LOS HECHOS 2

1Tejkan lakachilcha ixkʼatankʼan ni israelitas yu junkan xajulchan Pentecostes, ex tachun yu ixtalhakapuʼan ni Jesús va chʼantaun ixtataʼaqxtoqnun. 2Taval pʼaysni makatʼaunkal, tus tacha taun pʼays un ixmakatʼajun. Minchal tus laktʼiyan y taqasmakʼol ni lapanakni tus tapulakchux ni laqa chaqaʼ taʼan ixtavilanal. 3Ex niman talaqtsʼil taun tuʼuchun tacha jikmi, y tataukʼanichal laktsʼuninin por qayntamin la ixʼaqtsulkʼan yu ancha ixtavilanal. 4Ex tanul ni Espíritu Santo la ixjalhanutikʼan. Taʼaqtaylcha tachiviniy alati lhichivin yu jantu aqtaun ixtachiviniy. Chuncha lakmachivinil ni Espíritu Santo. 5Chuncha ni laka putaulan Jerusalén ixtachaʼanta israelitas yu ox ixtataylhaʼan tacha ixputsukukʼan ixjunita, va ixtaminʼotachal taʼakapuchun ni lakamunukpaʼ por ixkʼatankʼan yu ixtamakay. 6Tejkan taqasmaklhi tacha ixtachiviniy yu ixtalhakapuʼan ni Jesús, ex ni yuʼuncha va tataqxtoqlhi y tus saq tatayal porke ixtaqasmatʼa ixlhichivinkʼan yu ixtalhichiviniy yuʼuncha la ixlakatʼunkʼan. 7Ex chuncha tus taun takʼatsal. Va tus tumpaj talhilal, va ixtalajuniy siya yuʼuncha: —Tachun ni aniy lapanakni yu tatʼajun chivinin va si machaqan xalakatʼun Galilea. 8¿Ex tas laycha tapuchiviniy kilhichivinkʼan yu chivinanau? 9Lati ni kijnankʼan va machaqan Partia juntau, y lati va machaqan Media, vachu lati va machaqan Elam ali machaqan Mesopotamia, ali machaqan Judea, ali machaqan Kapadosia, ali machaqan Ponto, ali machaqan Asia, 10ali machaqan Frigia, ali machaqan Panfilia, ali machaqan Egipto, ali machaqan xaputaulanaxna Libia yu vilchal xlhiʼavintʼi Cirene, ali machaqan Roma. Lati ni kijnankʼan va israelitas juntau va por chuncha pupaqvi, y lati mas jantu katapupaqlhi tacha israelitas pero vachu talhakapuʼan Dios tacha kijnankʼan yu israelitas juntau. 11Y vachuʼ alin yu machaqan Kreta ali machaqan Arabia. Chavaycha tachun ni kijnankʼan qasmatʼau la kilhichivinkʼan yu lajʼay axtoqnuʼ yu makay Dios —chuncha talajunil ni lapanakni. 12Tachun ayaj ixtapastakʼuta, y jantu ixtamispay yu ixtatʼajun laqtsʼintapasanan. Ixtalalhisakmiy: —¿Chavaycha suncha tapasaycha ni aniy? 13Pero alati lapanakni ayaj ixtalajʼachan, va tanaul: —Ka va taʼapʼanin. 14Ex chuncha ni Pedro va laktʼatayal yu pumakautaun yu jamalaqachal ni Jesús. Va la pʼays chivinil va lakjunil tachun ni lapanakni: —Kintʼaʼisraelitas y vachuʼ tachun yu chavaycha vilanantʼik aniy laka putaulan Jerusalén. Ox kilaqasmakniu kinchivinti yu klajunau. 15Ni kijnankʼan jantu taʼapʼanin kajkuu yu tacha uxiknankʼan pʼastʼakʼatʼik. Chavaycha va laqanajatsikaʼ puvakuj. 