1 TIMOTEO 1

1Kitʼin kPablo, ixtamalaqachan Jesucristo kunita va por chuncha kilhijunil Dios kiJamalaqtaxtunuʼ y vachu Cristo Jesús yu pakxanʼiyau. 2Aniy iktsʼoqniyan uxintʼi, Timoteo, yu tacha mero kesʼatʼa untʼi tejkan lhakʼapʼupʼi ixchivinti Dios. Kamapaynin y kapaxkan y oxamaktaun kamakan kimPay Dioskʼan kun Cristo Jesús kiJalhachimoʼonukʼan. 3Klhijunin tejkan xajkʼanta Macedonia va katʼaʼul laka putaulan Éfeso para kʼalaklhiʼun lati lapanakni jantucha katamasul aputaun jatapastakʼati yu jantu laqsaval kaval. 4Vachu jantu katamakal kuenta yu kuentos y valiʼiy chivinti yu lhichiviniy yu tatapasal ixpayankʼan la maqancha. Va yucha talalhikiltsakʼastukʼa ni lapanakni. Jantu kintaʼaqtayjuyan para lay kamakau ixlhitapatsa Dios yu lay makakan vamun incha kalhakʼapʼupʼi. 5Va chuncha klhijunin para katalapaxkal ni lapanakni. Chuncha lay talapaxkay tejkan jantu kaʼalil talaqalhin la ixjalhanutkʼan, tejkan ox takʼatsay ni jantu katalhitsukul laqtaqal, tejkan laqsaval talhakapuʼan. 6Lati yu jantu vas tataylhaʼan tamaqamay katalhilakchivinil yu jantu aqtayjunun. 7Tamalanininputun ixlhachimoʼonkʼan ni israelitas pero jantu tamalaqasiy tisuncha tachiviniy mas va talaninin takʼatsan. 8Kʼatsayau yu lhachimoʼon yucha la ox incha kalhimapʼatsʼatʼi tacha paxtoqniy. 9Kʼatsayau ni lhachimoʼon jantu para yu lajʼoxin kaval, va para yu jantu ox tamakay ali yu talaktuʼunun, para yu jantu tatoʼoyay Dios ali yu tamaqtaqalhinin, para yu jantu tatapatsaniy Dios ali yu jantu tatoʼoyay kilhakapuʼatkʼan, para yu tamaqniy ixpaykʼan kun ixnatikʼan, para yu jamaqninin, 10para yu tatʼatamay lapanakni yu jantu ixnavin kaval, para yu talachʼapay joʼakna tacha xanati kaval, para yu taʼalhaustʼay lapanakni, para yu jamakanunun, y para yu tanajun va laqsaval pero talaklkanan. Ni lhachimoʼon vachu va para jantu kamalanikal chivinti yu kalaktanchal yu vas lhichiviniy Dios. 11Chuncha paxtoqniy kun yu ox chivinti yu masuy ixʼayaxtu Dios yu ay junita. Va yucha kilakʼulal para kaklaqputeʼel. 12Ikxtaqniy lhimalaqpuchuncha ni kiJalhachimoʼonukʼan Jesucristo yu kixtaqnita tapʼasta. Yucha kilhiʼaynlhi, va kilakʼulal para kaktapatsanil. 13Chuncha kimakata mas maqancha jantu ox xaklhichiviniy. Va xaklhimaqchapuy, xaklaktuʼuy. Pero jantukaʼ xaklhakapuʼan y jantu xajkʼatsay yu xakmakay xlhiyucha kimapaynil. 14Va ayaj kimapaynil kiJalhachimoʼonukʼan para kaklhakapuʼal y kaklhitsukul ixjapaxkanti ni Jesucristo. 15Va laqsaval y maqskʼiniy kalhakapuʼankal ni inchine chivinti, ni yu Cristo Jesús kilachil lakamunukpaʼ para kalaqmalaqtaxtul yu tamaqtaqalhinin. Kun tachun yu tamaqtaqalhinin kitʼin yu palay ay xajkunita. 16Xlhiyucha kimapaynil. Chuncha tejkan kimalaqtaxtul kitʼin, ni yucha apalay masul ni Cristo Jesús va ayaj jalaqmaqantaulniy ni lapanakni. Chuncha kalakmasunikal yu ixtalhakapuʼuxaʼan yucha, para katalhitsukul ni jatsukunti yu jantu aqtaun kamiʼoyaʼ. 17Va katoʼoyakal ni ay Jalhachimoʼonuʼ y ay kamakakal mas va tavanancha, jantu aqtaun katamaktal. Yucha si kalhachimoʼonunaʼ, jantu aqtaun kaniyaʼ, jantu laqtsʼinkan, vamun yuʼ Dios junita y ay jatapastakʼati lhitʼajun. Va chuncha kavalcha. 18Timoteo, kesʼatʼa kʼatʼi, ikxtaqniyan aniy lhitapatsa para ox katayanin tacha qayntaun tropa yu tanun laka lhilukuj. Vachu va tacha uxintʼi talhichivinin tejkan talaqputeʼel ixchivinti Dios. 19Katʼayanin kun milhakapuʼati y kakʼatsʼa ni jantu kaʼalil milaqtaqal. Lati jantu chun tapastaklhi y tamaqatsʼanqal ixlhakapuʼatkʼan vachu va tacha tsʼanqay laqataun barco tejkan taqalhiy. 20Chuncha tatapasal ni Himeneo ali Alejandro yu jantu ox ixtalhichiviniy Dios. Klakmakaul kun ni Satanás para katalanil ni jantucha chuncha katataylhaʼal.

will be added

X\