LOS HECHOS 5

1Vachuʼ qayntaun lapanaki yu ixjunkan Ananías kun ixanati Safira tastʼal aqxtaun ixtʼunkʼan. 2Ni anchanu lapanaki jantu kaxtaqʼol xatumin, pero tejkan lhaʼanil yu jamalaqachal ni Jesús ex makakal tacha kaxtaqniʼol tachun xatapal. Yu ixanati ox ixkʼatsay tacha makal ni yucha. 3Ex ni Pedro junil ni Ananías: —¿Valiʼiycha xtʼaqnincha lakatin ni Satanás katanul la mijatapastakʼati? Uxintʼi ixmakʼanupʼutʼun ni Espíritu Santo porke chʼapamatʼi lati xatapal mintʼun. 4Tejkan jantukaʼ istʼay ni mintʼun va minavin ixjunita. Mas tejkan stʼatʼicha vananaj minavin ixjunita xatumin. ¿Ex valiʼiycha pʼastʼaktʼi chuncha kamakʼatʼi? Uxintʼi jantu ixjamakʼanupʼutʼun yu valiʼiy lapanakni, va Dios yu ixmakʼanupʼutʼun. 5Tejkan chuncha qasmaklhi ni Ananías ex nimancha tʼuluj taqtalcha, va nilcha. Tachun ni lapanakni yu takʼatsal va ayaj tatalhanal. 6Ex ancha ixtayanal lati yu tsʼalankaʼ, va tapachʼinil ixlakatunaj ni Ananías y taʼalcha maknunun. 7Chuncha tejkan laʼatʼutu hora val ex vachuʼ tanuchal ancha ixanati ni Ananías y jantu ixkʼatsay yu tapasal. 8Ex ni Pedro lhisakmil: —Kiʼun incha laqsaval va chuncha xtapal lhistʼatʼik ni mintʼunkʼan. Ex yu xanati va naul: —Chun, va chuncha xtapal. 9Ex ni Pedro junil: —¿Valiʼiycha chʼantauncha untʼik para kalaqtsʼintʼanutʼik IxʼEspíritu Santo ni Jalhachimoʼonuʼ Dios? Laka matiʼicha taminchoqota yu takimaknul mixapay. Chavaycha uxintʼi vachuʼ kataʼanan maknunun. 10Ex chuncha ni xanati va nimancha tʼuluj taqtal taʼan ixchʼatay ni Pedro, ex nilcha. Tejkan tatanuchoqolcha ni tsʼalan la ixpulakna ni laqa chaqaʼ, tatemal ni xanati taʼan ixnimal. Ex vachuʼ tamaxtulcha y talhaʼalcha maknunun taʼan ixʼaknuy ixapay. 11Ex chuncha tachun yu ixtalhakapuʼan ni Jesús kun tachun alati yu taqasmaklhi va ayaj tatalhanal. 12Yu jamalaqachal ni Jesús ixtamakay lajʼay axtoqnuʼ y chuncha ox ixtasuy ixtapʼasta ni Dios. Si ixtataqxtoʼa ixlhimaqspaʼ ni ay lakatajtan taʼan ixjunkan ixjapuchʼanan Salomón. 13Pero yu alati lapanakni jantu ixtatapujuy katataqxtoqlhi chʼantaun kun yuʼuncha mas ox ixtatoʼoyay por ixlhakapuʼatikʼan. 14Ex chuncha lhilhiy ixtalhavay ni lapanakni yu ixtalhakapuʼan ni Jalhachimoʼonuʼ Jesús, mas joʼakna kun xanatin. 15Tus ixtamaxtuy ni taqanʼanin lakatinixnan ixtamamay laka putaman para katatapasanil mas va ixmaqtsʼansilaqa ni Pedro tejkan katapasal lakatin para palaycha katajunchoqolcha. 16Vachuʼ ixtaminachal lhuu lapanakni yu machaqan alati putaulanaxna ixlhiʼukstsʼuniy Jerusalén. Ixtalhimin taqanʼanin kun lapanakni yu ixtachʼapata jantu ox espíritus. Tus tachun palay ixtajunchoqoy. 17Ex chuncha ayaj akchaʼal ni xaʼukxtin kura kun tachun ixtʼaltanan yu saduceos ixtajunita. 18Talhinaul kalakchʼapakal yu jamalaqachal ni Jesús, ex nimancha lakmanukal laka pachʼin. 19Pero tejkan tsʼis ixjunita, ex qayntaun ixmayul Dios kimalaqltiʼachil la xamatiʼ ni pachʼin, ex jalakmaxtul y jalakjunil: 20—Kʼapʼinchʼoʼotʼikcha taʼan ay lakatajtan. Kalaqpʼutʼeʼeniʼotʼik ni lapanakni tachun ni chivinti yu lhichiviniy ni sastʼi jatsukunti. 21Ex chuncha tejkan ixtunkumintacha tatanuchoqolcha lakatajtan, taʼaqtayl tamasuy yu ox chivinti tacha jalakjunkal. Ni ixʼukxtinkʼan kuras kun ixtʼaltanan talhinaul katamakal taun ay taqxtoʼati y va tamaqxtoqlhi kun tachun ixlhachimoʼonunkʼan ni israelitas. Talhinaul ixjaʼikakʼan yu jamalaqachal ni Jesús yu ixtatanumanal laka pachʼin. 22Pero tejkan tachaʼal ni policias laka pachʼin jantucha katatemal. Ex taʼanchoqol juninin ixʼukxtinkʼan, 23va tanaul: —Tejkan kchaʼau laka pachʼin ox ixlakchajuy la xamatiʼ. Y yu jalhistaknan ancha ixtayananʼol la xakiltalakxtuti. Pero tejkan kmalaqltiʼau, jantu matichun ixtanun ixpulakna. 