16Yu tʼajun tapasanaʼ va chuncha tacha lhichivinil Joel yu maqancha ixlaqputeʼey ixchivinti Dios, va naul: 17Inchine najun ni Dios, tejkan valaycha kamiʼoyaʼ ni lakamunukpaʼ kaklaqxtaqniyaʼ ni Espíritu Santo tachun ni lapanakni. Yu mintsʼalankʼan ali metsiʼinkʼan katalaqputeʼeyaʼ kinchivinti. Yu mintsʼalankʼan katalaqtsʼinaʼ la ixtalakavantikʼan yu katapasayaʼ astan. Vachu yu xapaynin kalaqxaqalakanaʼ la ixʼaqlaqavantikʼan. 18Vachuʼ ni anchanu julchan kaklaqxtaqniyaʼ ni Espíritu Santo yu joʼakna ali xanatin yu kiʼoqxtamatin tajunita, ex ni yuʼuncha katalaqputeʼeyacha kinchivinti. 19Vachuʼ kakmasuyaʼ lajʼay axtoqnuʼ laktʼiyan. Vachuʼ lakatʼun kaʼalinaʼ yu jantu aqtaun katalaqtsʼil ni lapanakni: Kaʼalinaʼ lhilukuj, lhuu jakʼalnan, lhuu jikmi, ali lhuu jin tus tacha taputsʼi kunaʼ. 20Yu julchan jantucha kamapulkuyaʼ, putsʼista kunaʼ. Yu malkuyuʼ tacha jakʼalnan katasuyaʼ. Ex astan kachinaʼ ixjulchan ni ay Jalhachimoʼonuʼ Dios, tejkan kaʼalinaʼ lajʼay axtoqnuʼ yu kalaqtsʼinʼokanaʼ. 21Ex tachun yu katatapayniniyaʼ ni Jalhachimoʼonuʼ Dios, yuʼuncha katalaqtaxtuyaʼ. 22Ex ni Pedro va taylhaʼal ixchivinti, va naul: —Kintʼaʼisraelitas, ox kilaqasmakniu yu klajunau: Ni Dios tamasunin ni Jesús yu machaqaʼ Nazaret. Xtaqnil ixtapʼasta para lay kamakal la milakaʼukxpukʼan yu lajʼay axtoqnuʼ yu jantu matichun lay makay. Chuncha makal ni Dios para kakʼatsʼatʼik ni laqsaval va yucha malaqachal. Uxiknankʼan ox malaʼasiyatʼik ni laqsaval chuncha val. 23Chuncha tacha maqancha ni Dios ixnajun kunaʼ tus chun val. Va maqxtʼaqnitʼik ni Jesús la ixtamakakʼan ni laktuʼunun lapanakni para kamakxtukmukʼakal y kamaqnikal laka kurus. 24Pero astan ni Dios majkujuchoqol la ixtapʼasta tejkan nil. Va malaqtaxtul la ixjamaqanlqajnati y yu lhinin jantu lay kamaqalhajal. 25Yu maqancha tsʼoqlhi ni David yucha lhichiviniy Jesús va inchine najun: Kitʼin si xaklaqtsʼin ni ay Jalhachimoʼonuʼ Dios yu ixkintʼatiʼukxuyal para jantu aqtaun kaktalhanal, 26xlhiyucha la ijkʼachan tachun la kelhanuti y la kinkil ay ikmakay ni Dios. Vachuʼ mas kanil kilakatunaj pero oxamaktaun kakpakxanʼiyaʼ ni kajkujchoqoyaʼ astan. 27Porke uxintʼi, Dios kʼatʼi, jantu kʼimakʼauneʼe taʼan alin janinin. Jantu naʼun kapuchʼil kilakatunaj ni kitʼin yu kʼilaksaktʼa. 28Uxintʼi kʼimasunin ni tin yu xtaʼa jatsukunti. Laqsaval kajkʼachanaʼ tejkan kaktʼataultachaʼan. Va chuncha tsʼoqlhi ni David tejkan ixlhichiviniy ni Jesús. 29Ketʼalaqaunin, kijnan ox kʼatsayau ni maqancha nil y maknukal ni kimpaykʼan David. Mas tus chavaycha lay laqtsʼinau taʼan aknuy. 30Ni David ixlaqputeʼey ixchivinti Dios. Dios junil ni laqsaval ni xaqayntaun ixpapanti yu kaminaʼ maqan yucha va ay jalhachimoʼonuʼ Cristo kunaʼ. 31Ni David ixtʼaunkan makʼatsanika ni kakujchoqoyaʼ ni Cristo. Naul ni Dios ni laqsaval jantu aqtaun kamakaunaʼ taʼan alin janinin, y vachuʼ jantu kapuchʼiyaʼ ixlakatunaj. 