuklal tachun ni lapanakni kun yu xalakʼay lapanakni israelitas kun yu ixtamalaninin ixlhachimoʼonkʼan. Va talaqʼal ni Esteban y tachʼapal, talhaʼal taʼan ixtamakay junta yu xalajʼaynin. 13Vachuʼ talakxkaul lati lapanakni para katamanul jalaklkanti, ex vachuʼ tanaul: —Yu aniy lapanaki jantu aqtaun ox lhichiviniy yu ay kilakatajtankʼan kun kilhachimoʼonkʼan. 14Kijnan klajqasmakniu ni yucha najun ni Jesús yu machaqaʼ Nazaret kamaqtayaʼ yu ay kilakatajtankʼan. Vachuʼ najun ni Jesús kamapaxayaʼ kilhachimoʼonkʼan yu la maqancha kintamakaunin Moisés. 15Ex tachun yu ancha ixtavilanal tus sniy ixtalaqapulaqtsʼin la ixʼukxpuʼ ni Esteban, va ixtasuy tacha ixʼukxpuʼ qayntaun ixmayul Dios.

will be added

X\