LOS HECHOS 1

1Ni karta yu pʼunaj kmalaqachanin, Teófilo, ancha xaktsʼoqnitan tachun yu makal ni Jesús. Vachu ancha xaktsʼoqnitan tachun yu jamalaninil mas tus tejkan pʼunaj yu puʼaqtaynil makanaʼ ixlhitapatsa 2tus tejkan anchoqol laktʼiyan. Ixʼalin lapanakni yu ixjalaksakta y jalaqmalaqachal tejkan jantukaʼ ixʼan laktʼiyan, ex kun ixtapʼasta ni Espíritu Santo jalakmasunil yu maqskʼiniy katamakal. 3Tejkan nil ni Jesús ex astan aqlhuvaj jalaktasunichoqol. Tus tʼuy pʼuxaun julchan ixtʼajun jalaktasuniniʼ para katakʼatsal ni laqsaval ixkujchoqotacha y laqlhixaqalal tacha lhachimoʼonun ni Dios. 4Tejkan vananaj ixjalaktʼavil va jalakjunil ni jantu katataxtul laka putaulan Jerusalén, y va lakjunil: —Pʼunaj kapʼakxanʼelayapitik yu ixnajun laqsaval kataxtaqniyan kimPay Dios chuncha tacha klajuniu. 5Ni Juan va xkan ixpumaqchajʼavanan pero va laycha kalakachil ni julchan tejkan kʼapʼumaqchʼajʼavakʼanapitik ni Espíritu Santo. 6Ex chuncha tejkan tataqxtoqlhi va talhisakmil ni Jesús va tajunil: —¿Jalhachimoʼonuʼ, chavaycha kalakmapʼaxayeʼecha ni jalhachimoʼonun la kilakatʼunkʼan para kalhichimoʼochoqoocha ni kijnankʼan yu israelitas juntau? 7Ex va lakjunil ni Jesús: —Ni uxiknankʼan jantu tapaxtoqniyan kakʼatsʼatʼik tisuncha julchan u tisuncha hora chuncha katapasayaʼ. Yu kimPay Dios yucha paxtoqniy kalhinaul tas vanancha kamakayaʼ tuʼuchun. 8Katanuyaʼ ni Espíritu Santo la melhanutikʼan ex chuncha kalaʼaʼiyapitik ixtapʼasta. Ex kilalhichivinanau ni kitʼin aniy laka putaulan Jerusalén y vachuʼ tachun aniy xalakatʼun Judea y vachuʼ tus xalakatʼun Samaria y mas tus yu apalay laqmaqati lakamunukpaʼ. 9Tejkan chuncha naunʼol ni Jesús ex talaqtsʼil va lhaʼankalcha, pataxtulcha laktʼiyan. Tanulcha laka taputsʼi, y jantucha apalay katasul. 10Tejkan sniy ixtatʼajun laqtsʼinin taʼan puʼal laktʼiyan ex tsʼalaj tatasul qayntʼuy lapanakni. Ixtalhilakayanal yu pʼays laqxutʼutʼu laqchʼiti y laktʼatayal chʼantaun kun yuʼuncha. 11Va tanaul: —Uxiknan, lapanakni yu machaqan Galilea untʼatʼik, ¿valiʼiycha lakʼapʼinatʼikcha laktʼiyan? Ni Jesús yu pataxtulcha laktʼiyan y tamakajuncha, yucha kaminchoqoyaʼ vachu va chun tacha xalaqtsʼinatʼik tejkan xaʼan. 12Ex chuncha yu jamalaqachal ni Jesús tataʼeltajul laka aspajun yu junkan Xaʼaspajun Olivos. Taʼanchoqol ni laka ay putaulan Jerusalén. Ancha jantu ixlhimaqati ixjunita, ukxchuncha tacha yu ixtapaxtoqniy kataltanal ni israelitas tejkan xajulchan jastaknati ixjun. 