2 CORINTIOS 6

1Ex chuncha kijnan chʼantaun iktʼatapatsayau ni Dios. Va klalhijunau jantu valiʼiycha kamaʼatsʼanʼatʼik yu taxtaqniputunan ni Dios. 2La ixchivinti Dios najun: Kitʼin klaqasmakniu minchivintikʼan tejkan klamakaniu yu ox. Klaʼaqtayjuu para kaklamalaqtaxtuu. Kʼamakʼatʼik kuenta. Va chavaycha ni Dios tamakaniputunan yu ox. Va chavaycha tamalaqtaxtuputunan. 3Va iknaunau jantu matichun kintalhilaqʼeman kilhitapatsakʼan. Xlhiyucha jantu tuʼuchun ikmakayau yu jantu ox katalhilal ni lapanakni. 4Mas va tisuncha yu klhitapasayau klakmasuniyau ni lapanakni ni laqsaval iktapatsaniyau ni Dios. Va ox iktayaniyau mas tejkan ikmaqanlqajnanau, mas ayaj kintatsʼanqaniyan tuʼuchun, mas ayaj lhitaʼay kaval, 5mas kintalaqanaqmayan, mas kintachʼiyan, mas talakchʼiliy ni lapanakni, mas pʼays iktapatsayau, mas aqtamix jantu ikltatayau u jantu ikvaynau. 6Vachu klakmasuniyau ni iktapatsaniyau ni Dios por ox kimputsukukʼan, por yu jatapastakʼati yu klhitʼaunau, por ox ikmaqantaqniyau, por lajqalʼoxin kuntau, por yu Espíritu Santo yu alin kun kijnankʼan, y por kijapaxkantikʼan yu jantu tʼuy ukxpuʼ makay. 7Va klaqputeʼeyau yu laqsaval chivinti, iktiʼukxuntayau kun ixtapʼasta ni Dios. Ikmapatsayau yu kintaxtaqniyan Dios para ox kintalaqtsʼinan. Chuncha lay ikpumaqalhajayau y ikputanchastukʼau yu jantu ox. 8Aqtamix kintatoʼoyayan, aqtamix jantu. Aqtamix ox kintalhichivinanan, aqtamix jantu ox. Aqtamix kintajunan va jamakanunun kuntau mas ikchivinau yu laqsaval. 9Lati kintamakayan tacha jantu kintamispayan mas ox ikmispakanau. Iktaylhaʼanau tsukunun mas va laycha kakniu, kintamamaqanlqajnivayan pero jantu kintamaqniyan. 10Mas ikmaqanininau pero va tacha klajʼachanaucha. Tacha kilpatanin kuntau pero qaynlhuu klakmakayau maʼalinin kun Dios. Va tacha jantu tuʼuchun kaklhitsukuu pero tachun ikmaqalinau. 11Ketʼalaqaunin yu machaqan Corinto untʼatʼik, klajunʼoyau para kʼamispʼatʼik tachun yu kʼukskʼatsayau la kelhanutkʼan. 12Kijnankʼan jantu klamaqsaqmakaniu ni klapaxkayau la kelhanutkʼan. Pero uxiknan kilamaqsaqmakaniyau mijapaxkantikʼan la melhanutkʼan. 13Klatapayniyau tacha kesʼatʼanin kʼaʼuntʼik ni kilamasuniu melhanutkʼan vachu va tacha klamasuniu kijnan. 14Jantu chʼantaun kʼaʼuntʼik kun yu jantu talhakapuʼan Jesucristo. Jantu lay chʼantaun kataval yu vas makay kun yu jantu vas makay. Jantu lay chʼantaun kataval yu lhitʼajun ixmaklku Dios kun yu tiʼukxuntayay laka putsʼista. 15Jantu lay chʼantaun kataval la ixjatapastakʼatkʼan ni Cristo kun yu Satanás, vachu jantu lay chʼantaun kataval ixjatapastakʼatkʼan qayntaun yu lhakapuʼan kun aqayntaun yu jantu lhakapuʼan. 16Jantu lay chʼantaun kataval ixchaqaʼ ni Dios kun yu antivas. Kijnan va ixchaqaʼ ni Dios juntau yu laqsaval kujta. Chuncha najun ni Dios la ixchivinti: Kitʼin kaktsukuyaʼ y kaktijuntayayaʼ kun yuʼuncha. Kitʼin kajkʼunaʼ ixDioskʼan y yuʼuncha va kilapanakni katajunaʼ. 17Vachu najun ni Jalhachimoʼonu Dios: Kʼalajʼosmajʼantʼik yu tamaqtaqalhinin, tumpaj kʼaʼuntʼik. Jantu kʼamakʼatʼik yu jantu lajʼoxi. Ex kitʼin kaklalaqaʼiyau. 18Ex kitʼin kajkʼunaʼ mimPaykʼan, yu uxiknan kintsʼalan ali kintsiʼin kaʼunapitik. Chuncha najun ni Jalhachimoʼonu Dios yu lhitʼaunʼojoy tachun tapʼasta.

will be added

X\