2 PEDRO 3

1Uxiknankʼan yu klapaxkayau, aqtauncha klatsʼoqniu y chavaycha aaqtauncha klatsʼoqnichoqoyau. Va klaxtaqniyau jatapastakʼati, para ox kapʼastʼakchʼoʼotʼik 2yu ixtanajun ni lapanakni yu maqancha ixtalaqputeʼey ixchivinti Dios. Vachu kapʼastʼakchʼoʼotʼik yu lhinaul ni Jesucristo yu kiJalhachimoʼonukʼan y kiJamalaqtaxtunukʼan. Yucha tajunchoqon ni lapanakni yu jalaqmalaqachal. 3Pʼunaj maqskʼiniy kakʼatsʼatʼik tejkan va laycha kamiʼol ni lakamunukpaʼ, kaʼalinaʼ lapanakni yu katamakayaʼ yu yuʼuncha tamakaputun. Katalaktanchayaʼ yu ox chivinti. 4Katanaunaʼ: “Yucha naul ni kaminchoqoyaʼ pero, ¿tisuncha tapasaycha? Jantu aqtaun minchoqoy. Kepayankʼan tanitacha y tus va maqancha tejkan aqtaynil ni lakamunukpaʼ va tacha taylhaʼantacha.” 5Pero yuʼuncha jantu tamakaputun kuenta yu inchineʼ. La maqancha ni lakamunukpaʼ kun laktʼiyan va ixchivinti Dios puʼalil. Ni lakatʼun va xajchal xlhiʼakpuʼ ni xkan, va xkan putsukuy yu alin lakatʼun. 6Va xkan pulaqmixlhi ni anchanu lakamunukpaʼ tejkan aqlamaʼol lakatʼun. 7Vachu kun anchanuʼ ixchivinti Dios, ni laktʼiyan ali lakamunukpaʼ yu chavaycha alin va lhilkamaʼakanta para katalaqmixlhi. Katalaqmixaʼ kun jikmi tejkan kalaqchaanaʼ ni anchanu julchan. Ex kalakmukʼanikanaʼ ixlaqtaqalkʼan ni lapanakni kun ixmaqanlqajnatkʼan. 8Uxiknan yu klapaxkayau, jantu kakʼauktʼik yu aniy. Ni Jalhachimoʼonuʼ Dios makay taun julchan va tacha taun mil jachʼitin y taun mil jachʼitin va tacha paqtaun makay. 9Ni Jalhachimoʼonu Dios jantu taqmaqay para kamakal yu naul kamakayaʼ, mas lati talhilay chun taqmaqay. Yucha jantu najun matichun katsʼanqal, xlhiyucha va maqantʼaqniy kun kijnan. Va najun tachun katamapaxal ixjatapastakʼatkʼan. 10Jantu matichun kʼatsay tavanancha kaminchoqoyaʼ ni Jalhachimoʼonuʼ, vachu chun tacha jantu matichun kʼatsay tavanancha kaminaʼ qayntaun alhavanaʼ laka putsʼisniʼ. Ni laktʼiyan va tus pʼays qolun kamakatʼaunaʼ ex kamiʼoyaʼ. Tapuchux kalaqxauʼoyaʼ. Ni lakatʼun kun tachun yu ancha lakmakakanta kalaqmixaʼ kun jikmi. 11Ex chuncha tachun kalaqmixʼoyaʼ, xlhiyucha uxiknan ayaj maqskʼiniy katʼiʼukxuntʼayatʼik tacha ixlapanakni Dios yu ox tatoʼoyay. 12Kapʼakxanʼitʼik ni julchan tejkan kaminchoqoyaʼ Dios. Kalhilaqltʼapʼatsʼatʼik para apalay tsʼalaj kamil. Anchanuʼ julchan ni laktʼiyan kalaqmixaʼ kun jikmi. Pʼays katsʼasaʼ, tus tachun axtoqnuʼ kalaqxtʼajʼoyaʼ. 13Pero kijnan kʼatsayau yu Dios naul kamakayaʼ. Xlhiyucha pakxanʼitau taun sastʼi laktʼiyan kun sastʼi lakamunukpaʼ. Ancha kaʼalinaʼ vamun yu Dios ox laqtsʼin. 14Xlhiyucha, ni uxiknan yu klapaxkayau yu pʼakxanʼiyatʼik ni anchanu julchan, katʼamaqxtʼaqtʼik ni jantu kʼalhitsʼukʼutʼik talaqalhin. Jantu kaʼalil milaqtaqalkʼan para oxamaktaun katʼiʼukxuntʼayatʼik anchanuʼ julchan. 15Kʼamakʼatʼik kuenta ni kiJalhachimoʼonukʼan maqantaulay para lay kʼalaqtʼaxtʼutʼik. Ni Pablo kintʼalaqajunkʼan yu paxkayau, yucha vachu va chuncha tatsʼoqnin kun ixjatapastakʼati yu xtaqnil Dios. 16Chuncha najun kun tachun ixkartas yu tsʼoqlhi. Ancha xantaʼan alin chivinti yu lhitaʼay para kʼamalaʼasitʼi. Alin lapanakni yu jantu ox talakpastaknan y jantukaʼ ox talhakapuʼan. Yuʼuncha jantu vas tamasuchoqoy yu tsʼoqlhi ni Pablo, vachu jantu vas tamasuy yu alati ixchivinti Dios. Chuncha tamaxajniyachal ixmaqanlqajnatkʼan. 17Ni uxiknan yu klapaxkayau, va kʼatsʼayatʼikcha tachun yu aniy. Xlhiyucha kʼalhistʼakkʼantʼik para jantu katamakanun kun ixchivintikʼan ni lapanakni yu jantu tatalhauniy ixlhachimoʼon Dios. Jantu kʼalhitʼamakʼauntʼik taʼan ox alintʼatʼik kun Dios. 18Katʼaylhipʼintʼik la ixjapaxkanti kiJalhachimoʼonukʼan y kiJamalaqtaxtunukʼan Jesucristo. Katʼaylhipʼintʼik mispanan ni yucha. Yucha ay kamakakal mas va chavaycha y mas va tavanancha. Chuncha kavalcha.

will be added

X\