13Ex tachaʼalcha ni laka putaulan va tataukʼalcha taʼan talaqtʼuy chaqaʼ ixjunita taʼan ixtaloqojya. Yu taʼal va Pedro ali Jacobo ali Juan ali Andrés ali Felipe ali Tomás ali Bartolomé ali Mateo ali Jacobo yu istsʼal Alfeo ali Simón yu ixmapaxaputun ni gobierno ali Judas ixpʼisaqa Jacobo. 14Aqlhuu ixtataqxtoqya y vamun ixtaskʼin Dios tachun ni yuʼuncha kun ixtʼalaqaunin Jesús ali María, yu ixnati, ali alati xanatin. 15Tejkan ataun julchan val, ex tataqxtoqlhi ni yuʼuncha tus tacha ciento veinte lapanakni. Ex tayal ni Pedro la ixlakaʼukxpukʼan, va lakjunil: 16—Ketʼalaqaunin, laqsaval ixmaqskʼiniy chuncha kaval tacha yu maqancha ixnajun ni ay jalhachimoʼonuʼ David tejkan machivinil ni Espíritu Santo. Ni David lhichivinil ni Judas yu lakmapʼulnil ni lapanakni yu tachʼapal ni Jesús. 17Ni Judas ixmispakan tacha kintʼaltanakʼan y va ixlaksakkanta para chʼantaun kintatʼatapatsan. 18Pero yu ixlhilhajati yu lhajal por maqxtaqlhi ni Jesús va kun yucha lhiʼil aqxtaun tʼun ex ancha nil. Y patajul tus tatanpusʼea la ixpajan y taxtuʼol ixpalun. 19Ex tachun yu ixtavilanal Jerusalén takʼatsal y talhimapaqaʼul ni anchanuʼ lakatʼun Aseldama, yucha naunputun la ixlhichivinkʼan Xatʼun Jakʼalnan. 20La xalibro Salmos yu tsʼoqlhi David, ancha lhichiviniy Judas, inchine najun: Kamakauntijlalcha taʼan ixvil, jantucha kaʼalil matichun yu lay ancha kataulal. Vachuʼ alakataun najun: Aqayntauncha kalhitsukul ixlhitapatsa. 21Ex taylhaanil ixchivinti ni Pedro, va naul: —Xlhiyucha maqskʼiniy kalaksakvi aqayntaun lapanaki. Kalaksakʼau qayntaun yu chʼantaun tijuyal kun kijnan mas tus tejkan ixtʼaʼukxuyanau ni Jesús. 22Tsʼanqay kaval xaqayntaun yu kintʼaltanakʼan junita mas tus tejkan ixmaqchajʼavanan ni Juan tus anchoqol laktʼiyan ni Jesús la kintalakavantikʼan. Chuncha ni yucha vachuʼ kintatʼalaqputeʼeyan chʼantaun kun kijnan ni laqsaval kujchoqolcha ni Jesús —naul ni Pedro. 23Ex talakʼulal pumatʼuy lapanakni. Xaqayntaun va José Barsabás yu vachuʼ ixjunkan Justo. Yu aqayntaun ixjunkan Matías. 24Ex va taskʼinil ni Dios va tanaul: —KiJalhachimoʼonuʼ kʼatʼi. Uxintʼi kilamispaniʼoyau kelhanutikʼan. Kilamasuniu tas ayucha yu uxintʼi laksakʼa 25para katapatsal kun uxintʼi y para kaʼal laqputeʼeniʼ minchivinti. Va yucha kapaxtoqnil ni lhitapatsa yu makaul Judas por ixtalaqalhin tejkan al taʼan maqskʼiniy. 26Ex tamakal taun qamanti para katasul taʼayucha kapaxtoqniyaʼ y va paxtoqnil Matías. Ex ancha tamanulcha kun yu pumakautaun lapanakni yu jamalaqachal ni Jesús.

will be added

X\