LOS HECHOS 27

1Taval tapastaklhi para kintamalaqachan xalakatʼun Italia. Ex Pablo kun yu alati tachʼinin va jalaqmaqxtaqkal la ixtamakaʼ qayntaun kapitan yu ixjunkan Julio yu ixtanun laka batallón taʼan ixnavin ni ay jalhachimoʼonuʼ César Augusto. 2Ex ktaxtuucha ni laka putaulan Cesarea, kpuʼaucha laqataun barco yu minchal laka putaulan Adrumentina yu ixpuʼuxaʼan la ixkilpanaxnan xaputaulanaxna xaʼestado Asia. Vachuʼ ixkintatʼaʼantan qayntaun yu ixjunkan Aristarco yu machaqaʼ laka putaulan Tesalónica taʼan xaʼestado Macedonia. 3Ex yu ataun julchan val, kchaʼaucha la ixkilpaʼ ni mar taʼan laka putaulan Sidón. Ex ni Julio ayaj mapaynil ni Pablo porke xtaqnil lakatin kalaqlaqʼal ixʼamigos para kataxtaqnil ixmaqskʼiniti. 4Astan ktaxtuchoqoocha ni Sidón kun ni barco yu ixkpuʼantau. Pero yu xalakatʼun Chipre yu tanʼajvil lakxkan, yucha kmakauntijlau la kilhijamaqxkʼan porke yu un jantu ixkintaxtaqniyan lakatin para vas kajkʼau. 5Ex kpuʼau ni anchanu lakamar taʼan ixlhiʼukstsʼuniy xaʼestado Cilicia ali xaʼestado Panfilia, taval kchaʼau laka ay putaulan Mira taʼan xaʼestado Licia. 6Ancha ni kapitan temal ataun barco yu minchal laka putaulan Alejandría yu ixʼuxaʼan Italia. Ex ancha kintamukʼancha. 7Ex paqlhuu va si laksniy xakpuʼantau ni barco por pʼays ixkintalakatastukʼan ni un ex va skʼatsanaj kmaqxapuʼiniu ixlhiʼukstsʼuniy laka putaulan Gnido. Ex xlhiyucha kpuʼau ixlhisur xalakatʼun Kreta yu tanʼajvil lakxkan, ixlhiʼukstsʼuniy laka putaulan Salmón. 8Ancha ayaj lhitaʼay kiltutapasau la ixpiktuʼ ni Kreta. Taval kchaʼaucha ni putaulan yu junkan Taʼan Lay Ox Tataulay Barcos, va ixlhiʼukstsʼuniy xaputaulan Lasea. 9Chuncha paqlhuucha kmaqatsʼanqau kijulchankʼan, y jantucha apalay lay kajkʼau kun barco porke va tsʼuniycha istsʼanqay para kalakachilcha xajulchan tejkan ayaj taxkaaniy y unilay. Vachuʼ ixpaʼantacha ni malkuyuʼ tejkan ixtataskʼajay ni israelitas. Xlhiyucha ni Pablo va laqxtaqnil jatapastakʼati yu tatapatsay laka barco, 10va lakjunil: —Xapaynin, kitʼin knajun la lhitaʼay kunaʼ incha kataylhaanau laka barco. Kamaqatsʼanqayau ni barco kun ixmachʼapati y vachuʼ mas ketsukuntikʼan lay kamaqatsʼanqau. 11Pero yu xakapitan tropas apalay lhakapuʼanil ixchivinti yu manavin ni barco kun ixchivinti ni ixʼukxtinkʼan yu ixtatapatsay laka barco. Jantu kalhakapuʼanil ixchivinti ni Pablo. 12Ni anchanu putaulan taʼan ixvil ni barco jantu ox ixjunita para ancha kamukʼulatʼi ni barco tejkan pʼaysni ixtamay xkan kun un. Xlhiyucha ixtapastakʼa apalay ox katataxtulcha y kataʼalcha laka putaulan Fenice para ancha kataʼulal ni barco. Ni Fenice va taun putaulan xalakatʼun Kreta pero va ixvil taʼan ixputakʼutʼa ni julchan. 