1 Va knajun kamaʼantʼaqniyapitik kinchivinti mas kajkʼatsanaʼ tacha qayntaun tontoj tejkan kaklaxaqalayau. Klaskʼiniyau kamaʼantʼaqniyapitik. 2 Chavaycha klhixiyaxa va por jantu iknajun kʼalhipʼintʼik kun aputaun lhakapuʼati. Vachu chun tacha qayntaun tsʼal tejkan junkan kaxtaqnikanaʼ qayntaun jatsiʼi vachu chun kaklamaqxtaʼau la ixtamakaʼ ni Cristo y jantu kun milaqtaqalkʼan. 3 Ni tsapul yu ayaj jalakpastaknan makanul ni Eva. Uxiknan vachu lay katamapaxanin mijatapastakʼatkʼan para jantucha kamaqxtʼaqtʼik metsukuntikʼan la ixtamakaʼ ni Cristo. Xlhiyucha kilamaqsvayau. 4 Tejkan matichun chaanachal taʼan vilanantʼik va makʼayatʼik kuenta ixchivinti mas jantu vas talhixaqalayan tejkan lhichiviniy ni Jesús. Ex laʼaʼiyatʼik aputaun espíritu yu jantu va aqstanchun tacha yu laʼaʼitʼik kun kijnan. Vachu lhakʼapʼupʼinatʼik aputaun chivinti yu jantu ixlhakʼapʼupʼinatʼik pʼunaj. 5 Kitʼin iknajun ni anchanu lapanakni kun kitʼin, yuʼuncha jantu lajʼay kataval mas tanajun vamun yuʼuncha lajʼay tajunita kun yu laqmalaqachal ni Cristo. 6 Mas jantu kʼus ikchiviniy pero ox jatapastakʼati klhitʼajun tacha uxiknan kilamispaniyau. Va kʼatsʼayatʼik tacha klamasuniyau mas va tavanancha. 7 Kitʼin iknajun jantu ox kalhilatʼik tejkan klalaqputeʼeniu yu laqsaystʼi ixchivinti Dios por jantu kaklaskʼiniu tumin. Chuncha klakatʼuniy ikmakakal para lajʼay kʼaʼuntʼik uxiknan pero jantu ox lhilayatʼik. 8 Va klakmaxtunil ixtuminkʼan ixlapanakni Dios yu tavilanal alati putaulanaxna. Va kintaxtaqnil yu ixkintsʼanqaniy para lay kaklaʼaqtayjuu. 9 Tejkan xaklatʼavilanau mas kintsʼanqanil tuʼuchun jantu kaklaskʼiniu. Ni ketʼalaqauninkʼan yu ixtaminachal Macedonia, yuʼuncha ixkintaxtaqniy yu ixkintsʼanqaniy. Jantu aqtaun kaklamaqanchapuu y jantu aqtaun kaklamaqanchapuyau. 10 Ni kitʼin va si laqsaval ikchiviniy tejkan klhichiviniy Cristo. Laqsaval klajunau ni kitʼin va tacha oxicha ijkʼatsan mas jantu kaklaskʼiniu tumin por kilhitapatsa. Oxi ijkʼatsan por yu ikmakal ancha la xalakatʼun Akaya y jantu matichun lay kilaktanchaniy. 11 ¿Valiʼiycha chuncha klaxaqalayau? ¿Lhilayatʼik va por jantu klapaxkayau? Ni Dios kʼatsay ni ox klapaxkayau. 12 Kaktaylhaanaʼ makanaʼ yu ikmakay, kaklaqputeʼeyaʼ ixchivinti Dios mas jantu ikskʼin tumin. Ex chuncha ni anchanu lapanakni jantu lay lajʼay katakʼatsal, mas tanajun tamakay ixlhitapatskʼan va aqstanchun tacha kijnankʼan. 13 Yuʼuncha tanajun va Jesucristo jalaqmalaqachal pero jantu laqsaval kaval. Tamakanunun y talakatayay tacha lapanakni yu laqsaval jalaqmalaqachal ni Cristo. 14 Lhikʼatsancha ni aqtsʼiyaj va chuncha tapasay. Mas yu Satanás lakatayay tacha ixmayul Dios yu mapulkuy. 15 Xlhiyucha jantu taun lhilayau mas ixʼoqxtamatin ni Satanás talakatayay tacha ixʼoqxtamatin Dios yu ox tamakay. Astan yuʼuncha katamaqalchauyaʼ por yu jantu ox lhitapatsa tamakay. 16 Aaqtaun klajunchoqoyau ni jantu kilalaqtsʼiu tacha qayntaun tontoj. Mas chuncha kilalaqtsʼinau, va knajun kilalaqaʼiu mas tacha qayntaun tontoj. Ex chuncha lay ay kakmakakal mas va tsʼuniy por yu kaklajunau. 