LOS HECHOS 21

1Tejkan klakmakajuucha va kpuʼau barco, va kchaʼau tus laka putaulan Kos. Ex ataun julchan val kʼau tus Rodas ex ancha kʼau tus laka putaulan Pátara. 2Ancha ktemau taun barco yu ixʼanta xaʼestado Fenicia, ex yucha kpuʼaucha. 3Taval klaqtsʼiu xalakatʼun ni Chipre yu tanʼajvil lakamar, kmaqxapaʼiniu la kilhijamaqxukʼan ex astan kchaʼau tus xaʼestado Siria. Ni barco yu xakpuʼantau ixmaqskʼiniy kamakauntijlal ixmachʼapati laka putaulan Tiro, ex kijnan ktanuu ni laka putaulan. 4Ancha ktemau lapanakni yu ixtalhakapuʼan y klaktʼataulau paqtujun. Ni Espíritu Santo jalakmasunil ni yuʼuncha para katajunil ni Pablo jantu kaʼal Jerusalén. 5Tejkan laqchaʼal laqatujun julchan va ktaxtuchoqoocha. Ex yu ixtalhakapuʼan kintatʼaʼal kun ixanatinkʼan ali sasʼatʼankʼan tus laka playa. Ancha ktaʼaqtsoqoqtau y kskʼiu Dios. 6Astan ox klamastakʼau kun jalaqatanunti ex ktaukʼachoqoocha laka barco y yuʼuncha taʼanchoqol la ixchaqakʼan. 7Chuncha ktaxtuucha ni laka putaulan Tiro, kpuʼau barco tus Tolemaida. Ancha vachuʼ klakmastakʼau yu ixtalhakapuʼan y klaktʼataulau taun julchan. 8Ex ataun julchan val ktaxtuchoqoocha, ex kchaʼau taun ay putaulan yu junkan Cesarea. Ancha ktanuu la ixchaqaʼ Felipe yu ixlaqputeʼey ixchivinti Dios. Yucha va xaqayntaun yu pumatujun yu ixtaʼaqtayjuy yu jamalaqachal Cristo. Ex ancha kloqojvicha. 9Ni Felipe ixlhitʼajun pumatʼati ixjatsiʼin yu jantukaʼ ixtalakxtuklay. Yuʼuncha ixtalaqputeʼey kun ixtapʼasta Dios yu kaʼalinaʼ astan. 10Ancha ktaulau lati julchan, taval chinchal qayntaun lapanaki yu ixlaqputeʼey kun ixtapʼasta Dios yu kaʼalinaʼ astan. Yucha ixjunkan Agabo va ixmintachal xaʼestado Judea. 11Va kintalaqmin y chʼapal ixcinturon ni Pablo, ex lhimaqchʼikal y lhichʼanchʼikal, va naul: —Ni Espíritu Santo najun lati ni israelitas yu tavilanal laka putaulan Jerusalén va chuncha katamakayaʼ ni jamanavin ni aniy cinturón. Katachʼiyaʼ y katamaqxtaqniyaʼ la ixtamakkʼan lapanakni yu jantu israelitas kataval 12Tejkan chuncha ijqasmakvi ni kijnankʼan ali yu ixtalhakapuʼan ancha Cesarea, ex kijnan ktapayniniu ni Pablo para jantu kaʼal Jerusalén. 13Ex naul ni Pablo: —¿Valiʼiycha alhunatʼikcha y kilamamaqanixvayau? Kitʼin jantu kimpastakʼuy mas kakchʼikal u mas kaknil laka Jerusalén por kiJalhachimoʼonuʼ Jesús. 14Tejkan jantucha lay kakmaqalhajau ixaqalaka, ex kmakajuucha, va knajuu: —Chaqxi kamakakal yu lhinajun ni Jalhachimoʼonuʼ Dios. 15Ex chuncha klaqlaʼoxiucha kiʼaxtoqnukʼan, ktaxtuchoqoocha ni Cesarea, ex kʼaucha ni Jerusalén. 