1 TIMOTEO 4

1Yu Espíritu Santo va vas najun ni tejkan va laycha kamiʼol ni lakamunukpaʼ lati lapanakni katamakauntijlayaʼ ixlhakapuʼatkʼan. Kataqalasmatʼaʼ jalakmakanunun espíritus kun yu tamasuy ni aqmoqxnun. 2Kataqalasmatʼaʼ lapanakni yu tamakanun, yu tʼuy ukxpuʼ tamakay. Yuʼuncha jantucha taa takʼatsan. 3Yuʼuncha talaktanchay lakxtuklati y vachu jantu taʼuyujnajun kʼaʼutʼi axtoqnu lhiʼuti. Chuncha tanajun mas va Dios makal ni lhiʼuti para lay kataʼul tachun yu talhakapuʼan y yu tamispay yu laqsaval tejkan taxtaqniy lhimalaqpuchuncha ni Dios. 4Tachun yu makal ni Dios si lajʼoxi y jantu lay kalaktanchau tuʼuchun. Va kalaqaʼiu y kaxtaqnilhaʼau lhimalaqpuchuncha ni Dios. 5Ni Dios ox laqtsʼin ni lhiʼuti tejkan xtaqniyau lhimalaqpuchuncha tacha najun la ixchivinti. 6Incha chuncha kalaqlhixaʼalayeʼe mintʼalaqaunin ex kʼaʼuneʼe ox ixʼoqxtamati ni Jesucristo. Chuncha kalhitsʼukʼuyeʼe tapʼasta tejkan tʼaylhipʼin kun yu ox chivinti yu masunikʼa. 7Pero jantu kamakʼatʼi kuenta yu axtoqnu chivinti yu jantu laqsaval kaval. Va kʼatʼapʼasnitʼi kun Dios para ox katʼoʼoyatʼi. 8Mas ayaj xtapal kʼatʼapʼasnitʼi la kilakatunajkʼan pero apalay ixlaqmiti kʼatʼapʼasnitʼi kun Dios. Chuncha kintalhiminiyan yu ox jatsukunti chavaycha y vachu yu jatsukunti yu kaʼalinaʼ astan. 9Yu tacha aniy yucha laqsaval y tachun maqskʼiniy katalhakapuʼal. 10Va por yucha la pʼas klhitapatsayau y klhimaqanlqajnanau. Va pakxanʼiyau ni Dios yu kujta. Yucha lay jamalaqtaxtuy tachun ni lapanakni, y yucha ox kintamalaqtaxtuyan yu lhakapuʼanau. 11Yucha kalaqpʼutʼeʼe y kamasutʼi. 12Jantu matichun lakatʼuniy katamakan por tsʼalkaʼ kʼatʼi. Ox katʼiʼukxuntʼay para lay katalaqtsiʼin yu talhakapuʼan. Chuncha katamispaniyan ni ox minchivinti kun mimputsuku kun mijapaxkanti kun metsukunti kun milhakapuʼati, vachu ni jantu kʼamaqtʼaʼalhin. 13Kalaqpʼutʼeʼe ixchivinti Dios, kaxtʼaqtʼi jatapastakʼati, y ox kʼamalanin tus tejkan kakchaʼantachal. 14La ox kʼamakʼatʼi kuenta yu Dios xtaqnitan la metsukunti para kalaqʼaqtʼayʼutʼi alati yu talhakapuʼan. Yucha laʼaʼitʼi tejkan ni xalajʼaynin yu talhakapuʼan talaqputeʼel ixchivinti Dios y tamoqslanin ixmakakʼan. 15Ox kaʼukxpʼupʼi por tachun yu aniy, ex tachun ni lapanakni lay katalaqtsʼin tacha yu uxintʼi tʼaylhipʼin. 16Ox kʼalhistʼajkʼa meʼeman y vachu ox kʼalhistʼaktʼi ixmasuka ixchivinti Dios. Vas kaʼukxpʼupʼiti tacha lhinajun. Chuncha kʼalaqtʼaxtʼuyeʼe y vachu katalaqtaxtuyaʼ yu taqalasmatʼan.

will be added

X\