2 JUAN 1

1Kitʼin va yu xaʼay kunita siya yu talhakapuʼan. Va iktsʼoqniyan aqxtaun karta ni uxintʼi yu xanati yu laksaktan ni Dios, kun tachun mesʼatʼan. Va laqsaval klapaxkayau pero jantu vamun ni kitʼin. Tachun yu tamispatacha yu laqsaval vachu tapaxkayan. 2Ayaj klapaxkayau ni uxiknankʼan, va lhitʼaunau la kelhanutikʼan yu laqsaval. Yucha kaʼalinaʼ kun kijnankʼan mas va tavanancha kaval. 3Ni kimPaykʼan Dios y vachu yu Sasʼatʼa kiJalhachimoʼonukʼan Jesucristo va kataxtaqniyan yu lajʼoxi y katamapayniyan y vachu oxamaktaun katamakayan. Ex chuncha lay katʼaylhipʼintʼik kun yu laqsaval y lay kʼalapʼaxkʼatʼik. 4Chavay klhiʼachantajuy ni klaqpaxtoqlhi lati mesʼatʼan yu tataylhaʼan kun yu laqsaval vachu chun tacha kintalhijunin ni kimPay Dioskʼan. 5Chavay, kintʼalapanaki yu ayaj iktoʼoyayan, iktapayniniyan ni kalapaxkau. Ni aniy lhachimoʼon yu klatsʼoqniyau jantu saystʼi kaval, vanaj va yuʼ yu laqaʼiu pʼunaj tejkan puʼaqtaynil lhakapuʼanau. 6Yu laqsaval japaxkanti alin tejkan tsukuyau makanan ixlhachimoʼon ni Dios. Ixlhachimoʼon ni Dios va yucha yu asmaktʼik tejkan puʼaqtʼaynitʼik milhakapuʼatikʼan, va katʼiʼuntʼayatʼik japaxkanan. 7Chavay ayaj lhuu jamakanunun tatijuyanal ni lakamunukpaʼ. Yuʼuncha tanajun ni Jesucristo jantu kamil tacha qayntaun lapanaki. Yu chuncha najun, yucha va jamakanunuʼ y vachuʼ va xkajiy ni Cristo. 8Ox kʼalhistʼajkʼantʼik para kʼalaʼaʼitʼik milhilhajatikʼan yu tapaxtoqniyan. Jantu kʼamaʼatsʼanʼatʼik milhilhajatikʼan yu kaʼalinaʼ por milhitapatsakʼan. 9Taʼayuʼ yu tumpaj makaputun y jantu taylhaʼan yu tacha masul ni Cristo, ex ni yucha jantu katʼatijuntayal ni Dios. Pero taʼayu yu makay yu tacha masul ni Cristo ex ni yucha tʼatijuyal kun kimPay Dioskʼan, y vachu kun Cristo yu Sasʼatʼa. 10Incha matichun talaqʼanchaʼan y jantu tamasuniyan tacha lhinajun Cristo, ex jantu kʼalaʼaʼitʼik la minchaqakʼan y jantu kʼamastʼakʼatʼik. 11Yu laqaʼiy, ex va tacha chʼantauncha tʼajun kun yucha. 12Ayaj lhuu chivinti klhitʼajun yu klajunputunau, pero jantu klatsʼoqniputunau kun jalhiki. Va klalaqʼuxanachaʼau para kaklatʼachiviniu kun laka ukxpuʼ. Ex chuncha kataqayntsal kiʼachatkʼan. 13Vachu tamalaqachaniyan taun jamastakʼanti yu sasʼatʼan mintʼalapanakni yu jalaksakta ni Dios. Chuncha kaval.

will be added

X\