24Tejkan chuncha takʼatsal ni ixʼukxtinkʼan kuras kun yu ixʼukxtinkʼan xapolicias lakatajtan kun yu xalajʼay kuras va tus taun talhilal y va aqtayl talakpastaknan tisuncha tapasalcha. 25Ex chil aqayntaun lapanaki yu naul: —Ni lapanakni yu ixjalakmanutʼatʼik laka pachʼin, yuʼuncha tayananchal lakatajtan, tatʼajun lakmasuninin lapanakni. 26Ex ni ixʼukxtinkʼan xapolicias lakatajtan jalaklhaʼal ixpolicias y talhiminchoqol yu jamalaqachal ni Jesús. Jantu laqatapʼasta katalhimil porke ixtatalhauniy yu alati lapanakni, va lay kalaklakatʼalmakal. 27Tejkan laklhiminkal, laqmaqayaukal la ixlakaʼukxpukʼan ixʼukxtinkʼan ni kuras. Va tajunil: 28—Kijnan laqatapʼasta klalhichimoʼoo para jantucha kʼalhixaʼalatʼik ni lapanakni la ixtaqaʼuti ni anu lapanaki. Pero chavaycha jamalaniʼotʼatʼikcha tachun xalapanakni aniy Jerusalén y vachuʼ kilamukʼaniputunau laqtaqal ixmaqnika anu lapanaki. 29Chuncha ni Pedro kun alati yu jamalaqachal ni Jesús taqaltayanal y tanaul: —Kijnan apalay maqskʼiniy kakmakau yu lhinajun Dios y jantu yu talhinajun lapanakni. 30Ni ixDioskʼan yu maqaniyaʼ kepayankʼan yucha majkujuchoqol ni Jesús yu uxiknankʼan maqnitʼik tejkan makxtʼukmukʼatʼik laka kurus. 31Pero ni Dios kun ixtapʼasta la ay makal y mulal la ixlhijakanaj para kalhachimoʼonul y kamalaqtaxtul lapanakni y chuncha katamapaxal ixjatapastakʼatkʼan ni kintʼaʼisraelitaskʼan y kalaqmalaqmixinikal ixtalaqalhinkʼan. 32Ni kijnankʼan ox klhitaulau ni laqsaval chuncha tapasal. Y yu Espíritu Santo vachuʼ ox lhitaulay ni va chuncha val. Yucha va yu laqxtaqnil Dios tachun ni lapanakni yu tamakay tacha lhinajun. 33Ex ni lhachimoʼonun tejkan chuncha taqasmaklhi va ayaj talukujlal tus ixtamaqniputun yu jamalaqachal ni Jesús. 34Pero ancha chʼantaun kun yu alati jalhachimoʼonun ixyal qayntaun fariseo yu ixjunkan Gamaliel. Yucha ixjamalaninin ixlhachimoʼonkʼan ni israelitas y tachun ni lapanakni si ixtatoʼoyay. Yucha lhinaul kalakmaxtukal maqspaʼ yu jamalaqachal ni Jesús. 35Ex lakjunil ni ixtʼalhachimoʼonun: —Kintʼaʼisraelitas, chuncha tacha lakmakʼanipʼutʼunatʼik ni aniy lapanakni, kitʼin klajunau kʼalhistʼajkʼantʼikcha kun yuʼuncha. 36Kapʼastʼaktʼik ni jantukaʼ maqan ostaulal qayntaun lapanaki yu ixjunkan Teudas. Yucha ixjunputun ay jalhachimoʼonuʼ y yu ixlapanakni va tacha laʼatʼati ciento ixtajunita. Pero taval maqnikal y tachun yu ixtʼaltanan valiʼiy tʼikl taputaukʼaʼol. Ex ancha tamaktalcha, jantucha tuʼuchun katataylhaʼal. 37Astan vachuʼ ixʼalin qayntaun yu ixjunkan Judas yu machaqaʼ Galilea. Yucha ostaulal tejkan ixtʼaunkan laqtsʼoqolaka ni lapanakni. Ex yucha lakmakanul lhuu lapanakni para chʼantaun katatʼaval. Pero yucha vachuʼ maqnikal y tachun yu ixtʼaltanan valiʼiy tʼikl taputaukʼaʼol. 38Xlhiyucha klajunau kʼalakmakʼauntʼikcha ni aniy lapanakni. Yu tamakay ni yuʼuncha jantu katataylhaaniyaʼ incha valiʼiy lapanaki yu lhinajun. 39Pero incha va Dios lhinajun yu tamakay ni yuʼuncha, ex uxiknankʼan jantu lay kʼalaktʼanchʼaniyapitik porke ex laqsaval va kun Dios kʼalachʼapʼayapitik —naul ni Gamaliel. 40Ex chuncha yu ixtʼalhachimoʼonun talhipaʼinil tacha naul. Ex tamalaqachanal ixjalakʼika yu malaqachal ni Jesús y talhinaul ixjalaqmaqanaqka. Jalaktanchanikal ni jantucha katalhichivinil ni Jesús. Chuncha astan jalaqxtaqnil lakatin para kataʼanchoqolcha. 41Pero ni yuʼuncha tejkan jalakmakaunkalcha kataʼanchoqol va apalay talhiʼachantajul mas ixtalamaqanlqajnan porke ni Dios jalaksaklhi para kalhilaktuʼukal por ixtalhakapuʼan ixtaqaʼuti ni Jesús. 42Ex taun taun julchan ixtalaqputeʼey taʼan ay lakatajtan y vachuʼ laqa chaqan. Jantu ixtastaknan ixmasuka ni Jesús va Cristo yu ixnajun kamalaqachayaʼ Dios.

will be added

X\