LOS HECHOS 16

1Ex va tachaʼal laka putaulan Derbe ali laka putaulan Listra. Ancha ixvil qayntaun yu ixlhakapuʼan yu ixjunkan Timoteo. Yu ixnati vachuʼ ixlhakapuʼan. Yucha va qayntaun israelita ixjunita pero yu ixpay va qayntaun griego ixjunita. 2Ni lapanakni yu ixtalhakapuʼan yu ixtavilanal laka putaulan Listra ali laka putaulan Iconio ox ixtalhichiviniy ni Timoteo. 3Ni Pablo maqamal katʼaʼal ni Timoteo. Pero pʼunaj xvililichukʼupʼuxniʼelal, va tamakal tacha ixputsukukʼan ni israelitas para ox katalaqtsʼil ni israelitas yu ancha ixtavilanal porke tachun ixtakʼatsay ni ixpay va griego ixjunita. 4Tejkan ixtatapasay ni putaulanaxna va ixtaxaqalay yu ancha ixtalhakapuʼan. Talhichivinil tachun yu talhinaul yu jamalaqachal ni Jesús ali yu xalajʼaynin yu ixtalhakapuʼan yu ixtavilanal Jerusalén. Va ixtamasuniy para katamakal chuncha tacha jamasunikal. 5Chuncha yu ixtalhakapuʼan apalay ox talhakapuʼal y lhilhiy ixtatalhavay. 6Ni Espíritu Santo jantu kalakmakaul kataʼal laqputeʼenin ni ox chivinti tus Asia. Xlhiyucha tapuʼal xaʼestado Frigia ali xaʼestado Galacia. 7Tejkan tachaʼal xaʼestado Misia va ixtaʼuxaʼan Bitinia pero ni Espíritu Santo jantu kalakmakaul. 8Tejkan tatapasaʼol laka estado Misia va tachaʼalcha tus laka putaulan Troas. 9Ex tejkan tsʼis val ni Pablo tasunil la ixtalakavanti qayntaun lapanaki yu machaqaʼ xaʼestado Macedonia yu ancha ixyal. Ni anchanu lapanaki tapayninil, va naul: “Kʼatʼantʼikcha Macedonia para kilaʼaqtayjuu.” 10Tejkan chuncha laqtsʼil ni Pablo la ixtalakavanti, ex niman klaqlaʼoxiu kiʼaxtoqnukʼan para kajkʼaucha xaʼestado Macedonia porke ox kʼatsau ni va Dios kintalhijunin kaklaqlhixaqalau yu ox chivinti yu ancha ixtavilanal. 11Chuncha ni kijnan ktaxtuucha Troas, va kpuʼau barco, vas kʼau tus laka putaulan Samotracia. Ex ataun julchan val vachuʼ kpuʼau barco, kchaʼau tus laka putaulan Neápolis. 12Ex ancha kpatajuucha ex kʼaucha laka putaulan Filipos taʼan ixtavilanal ni Romanos. Yucha va taun putaulan yu apalay ay ixjunita ancha la xaʼestado Macedonia. Ancha jantu paqlhuu kaktaulau. 13Tejkan val xajulchan jastaknati ktaxtuucha laka putaulan, kʼaucha ixlhimaqspaʼ tus laʼaxkan, ijkʼatsau ni ancha lay katʼematʼi taʼan ixtaskʼin Dios. Ancha ktaulau, klaktʼachiviniu ni xanatin yu ancha ixtaʼaqxtoqnun. 14Qayntaun xanati yu kintaqasmaknin va ixjunkan Lidia. Va machaqaʼ Tiatira ixjunita. Yucha istʼay ox laqchʼiti yu laqlhuu xtapal. Yucha ayaj ixtoʼoyay ni Dios. Ni Jalhachimoʼonuʼ Dios aqtayjul para kalhakapuʼal ixchivinti ni Pablo. 15Ex tejkan aqchajʼaul ni anchanuʼ xanati chʼantaun kun ixlapanakni va kintatapayninin, va naul: —Incha lhilayatʼik ni laqsaval klhakapuʼan ni Jalhachimoʼonuʼ, ex kʼatʼapʼasayapitik la kinchaqaʼ para ancha kaloʼojtʼik. Ex laqa tapʼaysni kintalhijunin kakloqojvi la ixchaqaʼ. 16Tauncha julchan ni kijnan xkʼantau skʼinin Dios, va kpaxtoqvi qayntaun jatsiʼi yu ixlhitʼajun jantu ox espíritu. Ni anu espíritu ixmasuniy ni jatsiʼi yu katapasayaʼ astan yu jantukaʼ ixtapasay. Yu ixʼukxtinin ni anchanuʼ jatsiʼi ox ixtapulhajay por ixchivinti yu ixnajun. 17Ni jatsiʼi ixkintatixkaulhaʼantan ni kijnankʼan ali Pablo, va la pʼays ixtʼasay, va ixnajun: —Ni aniy lapanakni yuʼuncha va ixʼoqxtamatin ni Dios yu vilchal laktʼiyan. Yuʼuncha talaqputeʼeniyan tas laycha kʼapʼulaqtʼaxtʼutʼik. 18Ni anchanu jatsiʼi paqlhuucha chuncha ixkintatixkaulhitʼaunan. Ex ni Pablo jantu kamaqamal, va talaqaspʼiklhi y junil ni jantu ox espíritu: —Kitʼin ijkunan la ixtaqaʼuti ni Jesucristo, kʼamakʼaunchʼoʼocha ni aniy jatsiʼi. Ex va nimancha taxtuchoqol ni jantu ox espíritu. 