1 TIMOTEO 3

1Yu inchine va laqsaval, yu laklhistakputun yu talhakapuʼan, yucha ox lhitapatsa yu makaputun. 2Xlhiyucha yu kalaklhistakyaʼ yu talhakapuʼan yucha maqskʼiniy kaval yu jantu lay mukʼanikan laqtaqal. Vamun qayntaun xanati kalhitsukul, ox yu kalhistakkal la ixjatsukunti, ox kalakpastaknal, katoʼoyakal, ox kalaqlaqaʼil lapanakni la ixchaqaʼ y ox jamalaniniʼ kaval. 3Jantu maqskʼiniy kataʼapʼal, jantu kalakasamanal, va qalʼox kaval. Vachu jantu kapastaklhi tacha lay kamakanuxtul tumin. Maqskʼiniy ox jamapaynini lapanaki kaval y jantu kalakxkaul lhilukuj. 4Tsʼanqay ox kalhachimoʼonul ixpulakna la ixchaqaʼ y kalakmakal ni ox kataqasmaknal yu sasʼatʼan y ox katatoʼoyanal. 5Incha jantu laniy lhachimoʼon la ixpulakna la ixchaqaʼ, ¿tas laycha kapulhistakʼaʼ ixlapanakni Dios? 6Tsʼanqay kaval lapanaki yu maqancha lhakapuʼan para jantu ay lapanaki kakʼatsal. Ex jantu chuncha kamukʼanikal laqtaqal tacha mukʼanikal ni xaʼukxtin aqmoqxnu. 7Vachu tsʼanqay ox katatoʼoyal yu jantu talhakapuʼan para jantu kamakal yu jantu ox laqtsʼinkan para jantu katsukul tamakaunaʼ la isqapa ni aqmoqxnuʼ. 8Vachu yu aqtayjunin tsʼanqay kataval jatoʼoyanan lapanakni y jantu tʼuy ukxpuʼ katamakal. Vachuʼ jantu taʼapʼan kataval y jantu katamakanuxtul tumin. 9Vachuʼ ox kataylhaʼal yu chavay kintamasunincha Dios yu lhakapuʼanau. Maqskʼiniy ox katakʼatsal ni jantu katalhitsukul laqtaqal. 10Maqskʼiniy kalaqtsʼintanuʼelakal. Ex chuncha incha jantu katalhitsukul tuʼuchun laqtaqal lay kataval tacha aqtayjunin. 11Vachu ni xanatin tsʼanqay kataval jatoʼoyanan y jantu katalaklkanal y ox kalaklhistakkal la ixjatsukuntikʼan, y kalakmispakal ox tatapatsay mas va tichichuncha lhitapatsa. 12Yu aqtayjunin kataval va katalhitsukul qayntamin ixanatikʼan y ox katalhichimoʼol sasʼatʼankʼan la ixchaqakʼan. 13Yu ox tatapatsay tacha aqtayjunin, yuʼuncha apalay ox laktoʼoyakan. Chuncha jantucha tatalhanajlhichiviniy tacha talhakapuʼan ni Cristo Jesús. 14Ikpakxan niman kaklaqʼantachaʼan pero chavaycha iktsʼoqniyan. 15Ex chuncha incha kaktaqmaqayaʼ, kakʼatsʼayeʼe tas laycha kʼapʼutiʼukxuntʼay kun ixlapanakni ni Dios yu laqsaval kujta. Va por yuʼuncha jantu lay miʼojoy ni chivinti yu laqsaval, vachu va tacha aqataun chaqaʼ yu jantu lay miʼojoy por yu ox xaputayan. 16Jantu va tʼuy chivinti kaval. Mas jantu ixmispakan, la ay yu makata ni Dios para katoʼoyakal: Tasul tacha qayntaun lapanaki. Ni Espíritu Santo la ay makal. Ixmayulnin Dios talaqtsʼil. Va laqputeʼekal taʼakchun putaulanaxna, va lhiʼaynkal aniy lakamunukpaʼ, va laqaʼikal laktʼiyan.

will be added

X\