2 TESALONICENSES 2

1Chavaycha, ketʼalaqaunin, va iknajun kakʼatsʼatʼik tas kunaʼ tejkan kaminchoqoyaʼ kiJalhachimoʼonukʼan Jesucristo y katʼataqxtoʼau. Klatapayniniyau, ketʼalaqaunin, 2ni jantu katʼalhanantʼik y jantu kamaʼaninintʼik mas lati tanajun tapasatacha ni julchan tejkan ixmil ni kiJalhachimoʼonukʼan. Ka va lay qayntaun najun ni chuncha najun ni Espíritu, ka va lay najun ni chuncha laqputeʼekan, ka va lay tanajun ni chuncha iknajuu kijnankʼan laka karta. 3Pero jantu matichun katamakanun. Pʼunaj maqskʼiniy kachil ni julchan tejkan kataʼakchʼintamayaʼ ixchivinti Dios y katasuyaʼ yu maqtaqalhini lapanaki. Ni yucha kalaktʼilhikanaʼ ixjatsukunti. 4Kalakxkayʼoyaʼ tachun yu mispakan tacha Dios y tachun yu toʼoyakan. Yucha kataulaʼ la ixchaqaʼ Dios y kanaunaʼ ni yucha va Dios junita. 5¿Jantu pʼastʼakʼatʼik tejkan kitʼin xaklatʼavilanau y chuncha klalaqputeʼeniu? 6Uxiknankʼan mispʼayatʼik yu jantukaʼ makajun para katasul ni anchanu maqtaqalhini lapanaki. Jantu katasuyaʼ tus tejkan kachilcha ixjulchan tejkan paxtoqniy katasul. 7Chavaycha mas jantu mispakan, tʼajun tapatsan yu talaqalhin. Pero alin taun tapʼasta yu laktanchaniy yu ay talaqalhin. Pero kaminaʼ julchan kataxtuyaʼ yu ox tapʼasta, ex chuncha kaʼalina yu ay laqtaqal. 8Ex chuncha katasuyaʼ yu ay maqtaqalhiniʼ lapanaki. Pero ni Jalhachimoʼonu Jesús kamaqniyaʼ kun ixʼun y kalaktʼilhiʼoyaʼ por yu qalpʼas ixmaklku tejkan kaminchoqoyaʼ. 9Katasuyaʼ ni anchanu maqtaqalhini lapanaki por ixlhitapatsa ni Satanás. Kalhitsukuyaʼ ay tapʼasta y kamasuyaʼ lajʼay axtoqnuʼ yu makanunun. 10Chuncha por ixlaqtaqal ni anchanu lapanaki va kalakmakanuyaʼ ni lapanakni yu katalaktʼilhiyaʼ, va por jantu kataʼachanil yu laqsaval y xlhiyucha jantu lay katalaqtaxtul. 11Xlhiyucha ni Dios makay para kalakmakanukal para katalhakapuʼal yu jantu laqsaval. 12Ex chuncha kalakmukʼanikanaʼ ixlaqtaqalkʼan tachun yu jantu katalhakapuʼal yu laqsaval y vachu yu ayaj tamaqamay talaqalhin. 13Pero uxiknankʼan, ketʼalaqaunin, yu Dios tapaxkayan. Kijnankʼan maqskʼiniy kakxtaqniʼalhiu lhimalaqpuchuncha ni Dios. Yucha pʼunaj talaksaktan para kʼalaqtʼaxtʼutʼik. Chuncha val por ixlhitapatsa ni Espíritu Santo la metsukuntikʼan para ixlapanakni Dios kʼaʼuntʼik, vachu por lhakʼapʼupʼintʼik yu laqsaval. 14Ni Dios tajuntaʼin por yu ox chivinti yu klalaqputeʼeniu para ay katamakan kun kiJalhachimoʼonukʼan Jesucristo. 15Xlhiyucha, ketʼalaqaunin, ox katʼaylhipʼintʼik y jantu kakʼauktʼik yu lanitʼik, mas yu klamasunitau la milakaʼukxpukʼan u mas va laka karta. 16Kintapaxkayan kiJalhachimoʼonukʼan Jesucristo ali kimPay Dioskʼan. Mas va tavanancha kintamalakaʼulayan y kintamakaniyan yu lajʼoxi para lay kapakxanʼiu yu kaʼalinaʼ. 17Ikskʼinau ni Dios para katamalakaʼulan y katamaʼayajnin para vas kachʼivinintʼik y vachuʼ kamakʼatʼik yu lajʼoxi.

will be added

X\