2 TESALONICENSES 1

1Yu kijnankʼan, Pablo ali Silvano ali Timoteo, aniy klatsʼoqniyau taun chivinti uxiknan yu oqxlaqtaun ixlapanakni untʼatʼik yu kimPay Dioskʼan kun kiJalhachimoʼonukʼan Jesucristo laka putaulan Tesalónica. 2Katamapayanin y oxamaktaun katamakan kimPay Dioskʼan ali kiJalhachimoʼonukʼan Jesucristo. 3Ketʼalaqaunin, maqskʼiniy kakxtaqniʼalhiu lhimalaqpuchuncha ni Dios por uxiknankʼan. Va ayʼan milhakapuʼatkʼan y vachu apalay ox lapʼaxkʼayatʼik mintachunkʼan. 4Kijnankʼan klalhichivinanau uxiknankʼan mas va toʼoxtaycha tataqxtoʼa yu talhakapuʼan Dios. Ox tʼayaniyatʼik y ox lhakʼapʼupʼinatʼik mas tamamaqanlqajnivayan alati lapanakni y mas va la lhitaʼay metsukuntikʼan. 5Chuncha ox kintamasuniyan ni Dios ox jalakpuxkaulaqtsʼinin ni lapanakni yu tamakay. Yucha tamakayan para katapaxtoqnin kʼatʼanutʼik taʼan lhachimoʼonun, va por yucha maʼanlʼajnanatʼik. 6Vachu najun tapaxtoqniy kalaqxtaqnil ixmaqanlqajnatkʼan yu tamamaqanlqajnivayan. 7Yu kijnankʼan yu maqanlqajnantau va kintaxtaqniyan taun jastaknati para oxamaktaun kaʼaliu. Chuncha kunaʼ tejkan katasuyaʼ laktʼiyan kiJalhachimoʼonukʼan Jesucristo kun yu laqpʼaysnin ixmayulnin. 8Katasuyaʼ kun ay jikmi y kalakmukʼaniyaʼ ixmaqanlqajnatkʼan por ixlaqtaqalkʼan yu jantu katamispal ni Dios y jantu kataqalasmaklhi ni ox chivinti yu lhichiviniy kiJalhachimoʼonukʼan Jesús. 9Kalakmukʼaniyaʼ ixmaqanlqajnatikʼan yu kamamiʼonil ixjatsukuntikʼan mas va tavanancha. Chuncha jantu aqtaun katatʼaʼalinaʼ ni Jalhachimoʼonu yu ayaj ox, yu lhitʼajun tachun tapʼasta. 10Ni anchanu julchan tejkan kaminaʼ kiJalhachimoʼonukʼan va ay katamakayaʼ tachun ixlapanakni, katatoʼoyayaʼ tachun yu talhakapuʼan. Vachu ancha kaʼalinapitik ni uxiknankʼan por lhakʼapʼupʼintʼik yu klalaqputeʼeniu. 11Xlhiyucha klalhitapayniʼalhiyau ni Dios por uxiknan para katʼiʼukxuntʼayatʼik tacha tapaxtoqniy ixlapanakni yu lakjuntaʼiy. Vachu kskʼinau Dios para kataxtaqnin ixtapʼasta. Ex lay kamakʼatʼik ni lajʼoxi yu makʼapʼutʼunatʼik por lhakʼapʼupʼinatʼik. 12Ex chuncha por metsukuntikʼan katoʼoyakanaʼ ixtaqaʼuti kiJalhachimoʼonukʼan Jesucristo. Vachu yucha kamakayaʼ para kʼatʼoʼoyakʼantʼik. Lajʼoxi tamapayniyan kiDioskʼan ali kiJalhachimoʼonukʼan Jesucristo.

will be added

X\