1 TIMOTEO 2

1Pʼunaj klhinajun ni katatʼachivinil Dios yu talhakapuʼan y va katalhitapaynil y kataskʼinil Dios por tachun ni lapanakni y kataxtaqnil lhimalaqpuchuncha. 2Va katatapayninil Dios por lhachimoʼonun ali tachun yu lajʼay lapanakni para chuncha oxamaktaun kaval ketsukuntikʼan para lay katoʼoyau ni Dios y lay katiʼukxuntayau tacha lapanakni yu ox toʼoyakan. 3Va la ox tejkan chuncha tapayniniyau y chuncha lhipaʼiniy ni Dios kiJamalaqtaxtunukʼan. 4Yucha najun katalaqtaxtul tachun ni lapanakni y katamispal yu mero laqsaval. 5Va alin taun Dios. Ni Jesucristo val lapanaki y yucha tanʼajvil para ox katalalaqtsʼinchoqol ni Dios kun ni lapanakni. 6Yucha xʼaman xtaqkal para kamaqnikal para lay katalaqtaxtul tachun ni lapanakni. Chuncha tapasal y laqputeʼekal tejkan paxtoqnil. 7Va yucha klakʼulakanta para klaqputeʼel tacha ixtamalaqachan Jesús, va laqsaval yu knajun, jantu ikmakanunun. Klakʼulakanta ni kaklakmalanil yu jantu israelitas kataval para katalhakapuʼal y katamispal yu laqsaval. 8Va iknajun mas va toʼoxtaycha kaval katatapaynil ni lapanakni y katamaqstal ixmakakʼan jantu kun laqtaqal nisin jantu katalatalqaunil tejkan taskʼin Dios. 9Vachu yu xanatin maqskʼiniy katalakatayal kun laqchʼiti jantu va para ay katakʼatsal. Jantu maqskʼiniy ayaj ox katalaʼoxil ixʼajikʼan y jantu maqskʼiniy kataʼulal oro nisin yu laqspututu chiyux yu laqlhuu xtapal, nisin laqchʼiti yu laqlhuu ixtapal kaval. 10Yu maqskʼiniy va katamakal yu lajʼoxi lhitapatsa tacha yu paxtoqniy katamakal xanatin yu ayaj tatoʼoyay Dios. 11Yu xanatin va maqskʼiniy saq katamaʼal la ixjatapastakʼatkʼan yu talaniy y katalaqaʼil yu talhinajun ixapaykʼan. 12Kitʼin jantu klaqxtaqniy lakatin para katamalaninil taʼan la alin lapanakni vachu jantu para katalhichimoʼol ixapaykʼan. Va maqskʼiniy saq kataval. 13Yu pʼunaj makakal va Adán ex astan yu Eva. 14Yu Adán jantu kamakanukal, va makanukal yu xanati, ex chuncha alil ni talaqalhin. 15Pero ni xanati tejkan lhitsukuy sasʼatʼa kalaqtaxtuyaʼ incha makay ni lhitapatsa yu paxtoqniy. Kalaqtaxtuyaʼ incha taylhaʼan lhakapuʼan y japaxkanan y incha tiʼukxuntayay tacha paxtoqniy ixlapanaki Dios kun ox jatapastakʼati.

will be added

X\