2 TIMOTEO 3

1Vachu maqskʼiniy kakʼatsʼatʼi ni tejkan xaputamaktanacha kunaʼ, ex la lhitaʼay kunaʼ. 2Kaʼalinaʼ lapanakni yu vamun ixʼamankʼan kajapaxkakanaʼ, vamun tumin kataʼachaniyaʼ, lajʼay kalakmakakanaʼ, lajʼay katakʼatsanaʼ, katalaktuʼununaʼ, jantu kataqalasmatʼaʼ ixpayankʼan, jantu katalhipaxkalaqtsʼinaʼ yu lajʼoxi, va si katamaqtaqalhininaʼ. 3Jantu katamapaynininaʼ, katalaxkayyaʼ, katakiltayananaʼ, jantu lay katalakataulaʼ, katamamaqanlqajnivayaʼ yu alati, kataxkayyaʼ yu lajʼoxi. 4Kataʼakchʼintamayaʼ ixʼamigoskʼan, jantu katamakayaʼ kuenta ixlaqtaqalkʼan, lajʼay katakʼatsanaʼ, vamun kataʼachaniyaʼ yu axtoqnuʼ yu tamakaputun, jantu yu Dios. 5Katatasuyaʼ tacha katatoʼoyal ni Dios pero katalaktanchayaʼ ixtapʼasta. Lapanakni yu chuncha tajunita, kʼalakmakʼaucha. 6Vamun tamakay kuenta katatanul laqa chaqan para katamakanul xanatin yu jantu katalhitsukul tapʼasta para katanaul ni jantu. Ni anchanu xanatin jantu ox takʼatsan por ixtalaqalhinkʼan pero va ayaj tamaqamay katamakal pulhuu talaqalhin. 7Mas va tavanancha, si talaniy axtoqnuʼ pero jantu aqtaun lay tamispay yu laqsaval. 8Ni anchanu xapaynin, yuʼuncha vachu va tacha Jannes y Jambres yu taʼakchʼintamal ni Moisés. Va taʼakchʼintamay yu laqsaval. Jantu vas kaval ixjatapastakʼatkʼan y jantu laqsaval kaval ixlhakapuʼatkʼan. 9Pero jantu tuʼuchun katamakayaʼ, va katamispayaʼ tachun ni lapanakni ixlhitontojkʼan vachu va tacha tapasal kun Jannes ali Jambres. 10Pero uxintʼi ox kʼimispʼaniy ni kitʼin tacha ikmalaninin y tacha ikmasuy ni putsuku y yu ikmakaputun. Vachu kʼimispʼaniy kilhakapuʼati ali kimaqantaulati ali kejapaxkanti vachuʼ tacha ox iktayaniy yu lhitaʼay. 11Vachu mispʼay tacha ixkintamamaqanlqajnivay y tacha ikmajkʼatsay y vachu yu tacha klhitapasal laka Antiokía ali Ikonio kun Listra, tachun anchanu maqanlqajnati, pero ni Jalhachimoʼonu Dios kimalaqtaxtul. 12Vachu tachun ni lapanakni yu tatoʼoyaputun Dios la ixjatsukuntikʼan chʼantaun kun Cristo Jesús, yuʼuncha katamajkʼatsayaʼ. 13Yu jalaktuʼunun lapanakni yu tamakanunun, yuʼuncha apalay katatapʼasniyaʼ makanan yu jantu ox, katataylhaanaʼ jamakanunun y vachuʼ kalakmakanukanaʼ. 14Pero uxintʼi ox kʼatʼaylhipʼi kun yu lanitʼacha. Mispʼaycha taʼayucha masunin, xlhiyucha kʼatsʼay ni va laqsaval. 15Tus tejkan lakatʼuniykaʼ ixʼunitʼa uxintʼi mispʼatʼicha tacha tsʼoqkanta la ixchivinti Dios. Ixchivinti lay malakpastakniyan para kʼapʼulaqtʼaxtʼu por kalhakʼapʼupʼi ni Cristo Jesús. 16Tachun yu ancha tsʼoqkanta va minchal kun Dios y aqtayjuyan para lay kʼalakmalanin y para kʼalakmakʼatsʼanitʼi ixlaqtaqalkʼan y para kaxaʼalatʼi tejkan jantu ox tamakay y para kʼalakmasunin tacha ox katijuntayal. 17Ex chuncha jantu katsʼanqanil tuʼuchun ni ixlapanaki Dios, va kalhitsukul tachun yu maqskʼiniy para lay kamakal tachun yu lajʼoxi.

will be added

X\