2 TESALONICENSES 3

1Chavaycha, ketʼalaqaunin, kʼatʼapʼayninitʼik Dios por kijnankʼan para tsʼalaj kaputaukʼal ixchivinti ni Jalhachimoʼonu Jesús y para ox kalaqaʼikal tacha uxiknan laʼaʼitʼik. 2Vachu kʼatʼapʼayninitʼik ni Dios para ox kaklaqxajchaʼau la ixtamakakʼan yu talaktuʼunun lapanakni yu jantu vas tamakay. Jantu tachun talhakapuʼan. 3Pero ni Jalhachimoʼonu Jesús yucha lay lhakapuʼanikan. Yucha katamaʼayajniyan y katalhistakʼan para jantu katamakanin yu jantu lajʼoxi. 4Kintamakʼatsaniyan ni Jalhachimoʼonu ni ox makʼayatʼik yu klalhijunau y katʼaylhipʼinapitik makanan. 5Ni Jalhachimoʼonu kataxtaqnin la melhanutkʼan ixjapaxkanti ni Dios y kamakal para ox kamaʼantʼaqnitʼik tacha maqantaqnil ni Cristo. 6Ketʼalaqaunin, klalhijunau la ixtaqaʼuti ni Jesucristo ni jantu katʼatʼiʼukxuntʼayatʼik milaqajkʼan yu malhaqnin yu jantu tamakaputun tacha klamasuniu. 7Kʼatsʼayatʼik ni maqskʼiniy kilalaqtsʼiʼiu yu xakmakayau tejkan xakvilanau kun uxiknan. Ox xaktapatsayau. 8Jantu aqtaun valiʼiy kajkʼuniu ixvaytkʼan matichun lapanaki. Va la pʼas xaktapatsayau mas tunkuj mas tsʼisni para jantu klalhimaqanchapuu xataʼayuʼ uxiknan. 9Mas ixkintapaxtoqniyan kaklaskʼiniu vayti jantu chuncha kakmakau va para kilalaqtsʼiʼiu tacha kijnankʼan y vachu chun katʼiʼuntʼayatʼik. 10Tejkan xaklatʼavilanau, klalaqputeʼeniu yu inchine: Yu jantu tapatsaputun, yucha jantu maqskʼiniy kavayl. 11Chavay ijqasmakvi va lati kun uxiknan jantu talakanajun lhitapatsa pero talakanajun katatanul taʼan jantu jamaqskʼinikan. 12Ni yuʼuncha klaklhijunau la ixtaqaʼuti ni Jalhachimoʼonu Jesucristo ni oxamaktaun katatapatsal para kaʼalil ixvaytkʼan yu kataʼul. 13Uxiknan, ketʼalaqaunin, jantu aqtaun katachaanin kʼamakʼatʼik yu lajʼoxi. 14Incha matichun jantu makaputun tacha yu aniy klatsʼoqniyau ex kʼamakʼatʼik kuenta y jantu katʼatʼiʼukxuntʼayatʼik, para chuncha kamaxanal. 15Pero jantu kalaqtsʼintʼik tacha tʼalaxkayaʼ kaval. Kʼalaxaʼalatʼik tacha tʼalaqajun para jantucha chun kalal. 16Va si oxamaktaun katamakan ni Jalhachimoʼonu mas va tisuncha yu katapasayacha. Va tatʼaʼalintan ni Jalhachimoʼonuʼ mintachunkʼan. 17Chavaycha kitʼin Pablo klatsʼoqniyau la kimakaʼ taun jamastakʼanti. Va chuncha ikmakay tachun kinkartas yu klaqmalaqachay, chuncha iktsʼoqnun. 18Katamapaynin mintachunkʼan ni kiJalhachimoʼonukʼan Jesucristo. Chuncha kavalcha.

will be added

X\