13Ixtapakxanʼiy kaʼunilal laksniy para lay katapuʼal barco. Ex tejkan laksniycha aqtayl unilay, va talhilal ni laycha kaktaxtuu. Taval kpuʼaucha ixlhiʼukstsʼuniy ixkiltuʼ ni tʼun. 14Pero va panchʼixkaʼ val nimancha tinik talakanunil ni kibarcokʼan ni un yu minachal laka noroeste. 15Ni anchanu un sunlhaʼal ni barco tus jantu lay vas kajkʼau. Xlhiyucha kmakajuu para kintalhaʼan taʼan ixpuʼan ni un. 16Ex ktapasau ixlhiʼukstsʼuniy lakataun lakatʼun yu tanʼajvil lakxkan yu junkan Klauda. Ancha jantucha chapuj pʼays ixʼunilata, ex va skʼatsanaj kmukʼau yu lakatʼuniy kibarcokʼan yu xakchʼikilnutau taʼan ay laka barco yu xakpuʼantau. 17Tejkan kmukʼau ni lakatʼuniy barco taʼan ay barco ex tatampachʼil kun laso ni ay barco para kalhitsukul tapʼasta xaltaʼalakʼiu para jantu katacheʼel. Va ixtatalhauniy kapulhaankal laka kukuj taʼan jantu pulman lakxkan yu junkan Sirte. Ex tamatajul yu pumaqayaulhaankan ni barco y jaxtaqkal kasunlhaʼankal kun un. 18Ex yu ataun julchan val, va la pʼaysni taylhaʼal uniyaxkan, va tamakutul ixmachʼapati ni barco, va tamajʼalcha lakxkan. 19Ex yu paqtʼutu julchan val, talaqtanqalhuʼolcha ixputapatskʼan xamaltananan ni barco. 20Paqlhuu jantu katasul ni julchan ali jastʼakun, va la pʼays taylhaʼal ni uniyaxkan. Jantucha xakpastakʼau incha kakxajchaʼau. 21Ex chuncha paqlhuucha jantucha xakvaynau, ex ni Pablo tayal taʼan ixtavilanal ni lapanakni, va naul: —Xapaynin, yu va ixkilalhakapuʼaniu kinchivinti y jantu ixtaxtuu ni Kreta ex jantu ixmajkʼatsau tacha tʼaunau majkʼatsanan chavaycha. 22Kitʼin klajunau jantu tuʼuchun katapastakʼun y jantu katʼalhanantʼik. Mas katsʼanqayaʼ ni barco pero uxiknankʼan jantu xataʼayuʼ katsʼanʼayapitik. 23Chuncha kʼatsay porke kutancha tsʼis kintasunil ixmayul ni Dios, y yucha va Dios yu ixnavin kunita kitʼin y yucha ktapatsaniy. 24Yu anchanu ixmayul kijunil: “Jantu katʼalhan, Pablo. Uxintʼi maqskʼiniy kalaqpiti ni ay jalhachimoʼonuʼ Romano. Por uxintʼi ni Dios kalaqʼaqtayjuyaʼ tachun yu tatʼaʼantan laka barco.” 25Xlhiyucha, xapaynin, jantu tuʼuchun katapastakʼun. Kitʼin klhakapuʼan ni Dios y kʼatsay ni yucha chuncha kamakayaʼ tacha kijunil ni ixmayul. 26Pero maqskʼiniy katalakanuchaʼau taun lakatʼun yu tanʼajvil lakxkan. 27Ex tejkan tapasal tʼuy semana vananaj ixkintasunlhaʼantan ni un lakamar yu junkan Adria. Ex pakltaun tsʼis val yu xaʼoqxtamatin laka barco va tamakal kuenta ni xaktʼaunaucha taʼukstsʼuninin ixpiktuʼ laka tʼun. 28Ex talkal ixpulmanixtu ni xkan va treinta y seis metros ixjunita. Chuncha kaltanau alakatsʼuniy, ex aqtaun talkachoqol va veinte y siete metros ixlhitʼajun ixpulmanixtu. 