2 CORINTIOS 5

1Chavaycha ni kilakatunajkʼan va tacha aqataun pakʼatsa. Mas kataqtalcha, kʼatsayau ni Dios kintamakanitan ox chaqaʼ laktʼiyan, yu jantu katamakal lapanakni y jantu aqtaun kamiʼoyaʼ. 2Chavaycha jatʼijnintau y ayaj klhilakatayaputunau la ketsukuntikʼan yu xalakatunaj laktʼiyan. 3Chuncha tejkan kalhitsukuyau ni anchanu lakatunaj va tacha kintaʼulaniyan sastʼi laqchʼiti para jantucha maqaʼasas kaval ketsukuntikʼan. 4Tejkan tsukuyaukaʼ aniy la kilakatunajkʼan yu tacha pakʼatsa junita laqsaval lhamaqanininau. Jantu va por kintachanin yu aniy kilakatunajkʼan. Va ayaj lhitsukuputunau yu sastʼi kilakatunajkʼan. Ex chuncha kilakatunajkʼan yu kaniyaʼ lay kamapaxanikanau kun yu jantu aqtaun kamiʼoyaʼ. 5Ni Dios listuj kintamakan para kaklhitsukuu sastʼi jatsukunti. Yucha kintaxtaqnitan ni Espíritu Santo yu pukʼatsayau ni laqsaval chuncha kintamakaniyan. 6Xlhiyucha kʼatsayau ni ox kaxajtachal. Kʼatsayau ni tejkan vananaj aniy tʼaunau la kilakatunajkʼan jantu lay tʼataulau ni Dios kiJalhachimoʼonukʼan. 7Mas chavaycha jantu lay laqtsʼinau, va taylhaʼanau la kilhakapuʼatkʼan. 8Ox kʼatsayau ni ox kaxajtachal y apalay ox lhilayau kamakajuu yu aniy kilakatunajkʼan y katʼataulau kiJalhachimoʼonukʼan. 9Ex chuncha mas tʼataulau u mas maqati vilanau va si makaputunau yu lhiʼachantajuy ni yucha. 10Kintachunkʼan tsʼanqay kalaqʼau ni Cristo la ixpalhachimoʼon. Ancha kalaqaʼiyau yu kintapaxtoqniyan por yu makayau yu aniy la kilakatunajkʼan, mas va yu ox o yu jantu ox. 11Xlhiyucha ox toʼoyayau ni Jalhachimoʼonuʼ y jalaqxaqalayau ni lapanakni para katalhakapuʼal. Ni Dios ox kintamispayan y kitʼin iknajun uxiknan vachu kilamispau. 12Jantu chuncha klajunau para lajʼay kakmakakau, va klajunau para kalhiʼachʼantʼaʼutʼik por yu ikmakayau. Ex lay kaʼaltʼaytʼik ni anchanu lapanakni. Yuʼuncha lajʼay jalakmakakan por yu tasuy, mas jantu lajʼoxi kataval la ixjalhanutkʼan. 13Incha lhilayatʼik ni va laklokos kuntau yucha va por ayaj iktapatsaniyau ni Dios. Incha jantu laklokos kajkuu yucha va para klaʼaqtayjuyau. 14Tachun yu ikmakayau va por kintapaxkayan ni Cristo. Ox ijkʼatsayau ni Cristo nil por kintachunkʼan y xlhiyucha va tacha kintachunkʼan vachu kaniucha. 15Va nilcha por kintachunkʼan para jantucha katsukuu makanan yu makaputunau kijnan. Va para katsukuu makanan yu najun ni yucha yu nil y kujchoqol por kijnan. 16Chavaycha jantucha kalaqlaqtsʼinau yu alati lapanakni tacha talalaqtsʼin yu valiʼiy lapanakni. Mas pʼunaj ni Cristo xaklaqtsʼinau va tacha yu ixtalaqtsʼin yu valiʼiy lapanakni. Pero chavaycha jantucha chun klaqtsʼinau. 17Chavay incha matichun chʼantaun tʼajun kun Cristo va sastʼi lapanaki junita. Va tapasaʼolcha yu ixʼalin la ixjatsukunti yu maqancha. Tachun va laqsastʼi junʼochoqol. 18Tachun yu anuʼ va minchal kun Dios. Va najun oxamaktaun katsukuu kun yucha. Xlhiyucha malaqachal ni Cristo. Vachu kintaxtaqnitan ni aniy lhitapatsa para oxamaktaun katatsukul yu lapanakni kun Dios. 19Ni Dios ixʼalinta la ixjatsukunti yu Cristo, va najun oxamaktaun katatsukul kun yucha xalapanakni ni aniy lakamunukpaʼ. Jantucha jalakmakaniy kuenta ixtalaqalhinkʼan. Vachu kintaxtaqnitan ni aniy lhitapatsa, va ixlaqputeʼeka ni ox chivinti para lay oxamaktaun katatsukul kun yucha ni lapanakni. 20Ni Cristo kintamalaqachatan kalaqlaqputeʼeniu ni lapanakni ixchivinti. Chavaycha klaxaqalayau va tacha ni Dios kataxaqalan. Va klajunau la ixtaqaʼuti ni Jesucristo ni oxamaktaun katsʼukʼutʼik kun Dios. 21Mas ni Cristo jantu aqtaun kamakal talaqalhin, ni Dios mukʼaniʼol tachun kintalaqalhinkʼan. Ex chuncha lay ox kajuu kun Dios la ketsukuntikʼan incha chʼantaun tʼajunau ni Cristo.

will be added

X\