2 CORINTIOS 9

1Chavaycha yu ixʼaqtayjuka ixlapanakni ni Dios jantu maqskʼiniy kaklatsʼoqniu. 2Kitʼin ijkʼatsay ni ayaj laqʼaqtʼayʼupʼutʼunatʼik y chuncha klakjunil yu machaqan Macedonia. Va klakjunil ni uxiknan yu machaqan Akaya untʼatʼik mas kʼatacha ayaj ixʼaqtʼayʼupʼutʼunatʼik. Ex chuncha lhixajachal ni qaynlhuu yuʼuncha vachu ayaj taʼaqtayjuputul. 3Chavaycha klamalaqachaniyau ni aniy tʼalaqaunin para listujcha kʼaʼuntʼik tejkan kaktapasayaʼ para kaʼaqtʼayʼununtʼik tacha klalhichiviniu para jantu valiʼiy kaval kinchivinti yu klakjunil. 4Incha kintatʼaʼanaʼ lati yu machaqan Macedonia y katalaqtsʼinan ni jantukaʼ listus untʼatʼik ex va lay kaktamaxaniu. Va ox xaklalhakapuʼaniyau y vachu uxiknan va lay katʼamaxaniyapitik. 5Xlhiyucha ikpastaklhi para klamalaqachaniu ni tʼalaqaunin para pʼunaj katalaqʼanchaʼan para kataʼaqtayjun ixpusakka yu ixnaunatʼik kaxtʼaqyapitik. Ex chuncha va para listujcha kaʼalil tacha yu laqsaval lhuu xtʼaqpʼutʼunatʼik y jantu katasul por laqatapʼasta xtʼaqyatʼik. 6Kʼamakʼatʼik kuenta, yu tsʼuniy chʼan va tsʼuniy xqaʼiy, yu lhuu chʼan va lhuu xqaʼiy. 7Qayntamin tsʼanqay kataxtaqlhi yu tacha tapastakʼa la ixjalhanutkʼan pero jantu laqatapʼasta y jantu va por maqskʼiniy. Ni Dios paxkay yu xtaʼa laqa achati. 8Ni Dios lay kataxtaqnin tachun yu lajʼoxi para kaʼalinʼalhil tachun yu maqskʼiniyatʼik para lay lhuu kaʼalil yu lay kaxtʼaqtʼik para tachun ox lhitapatsa. 9La ixchivinti Dios najun: Jalaqlvaqnil yu tamaqskʼiniy ni kilpatanin. Va si ox makay mas va tavanancha. 10Ni Dios xtaqniy xatʼin ni lapanaki yu chʼan y vachu xtaqniy yu uy. Ex vachu kataxtaqniyan uxiknan tachun yu maqskʼiniyatʼik y katalalhavaniyan. Chuncha kataʼaqtayjuyan para lay ox kaxajchal milhitapatsakʼan. 11Ni Dios kataxtaqniyan mimaqalitkʼan para lay lhuu kʼaxtʼaqtʼik. Ex chuncha por yu kaxtʼaqyapitik, qaynlhuu kataxtaqniyaʼ lhimalaqpuchuncha ni Dios. 12Tejkan kaklaklhaʼaniyau yu kaxtʼaqyapitik, ox kalaqʼaqtayjukanaʼ pero jantu vamun yuʼ. Vachu apalay lhuu kataxtaqniyaʼ lhimalaqpuchuncha ni Dios. 13Tejkan chuncha kʼamakʼayapitik ex qaynlhuu ay katamakayaʼ ni Dios. Va por ox alasmaktʼik ni ox chivinti yu lhichiviniy ni Cristo. Vachu ay katamakayaʼ Dios por ox jalaqxtʼaqniyatʼik yu tamaqskʼiniy y por ox laqʼaqtʼayʼuyatʼik yu alati. 14Vachuʼ kataskʼiniyaʼ Dios por uxiknan y kataʼachaniyan por yu ay jamapayninti yu taxtaqnin ni Dios. 15Kaxtaqniu lhimalaqpuchuncha ni Dios. Jantu tuʼuchun kaval tacha ixjamapayninti yu kintaxtaqnitan.

will be added

X\