2 CORINTIOS 4

1Ni Dios ayaj kintamapaynin y kintaxtaqnin ni aniy lhitapatsa yu ixlaqputeʼeka ixchivinti Dios. Xlhiyucha jantu ikmakauntijlayau makanan mas lhitaʼay. 2Jantu maqsaq ikmakayau tuʼuchun y jantu ikmakayau yu lhitamaxanikan, jantu klakmakanuyau lapanakni y jantu ikmapaxayau yu naunputun ixchivinti Dios. Vamun ox ikmasuyau yu laqsaval para lay kamalaqasikal. Chuncha klakmakʼatsaniyau ni lapanakni ni kintapaxtoqniyan ni aniy lhitapatsa y Dios kintalaqtsʼinan. 3Lati lapanakni jantu tamalaqasiy ni ox chivinti yu klaqputeʼeyau. Yu jantu tamalaqasiy va yu katatsʼanqayaʼ. 4Ni lapanakni yu jantu talhakapuʼan, yu xadios aniy lakamunukpaʼ va tacha laʼachʼixin jalakmakal la ixjatapastakʼatkʼan. Ex chuncha jantu lay katamalaqasil ni ox chivinti yu tacha kʼuliksnaʼ maklku yu masuy ixʼayaxtu ni Cristo. Yucha va aqstanchun junita tacha Dios. 5Jantu ay ikmakakanau, va klaqputeʼeyau ni Jesucristo va ni Jalhachimoʼonuʼ. Lakstʼuniy ikmakakanau tacha miʼoqxtamatkʼan por iktoʼoyayau ni Jesús. 6Va Dios yu pʼunaj naul kamaktayl maklku taʼan putsʼista. Vachu va yucha naul kamaktayl maklku la kelhanutkʼan para kamispau ixʼayaxtu ni Dios tejkan mispayau ni Jesucristo. 7Kijnan va tacha laqataun aqchoq yu makakan tʼun yu jantu xtapal. Pero ixʼayaxtu ni Dios yu manuta la ketsukuntikʼan va taun ay maqaliti. Chuncha tejkan ni lapanakni talaqtsʼin ixtapʼasta ni Dios yu alin la ketsukuntikʼan jantu kintatoʼoyan kijnan, va tatoʼoyay ni Dios. 8Mas si kintalhimaqchapuyan pero lay klaqtaxtuyau. Aqtamix jantu ijkʼatsayau tas kaklayaucha pero ijkʼatsayau ni ox kaxajtachal. 9Kintaxkaulhitsukuyan pero Dios jantu kintamakaunan. Va kintasalakaputayan pero jantu kintamaqniyan. 10Ni maqanlqajnati yu klhitsukuyau la kilakatunajkʼan va tacha ixmaqanlqajnati ni Jesucristo tejkan nil. Pero iktaylhaʼanau y chuncha vachu tasuy ixjatsukunti ni Jesucristo la kilakatunajkʼan. 11Tejkan aniy iktʼaunau va si kintamaqniputunan por iktapatsaniyau ni Jesucristo. Ex chuncha xajachal ni va tasuy ixjatsukunti ni Jesucristo la kilakatunajkʼan mas kakniyau. 12Ex chuncha ikmaqanlqajnanau tus va laycha kakniu pero yu uxiknankʼan lhixajachal para katsʼukʼutʼik. 13Ixʼalin qayntaun yu tsʼoqlhi la ixchivinti Dios, va naul: “Klhakapuʼal y xlhiyucha ikchivinil.” Vachu va chuncha kilhakapuʼatkʼan. Klhakapuʼanau y xlhiyucha ikchivinanau. 14Ijkʼatsayau ni Dios majkujuchoqol ni Jalhachimoʼonu Jesús. Vachu kijnan va chʼantaun kun Jesucristo. Xlhiyucha taun julchan kintamajkujuchoqoyan kijnan kun Jesús. Ex kintalhaʼanan chʼantaun kun uxiknan taʼan vilchal. 15Tachun kimaqanlqajnatkʼan va por uxiknan. Chuncha talhavay ni lapanakni yu jalaqxtaqnikan ni lajʼoxi yu kintaxtaqniyan Dios. Vachu apalay qaynlhuu kataxtaqniyaʼ lhimalaqpuchuncha y katatoʼoyayaʼ ni Dios. 16Xlhiyucha jantu kintachaniyan. Mas kilakatunajkʼan miʼojoy yu ketsukuntikʼan va lhilhiy tasastʼiʼan. 17Chavaycha va taun panchʼix ikmaqanlqajnanau tsʼuniy. Yucha kaxajtachal ni kaklhitsukuyau yu ayaj ox yu jantu aqtaun kamiʼoyaʼ, yu apalay ay xajantu yu maqanlqajnati. 18Jantu ikmakayau kuenta tachun yu tasuy, va ikmakayau kuenta yu jantu tasuy. Yu tasuy aniy lakamunukpaʼ va panchʼix alin y niman kamiʼoyaʼ pero yu jantu tasuy yucha kaʼalinaʼ mas va tavanancha.

will be added

X\