16Pero vachuʼ kintatʼaʼan lati yu ixtalhakapuʼan yu machaqan Cesarea. Yuʼuncha kintajunin kajkʼau loqojnun la ixchaqaʼ qayntaun yu ixjunkan Mnasón ancha Jerusalén. Yucha va machaqaʼ Chipre ixjunita y maqancha ixlhakapuʼanta. 17Tejkan kchaʼaucha Jerusalén yu ketʼalaqauninkʼan kintalaqaʼin kun achati. 18Ex ataun julchan val yu Pablo kun kijnankʼan klaqʼau ni Jacobo. Ancha vachuʼ ixtavilanal tachun yu xalajʼaynin yu ixtalhakapuʼan. 19Ex ni Pablo lakmastakʼal, va jalakjunʼol tachun yu makal Dios la ixlhitapatsa kun yu jantu israelitas kataval. 20Tejkan chuncha taqasmaklhi ay tamakal ni Dios. Va tajunil ni Pablo: —Pablo yu kilaqajkʼan unitʼa, kʼatsʼaycha ni aniy alin miles israelitas yu talhakapuʼantacha. Yuʼuncha ayaj tanajun kamakakal ixlhachimoʼon Moisés. 21Ni aniy jamakʼatsanikantacha ni uxintʼi jalakmasuniy ni israelitas yu laqmaqati tavilanal la ixputaulankʼan yu jantu israelitas kataval. Uxintʼi va jalakmasuniy katamakauntijlal ixlhachimoʼon Moisés y jalakʼuniy jantucha kataxvililichukʼupʼuxnil istsʼalankʼan y jantucha katamakal tacha ixputsukukʼan. 22¿Ex tas kamakayaucha? Laqsaval ni lapanakni katataqxtoʼaʼ tejkan katakʼatsayaʼ ni uxintʼi chʼitʼa aniy. 23Tsʼanqay kʼamakʼatʼi tacha klalhijunau kijnan: Aniy alin qayntʼati kun kijnankʼan yu tajunil ni Dios kun ixchivintikʼan yu katamakayaʼ. 24Kalaktʼapiticha, vachu chun kʼamakʼayeʼe tacha yuʼuncha tejkan kalakpaxkʼikkanaʼ tacha lhinajun ixlhachimoʼon Moisés. Uxintʼi kalakmapʼalnin yu maqskʼiniy para lay kalakpaxkʼikkal. Ex chuncha tachun ni lapanakni katakʼatsayaʼ ni jantu laqsaval kaval yu taqasmaknin. Vachuʼ katakʼatsayaʼ ni uxintʼi vananaj toʼoyay ixlhachimoʼon Moisés. 25Yu jantu israelitas kataval yu talhakapuʼan, kijnan klaqtsʼoqnitaucha taun karta yu tacha kijnankʼan kpastakʼau yu najun inchine: Uxiknan jantu maqskʼiniy katapastakʼun kimputsukkʼan. Vamun tsʼanqay jantu kʼaʼutʼik vakax yu moqslanikan antivas, ali jakʼalna, ali ixvakax taun talhitsukuti yu pixtutʼoqlkan, y tsʼanqay jantu katʼatʼamatʼik aqayntaun yu jantu minavinkʼan kaval. 26Ex yu ataun julchan val ni Pablo va laklhaʼalcha ni anchanu pumatʼati lapanakni y jalakpaxkʼikkal. Ex jakimakʼatsanil ni laka ay lakatajtan tas vanancha katamajkaniyaʼ ixchivintikʼan yu tajunil ni Dios para ex katamoqslanil ixlapaxkankʼan ni pumatʼati lapanakni. 27Tejkan va laycha katamaktal ni laqatujun julchan lati israelitas yu machaqan xaʼestado Asia talaqtsʼil ni Pablo laka ay lakatajtan. Yuʼuncha tapukiltʼasanil tachun ni lapanakni y tus tatalaktʼilhiʼol para katachʼapal ni Pablo. 