17 Tejkan ay ikmakakan jantu ikchiviniy tacha kachivinil kiJalhachimoʼonukʼan Jesús. Va ikchiviniy tacha qayntaun tontoj. 18 Alin lhuu lapanakni yu lajʼay jalakmakakan ixʼamankʼan por yu putsuku talhitʼajun aniy lakamunukpaʼ. Ex kitʼin vachu ay kakmakakanaʼ. 19 Kun achati laʼaʼiyatʼik ni anchanu lapanakni yu laktontos, tacha kalhitsʼukʼutʼik ox jatapastakʼati kʼatsʼanatʼik. 20 Uxiknan ox laʼaʼiyatʼik mas tamakayan tacha ixʼoqxtamatinkʼan, mas taʼuniyan yu maʼalinatʼik, mas tachʼapaniyan yu lhitʼaunatʼik, mas lajʼay takʼatsan, mas talakapusayan la miʼukxpukʼan, pero ox laʼaʼiyatʼik. 21 Ex ni kijnan klhixajachaʼau tacha kakmaxanau por kintatsʼanqaniyan tapʼasta para chuncha kaklamakau vachuʼ. Incha matichun ay makakan ixʼaman ex kitʼin vachu ay kakmakakanaʼ, mas kaxajchal kinchivinti tacha kachivinil qayntaun tontoj. 22 Yuʼuncha tachiviniy yu lhichivin Hebreo, kitʼin vachu. Yuʼuncha va israelitas, kitʼin vachu. Yuʼuncha tamintachal kun ixpaykʼan Abraham, kitʼin vachu. 23 Yuʼuncha tanajun ixʼoqxtamatin Cristo tajunita. Chavay kakchivinanaʼ tacha tontoj pero apalay ixʼoqxtamati Cristo kunita ni kitʼin. Apalay pʼays iktapatsaniy, apalay va tsaj ikmanukan laka pachʼin, ikmaqanaqkal aqlhuva tus jantucha lay puteʼekan, aqlhuva va laycha xaknil. 24 Ni israelitas yu jantu talhakapuʼan aqkis talhinaul kimaqanaqkal kun kuarta, tus treintainueve ixkintalaqayntsaniy aqtamin. 25 Aqtʼutucha kintamaqanaqlhi kun kʼiu, y aqtauncha kintalakatʼalmal kun chiyux. Aqtʼutucha anchal ni barco yu xakpuʼan, y chuncha laka vakni aqtauncha iktapasal taun julchan kun taun tatsʼisin lakamar. 26 Aqlhuucha kaltananta lakatin. Aqlhuva klaqpusa laʼaxkan taʼan lhuu. Iktapasal taʼan lhitaʼay por alhavanan. Lhitaʼay kintamapasal kintaʼisraelitas y vachu yu jantu israelitas kataval. Lhitaʼay iktapasal taʼan lajʼay putaulanaxna y vachu taʼan lakakʼivin y vachu lakamar. Lhitaʼay kintamapasal yu tanajun ketʼalaqaunin pero jantu laqsaval kataval. 27 Iktapatsal laqatapʼasta mas ayaj lhitaʼay. Aqlhuva laka putsʼis jantu kakltatal. Aqlhuva xakchavaniy y xakʼoqputun xkan, aqlhuva jantu kakvayl, xaktiʼukxuntayay taʼan lhikʼasniy y jantu xakmaqalin kilaqchʼiti. 28 Vachu alin alati yu lhitaʼay yu iktapasal. Vachu iklakpastakʼa ixlapanakni ni Dios yu tavilanal alati putaulanaxna. 29 Incha matichun tsʼanqaniy tapʼasta ex kitʼin vachu ijkʼatsan tacha kintsʼanqanil tapʼasta. Incha matichun chivijvakan para kamakal laqtaqal ex kitʼin kʼaqxajuy. 30 Incha kitʼin maqskʼiniy ay kakmakakal ex chuncha ay kakmakakanaʼ por klamasuniyau ni kitʼin kintsʼanqaniy tapʼasta. 31 Ni Dios yu ixPay kiJalhachimoʼonukʼan Jesús yucha paxtoqniy katoʼoyakal mas va tavanancha. Yucha kʼatsay ni kitʼin jantu ikmakanunun. 32 Tejkan xakvil laka putaulan Damasco, ni lhachimoʼonuʼ yu tapatsanil yu rey Aretas, yucha lhinaul kalaklhistakkal tachun ni laka puertas taʼan putaxtukan ni putaulan para lay kintachʼapal. 33 Va kintapumaʼeltajul kun qaychʼi la xaventana la xaʼex ni putaulan y chuncha ikpuqoslhi.