19Tejkan talaqtsʼil ixʼukxtinin ni jatsiʼi tacha tapasal y takʼatsal ni jantucha lay katalhajal tumin ex tachʼapal ni Pablo ali Silas, talhaʼal laklhitamau taʼan ixtavilanal ni jalhachimoʼonun. 20Ex yuʼuncha tachivintanunil ni jalhachimoʼonun, va tanaul: —Ni aniy lapanakni yuʼuncha va israelitas tajunita, chavaycha tamalukujlay ni lapanakni yu tavilanal aniy laka putaulan. 21Yuʼuncha talhinajun aputaun putsuku taʼan kijnan jantu xtaqnikanau lakatin kamakau yu Romanos juntau. 22Ex tus tachun ni lapanakni va chʼantaun tamakal ixchivintikʼan. Ex yu jalhachimoʼonun talhinaul ixlajʼexnikkʼan ixlaqchʼitikʼan ni Pablo ali Silas y vachuʼ ixlaqmaqanaqkan. 23Ex tus ox jalaqmaqanaqkal, y astan ankal jalaqmaqanuka laka pachʼin. Talhijunil ni jalhistaknaʼ ox kalaklhistaklhi. 24Tejkan chuncha lhijunkal ex laklhaʼal apulaktaun taʼan ox ixpulakna ni pachʼin. Ancha jalaqtsʼanʼaqsʼulakanchalcha kun kʼiu. 25Tejkan laqchaʼal pakltaun tsʼis ni Pablo ali Silas ixtaskʼin Dios y vachuʼ ixtamilpay y yu alati tachʼinin ixtaqasmatʼa. 26Ex nimancha alil ay jaxkapʼikniti tus laklaʼol xaputayan ni pachʼin. Va talaqltiʼaʼol tachun ni xamatiʼ y tus talajʼexʼol tachun ixkadenaskʼan ni tachʼinin. 27Chuncha niman kujlhi ni jalhistaknaʼ y laqtsʼil tachun ni xapuertas tus ixtalaqltiʼaʼojota. Ex niman maxtul ixespada, va ixmaqniputunkan ixlaqʼaman porke lhilal taqosʼol tachun ni tachʼinin. 28Pero Pablo la pʼays chivinil, va junil: —Jantu kʼalhimaqchʼapʼukʼa milaqʼaman. Tachun ni kijnankʼan va si aniy kʼalintau. 29Ex ni jalhistaknaʼ skʼinlhi qachitaun qaʼichi yu kamapulkul y takyautanuchal laka pachʼin. Taʼaqtsoqoqtanil ni Pablo ali Silas. Tus ox ixjaxkʼapʼikninta. 30Ex lakmaxtul, va lakjunil: —Xapaynin, ¿tisuncha maqskʼiniy kakmakal para kaklaqtaxtul? 31Ex tanaul: —Kalhakʼapʼupʼi ni Jalhachimoʼonuʼ Jesucristo ex kʼalaqtʼaxtʼuyeʼe kun tachun milapanakni yu tavilanal la minchaqaʼ. 32Ex ni Pablo ali Silas talhixaqalal ixchivinti ni Jalhachimoʼonuʼ Jesús vachuʼ kun tachun yu ixtavilanal la ixchaqaʼ. 33Ni jalhistaknaʼ laklhaʼalcha para kalaqchaʼanil taʼan ixtataqalhita. Ex astan niman aqchajʼaul kun tachun ixlapanakni. 34Ex jalaklhaʼal ixpulakna la ixchaqaʼ y va jalakmulal laka mesa para kalakvaval. Tachun yu ixlapanakni ayaj talhiʼachantajul porke talhakapuʼal ni Dios. 35Tejkan tunkunchoqolcha ex ni jalhachimoʼonun tamalaqachal ixpoliciaskʼan para katalaqʼal ni jalhistaknaʼ y katamaxtuchoqolcha ni Pablo ali Silas. 36Ex ni jalhistaknaʼ junil ni Pablo: —Chavay ni jalhachimoʼonun kintalhijunil kaklamaxtuchoqoocha. Chavay laycha katʼaxtʼutʼik y oxamaktauncha kapʼinchʼoʼotʼik. 37Pero ni Pablo lakjunil ni policias: —Kijnankʼan va Romanos kuntau. Pero mas chuncha kintalaqmaqanaqni la ixlakaʼukxpukʼan ni lapanakni y kintamanun laka pachʼin. Chavaycha kintamaxtuputunan laqatamaqsaq. Pero kijnan jantu kajkʼanau. Tsʼanqay yuʼuncha kintamin maxtunun. 38Ex ni policias taʼalcha laqputeʼeninin ni jalhachimoʼonun. Tejkan takʼatsal ni yuʼuncha va Romanos ixtajunita ex ayaj tatalhanal. 39Ex yuʼuncha tamil tapaynininin para kalaqmalaqmixinikal, ex chuncha tamaxtulcha y tatapayninil para katataxtulcha ni laka putaulan. 40Tejkan tataxtulcha laka pachʼin va taʼal la ixchaqaʼ Lidia. Va ancha talaqʼal yu ixtalhakapuʼan Dios y tamalakaʼulal. Ex taval taʼanchoqolcha.

will be added

X\