28Pʼays tachivinil y tanaul: —Kintʼaʼisraelitas, kilaʼaqtayjuu. Mas va toʼoxtaycha kaval ni aniy lapanaki yucha lakmalaniy tachun ni lapanakni para kintaxkajin kijnan y vachuʼ para kataxkayl ixlhachimoʼon Moisés ali yu aniy ay kilakatajtankʼan. Chavaycha aniy laklhiminta lapanakni yu jantu israelitas kataval y chuncha taxkilivay yu aniy lakatajtan yu ixnavin Dios. 29Chuncha tanaul porke va ixtalaqtsʼinta ni Pablo kun qayntaun yu ixjunkan Trófimo yu machaqaʼ Éfeso y va ixtalhilay ni Pablo ixlhaʼanta lakatajtan. 30Ex chuncha tachun talukujlal ni anchanu ay putaulan y ni lapanakni va tatakyaumil, ex tachʼapachalcha ni Pablo, talaqxaqalhaʼal ixlhimaqspaʼ ni lakatajtan, ex niman tamalakchaunil ni xapuertas. 31Tejkan valaycha katamaqnil ni Pablo ex tamakʼatsanil ni komandante tachun yu xalapanakni ni putaulan va talukujlaʼol. 32Ex niman laqmaqxtoqlhi ixtropas ali xaʼukxtinin ni tropas, va tatakyaumil taʼan ixtayanal ni lapanakni. Tejkan ni lapanakni talaqtsʼil ni komandante kun ixtropas ex niman tamakaul ixlakasamaka ni Pablo. 33Tejkan chaʼal ni komandante, va chʼapal ni Pablo, y chʼil kun maʼatʼuy kadenas. Ex lhisakmil tas ayuchacha ixjunita y tisuncha laqtaqal makal. 34Ex ni lapanakni va poql talakchivinil. Lati putaun tanaul, y yu alati vachuʼ aputaun tanaul. Ex chuncha por yu talakchʼiliti ixʼalin, ni komandante jantu lay kamalaqasinil ni Pablo. Va lhinaul kalhaʼankal la ixchaqakʼan ni tropas. 35Tejkan tachaʼal taʼan la xaskalera ni chaqaʼ yu jamakanti kun chiyux, ex ni tropas tus tachʼixlhaʼal ni Pablo porke ayaj pʼays ixtalukujlata ni lapanakni. 36Tachun ixtaxkaulhiminta y pʼays ixtalaktʼasajminta, ixtanajun: —¡Kijnan knaunau kanilcha! ¡Kanilcha! 37Tejkan ni tropas ixtamanuputuncha ni Pablo la ixchaqakʼan, ex junil ni komandante: —¿Kʼixtʼaqniy lakatin kaktʼachivinin panchʼix? Ex yu komandante va naul: —¿Ex uxintʼi vachuʼ laniy ni lhichivin Griego? 38¿Ni uxintʼi jantu yuʼ kʼatʼi yu machaqaʼ Egipto, yu tauncha julchan makal taun lhilukuj para kamapaxakal ni jalhachimoʼonuʼ, y chʼantaun tatʼaʼal laʼatʼati mil xamakanan lhilukuj taʼan lakatʼun yu jaxixninta? 39Ex naul ni Pablo: —Kitʼin va israelita kunita y va kmachaqaʼ Tarso kunita, yu ay putaulan xaʼestado Cilicia. Va knajun kimakʼanin jamapayninti para kaklaktʼachivinil ni lapanakni. 40Ex ni komandante xtaqnil lakatin. Ex Pablo tayal taʼan xaskalera yu jamakanti kun chiyux, va saq lakmakal ni lapanakni kun ixmakaʼ. Tejkan saq taval, ex jalaqxaqalal laka lhihebreo yu ixlhichivinkʼan ni yuʼuncha. Va naul:

will be added

X\