29Pero ayaj ixtatalhauniy katalakanunil chiyux ni barco ex la ixtimusna tamatajul maʼatʼati yu pumaqayaulhaankan ni barco. Va ayaj ixtanajun katunkulcha. 30Yu xaʼoqxtamatin laka barco va ixtaqosputun. Ex chuncha ixtamaʼeltajuputun lakxkan ni lakatʼuniy barco la ixkankatiʼ yu ay barco. Pero ixjamakakan tacha katatsukul munun alati yu pumaqayaulhaankan ni barco. 31Pero ni Pablo jalaqtsʼil, ex chuncha al juniniʼ ni kapitan kun ixtropas, va naul: —Incha kataqoslhi ni xaʼoqxtamatin laka barco ex jantu lay kalaqxajtʼachʼipitik —naul ni Pablo. 32Ex chuncha ni tropas niman tachʼukʼunil xalaso ni lakatʼuniy barco, ex tajulcha lakxkan chuncha puqapaj. 33Tejkan ixtunkumintacha ni Pablo laqlhixaqalal katavayl tachun ni lapanakni, va naul: —Tʼuycha semana va si kun talhanti tʼaunatʼik y jantu vaynatʼik. 34Chavay klatapayniniyau kavayntʼik, chuncha maqskʼiniy para lay kʼalaqxajchipitik. Jantu matichun katsʼanqayaʼ, mas va maqataun miʼajikʼan la miʼaqtsulkʼan jantu katsʼanqayaʼ. 35Tejkan chuncha naul, va tayal la ixlakaʼukxpukʼan ni lapanakni, chʼapal aqxtaun pan y xtaqnil lhimalaqpuchuncha ni Dios. Va laqcheʼel y aqtaylcha vajin. 36Chuncha jantucha apalay katamaqaninil ni lapanakni. Aqtaylcha tavajin vachuʼ. 37Xajkuntau doscientos setenta y seis lapanakni por tachun. 38Tejkan tavaynʼolcha ex tamajʼalcha lakxkan ni trigo yu xajchal para jantucha katatsʼinkʼil ni barco. 39Tejkan tunkulcha, talaqtsʼilcha ni lakatʼun pero jantu katamispal. Vachuʼ talaqtsʼil taʼan ayaj ay maqlqatanun xkan ni lakatʼun y va si kukuj ixjunita taʼan ixkilpaʼ. Ex ancha ixtamalakanuputun ni barco. 40Va tachukʼunil xalaso yu pumaqayaulhaankan ni barco y tamakaul lakxkan. Vachuʼ taxʼoqnil ixpumaltanakan ni barco. Ex va tachʼimukʼanil yu ay laqchʼiti para kasunlhaʼal ni un para kachaʼal ni barco la ixkilpaʼ ni xkan. 41Pero astan talakanunil taʼan mutʼun ixvil ni kukuj lakxkan. Yu ixkankatiʼ ayaj ox talakanuchal ex jantucha lay kataxtuchoqol. Ex yu ixtimusna ni barco tus talaqcheʼeʼol por pʼays talakanunil ni xkan. 42Ex chuncha ni tropas ixtamaqniputun ni tachʼinin para jantu kataqoslhi tejkan katatoqslatakukchal. 43Pero yu kapitan yucha jantu ixnajun kanil ni Pablo. Ex chuncha jantu kaʼuyujnaul para kalaqmaqnikal ni tachʼinin. Va laklhijunil katatoqslatakuklhi yu talaniy jaxkivinti para katatakukchal la ixkilpaʼ. 44Vachuʼ laklhijunil yu jantu talaniy jaxkivinti kataputakuklhi ltaʼalakʼiu u mas va taʼayucha kʼiu xatacheʼeniʼ ni barco. Chuncha tachun si ox ktakukchaʼau lakatʼun.

will be added

X\