2 CORINTIOS 3

1Tejkan chuncha iknaunau ka va pʼastʼakʼatʼik ni kijnankʼan va keʼemankʼan ay ikmakachoqokanau. Jantu maqskʼiniy kaklhitsukuu aqxtaun karta yu kaklaxtaqniu yu kilapumispau y vachu jantu maqskʼiniy klaskʼiniu aqxtaun karta. 2Pero uxiknan va kinkartajkʼan untʼatʼik. Metsukuntikʼan va tacha katsʼoqʼulakal la kelhanutkʼan. Ex tachun ni lapanakni lay tamispaniyan metsukuntikʼan. 3Uxiknan va tacha aqxtaun karta untʼatʼik yu tsʼoqlhi ni Cristo yu kijnan klhaʼoxiu tejkan klalaqputeʼeniu ni ox chivinti. Pero anchanu karta jantu kaputsʼoqkal tinta. Va putsʼoqkal ni ixʼEspíritu ni Dios yu kujta. Ni aniy karta jantu katsʼoqmukʼakal laqa ltaʼal chiyux, va tsʼoqmukʼakal la melhanutkʼan. 4Chuncha ijkʼatsayau va por klhiʼaynau ni Dios por yu makal Jesucristo. 5Kijnan jantu lay iknaunau ni lay kakmakau tuʼuchun keʼemankʼan. Yu lay ikmakayau vamun por kintaʼaqtayjuyan ni Dios. 6Yucha kintaʼaqtayjuyan para lay kaklhitapatsau ixlaqputeʼeka ni sastʼi chivinti yu kintatʼatamakajun Dios. Anchanu chivinti jantu va ixlhachimoʼon Moisés yu tsʼoqkal, va yu xtaʼa ni Espíritu Santo. Ni chivinti yu tsʼoqkal, yucha mukʼay laqtaqal para kanikal. Pero ni Espíritu, yucha xtaʼa jatsukunti. 7Ni lhachimoʼon yu tsʼoqmukakal laqa ltaʼal chiyux xajchal lhinin pero va ayaj kʼus val. Tejkan Moisés laqaʼil, ox ukxpukʼuliksna val ni Moisés tus jantu lay katalaqapulaqtsʼil ni ixtʼaʼisraelitas, pero astan laqmixchoqol. 8Incha chuncha val yu anuʼ, ex apalay kʼus kʼunaʼ yu xtaʼa ni Espíritu Santo. 9La kʼus ixjunita tejkan Moisés laqputeʼel ni lhachimoʼon yu ixmukʼay laqtaqal. Ex apalay kʼus ixlaqputeʼeka ni chivinti yu kintamaqosuniyan kintalaqalhinkʼan. 10Chuncha yu ayaj kʼus ixjunita jantucha kʼus tacha yu chavaycha alin. Yu chavaycha alin va apalay kʼus. 11Incha la kʼus ixjunita yu miʼojotacha ex apalay kʼus yu alin chavaycha yu kaʼalinaʼ mas va tavanancha. 12Chuncha klhakapuʼanau y xlhiyucha klaqputeʼeyau ni chivinti jantu kun talhanti. 13Jantu chuncha ixtapasay kun Moisés. Yucha ixlaqpupaqakan kun laqchʼiti para jantu katalaqtsʼil ni lapanakni ni ixtʼajun laqmixniʼ ixʼukxpuʼ yu kʼuliksnaʼ ixjunita. 14Va talapʼaysnil ixjatapastakʼatkʼan ni anchanu lapanakni. Vananaj chavaycha tejkan taputeʼey yu maqaniyaʼ ixchivinti Dios va tacha vananaj kataukʼal laqchʼiti para jantu lay katalaqtsʼil y jantu katamalaqasil. Vamun ni Cristo lay maqosuy para katamalaqasil. 15Mas chavaycha tejkan taputeʼey ixchivinti Moisés va tacha vananaj kataukʼal para jantu lay katamalaqasil. 16Pero tejkan taspʼikchoqoycha qayntaun lapanaki para katʼaʼal ni Jalhachimoʼonu Dios ex va tacha kamoqosunikal ni laqchʼiti para lay kamalaqasil. 17Ni Jalhachimoʼonu Dios va Espíritu junita y taʼan alin ni Espíritu ancha alin lakatin para oxamaktaun katsʼukʼu. 18Ni tachun ni kijnan va tacha kamaqosunikaucha ni laqchʼiti para lay kalakavanau. Laqtsʼinau ixʼoxixtu ni Dios y chuncha kintamapaxalhaaniyan ketsukuntikʼan para ox kajuu tacha yucha. Va chuncha kintamakayan ni Jalhachimoʼonu Dios, va yucha ni Espíritu junita.

will be added

X\