32Y yucha va Jesús yu Dios majkujuchoqol y vachu va yuʼ yu klaqtsʼiu yu kujchoqol tachun ni kijnankʼan. 33Ex ni Dios ayaj ay makal tejkan mulal la ixlhijakanaj taʼan vilchal ni yucha. Ex ni Jesús laqaʼil ni Espíritu Santo chuncha tacha junil ni Dios. Vachuʼ kintamalaqachanin ni kijnankʼan. Tachun yu laqtsʼinatʼik y yu asmatʼatʼik va si la ixtapʼasta ni Espíritu Santo val. 34Ni David yucha jantu kaʼal laktʼiyan kun ixlakatunaj mas inchine naul: Ni Jalhachimoʼonuʼ Dios junil ni kiJalhachimoʼonuʼ Cristo: “Kintʼatʼaultʼachiy la kilhijakanaj” 35tus tejkan kakmaqalhajaʼoyaʼ tachun yu taxkayyan. 36’Xlhiyucha klajunau kakʼatsʼatʼik tachun uxiknankʼan yu kintʼaʼisraelitas untʼatʼik. Ni Jesús yu maqnitʼik laka kurus va yucha yu Dios makal ay Jalhachimoʼonuʼ y va yucha ni Cristo yu Dios laksaklhi —naul ni Pedro. 37Tejkan chuncha taqasmaklhi ni lapanakni ayaj tamaqaninil la ixjalhanutikʼan. Ex jalhisakmikal ni Pedro kun yu alati yu jamalaqachal ni Jesús: —Ketʼalaqaunin, ¿tisuncha tsʼanqay kakmakau chavaycha? 38Ex ni Pedro lakjunil: —Kʼamapʼaxatʼik mijatapastakʼatkʼan, kʼapʼuʼaqchʼajʼautʼikcha la ixtaqaʼuti ni Jesucristo para kʼamalaqmixinikʼantʼik mintalaqalhinkʼan. Ex chuncha kʼalaʼaʼiyapitik ni Espíritu Santo. 39Maqancha ni Dios naul ni laqsaval kataxtaqniyan ni Espíritu Santo ni uxiknankʼan kun mesʼatʼankʼan y vachuʼ kalaqxtaqniyaʼ tachun ni lapanakni yu kalaksakʼaʼ ni Dios kiJalhachimoʼonukʼan mas va toʼoxtaycha kaval. 40Chuncha jalaqxaqalal ni Pedro y jalaqxtaqnil alati jatapastakʼati. Va naul: —Kʼalaqtʼaxtʼutʼikcha para jantu kalaktʼapʼintʼik ni lapanakni yu jantu ox ixjatsukuntikʼan. 41Ex chuncha tachun ni lapanakni yu talhakapuʼal ixchivinti va taʼaqchajʼaul. Y ni anchanu julchan va tus laʼatʼutu mil lapanakni talhakapuʼal ni Jesús. 42Ni yuʼuncha va si ixtamakay kuenta yu ixtamasuy yu jamalaqachal ni Jesús. Va si chʼantaun ixtajunita, y si chʼantaun ixtalaqcheʼey ni pan yu ixtaʼuy, y si ixtaskʼin Dios. 43Ex chuncha tachun yu alati lapanakni va si ixtatalhananta porke yu jamalaqachal ni Jesús ixtamakay lajʼay axtoqnuʼ yu jantu aqtaun ixlaqtsʼinkan, yu ixmasuy ixtapʼasta Dios. 44Tachun yu ixtalhakapuʼan ni Jesús va chʼantaun ixtajunita y tachun yu ixtamaqalin va chʼantaun ixtamakata. 45Ixtastʼay ixtʼunkʼan kun yu ixtamaqalin, ixtalalvaqniy siya yuʼuncha ni tumin tacha yu ixtamaqskʼiniy qayntamin por qayntamin. 46Taun taun julchan ixtataqxtoʼa laka ay lakatajtan y la ixchaqakʼan ixtalatʼaʼuy ni pan y ixtalatʼavajin kun achati y ox chʼantaun ixtajunita la ixjalhanutikʼan. 47Ay ixtamakay ni Dios y tachun yu alati lapanakni yu jantu ixtalhakapuʼan ni Jesús va lajqalʼoxin ixtalhilay. Ni Dios lhilhiy ixlalhavay ni lapanakni yu istsʼanqay katalaqtaxtul.

will be added

X\