3 JUAN 1

1Kitʼin, yu xaʼay kunita siya yu talhakapuʼan, va ikmastakʼayan ni uxintʼi, Gayo, yu kilaqaj kʼatʼi. Laqsaval ikpaxkayan. 2Kintʼalaqajun yu ikpaxkayan, kitʼin ikskʼin Dios por uxintʼi para ox kʼatsʼukʼu y jantu kʼatʼaʼanʼatʼi, vachu va tacha ox alintʼa kun Dios la melhanuti. 3Ayaj klhiʼachantajul tejkan takilachil lati ketʼalaqauninkʼan. Kintalaqputeʼenil ni ox vas tʼaylhipʼin la ixtin Dios, vachu laqsaval makʼay yu najun. 4Yu apalay kixtaqniy achati va tejkan ijqasmatʼa ni kesʼatʼan tatijuyanal makanan yu laqsaval paxtoqniy. 5Kintʼalaqajun yu ikpaxkayan, ox tʼaylhipʼin la milhakapuʼati tejkan jalaqʼaqtʼayʼuy ketʼalaqauninkʼan yu talaqchin yu maqati machaqan mas jantu jalaqmispʼay. 6Yuʼuncha aniy talaqputeʼenil ixlapanakni Dios ni uxintʼi ayaj japʼaxkʼanan. Chavay katʼaylhipʼi jalaqʼaqtayjun ketʼalaqauninkʼan la ixtinkʼan chuncha tacha paxtoqniyan kʼatʼapʼatsʼanin ni Dios. 7Ni yuʼuncha maqati tatiʼukxuntayay para kamispakal ixtaqaʼuti Jesucristo. Jantu taskʼin ni kataʼaqtayjul lapanakni yu jantu talhakapuʼan. 8Xlhiyucha kijnankʼan maqskʼiniy kaʼaqtayjuu. Ex chuncha jatʼatapatsayau yu vas talaqputeʼey yu laqsaval maqskʼiniy. 9Kitʼin klaqtsʼoqnil taun chivinti ixlapanakni Dios yu ancha tavilanal. Pero ni Diótrefes va maqamay ay kamakakal. Jantu kintalaqaʼiyan. 10Xlhiyucha incha kajkʼananta, kakjuntaʼiyaʼ para kaklhixaqalal yu makay, va kiluntʼajun laqxtoqnu, kintamanuniyan laklkanti. Jantu vamuncha yuʼ. Vachu jantu jalaqaʼiy tejkan tachaʼan yu talhakapuʼan. Yu talaqaʼiputun jalaktanchaniy para jantu katalaqaʼil. Ex jalaqtinaqxtuy para jantucha chʼantaun kataval kun yu alati yu talhakapuʼan. 11Kintʼalaqajun yu ikpaxkayan, jantu kalaqtsʼiʼitʼi yu jantu lajʼoxi, va kalaqtsʼiʼitʼi vamun yu lajʼoxi. Yu makay yu lajʼoxi, yucha tijuyal kun Dios, pero yu makay yu jantu lajʼoxi, yucha jantukaʼ mispay ni Dios. 12Tachun tanajun ni Demetrio va ox lapanaki, si makay tacha najun ni chivinti yu laqsaval. Mas kijnankʼan vachu iknaunau ni Demetrio va ox makay y uxiknan kʼatsʼayatʼik ni jantu klaklkananau. 13Kitʼin ayaj lhuu chivinti xajkunputunan pero jantu iktsʼoqniputunan kun patsʼoqnu. 14Va ikpakxanʼiy niman kaklaqtsʼin ex kalakchivinanau ukxpuʼ kun ukxpuʼ. 15Oxamaktaun kʼatʼaʼul. Yu mintʼalaqaunin yu aniy taʼalinta tamalaqachaniyan taun jamastakʼanti. Kʼalakmastʼakʼatʼi ni ketʼalaqauninkʼan por qayntamin yu ancha taʼalinta.

will be added

X\