1 TESALONICENSES 5

1Jantu maqskʼiniy kaklatsʼoqniu tavanancha chuncha katapasayaʼ u tas kunacha. 2Ox kʼatsʼayatʼikcha ni jantu lhikʼatsan tavanancha kaminaʼ ni kiJalhachimoʼonukʼan. Ni anchanu julchan vachu va tacha qayntaun alhavanaʼ yu min laka putsʼisni. 3Tejkan tanajun ni lapanakni: “Oxamaktaun juntau, jantu tuʼuchun kaʼalinaʼ”, exnicha kalaktʼilhiʼokanaʼ. Va kunaʼ vachu va tacha tejkan qayntaun xanati yu maqlaqavananputun. Jantucha kaʼalina toʼoxtaycha katapuqoslhi. 4Pero uxiknankʼan, ketʼalaqaunin, jantucha tʼiʼukxuyanantʼik taʼan putsʼista. Tejkan kaminaʼ ni anchanu julchan jantu vak kakʼatsʼanapitik tacha kamil qayntaun alhavanaʼ. 5Uxiknankʼan va tacha alintʼatʼik laka jatunkunuʼ va por malaʼasiyatʼik ixchivinti Dios. Jantu kajuu tacha yu taʼukxuyanal laka putsʼisni yu jantu talhakapuʼan ni Dios. 6Xlhiyucha jantu maqskʼiniy kaltatau la kijatapastakʼatkʼan tacha yu jantu talhakapuʼan. Maqskʼiniy kakujvi y ox kalakpastaknau tacha yu laqa aqstunkuj lapanakni. 7Yu jantu talhakapuʼan Dios va tacha ni lapanakni yu taltatay laka putsʼisni. Jantu takʼatsay suncha katapasayaʼ. Vachu va tacha lapanakni yu tataʼapʼay laka putsʼisni. Jantu takʼatsay yu tamakay. 8Pero kijnankʼan va alintau laka jatunkunuʼ. Xlhiyucha maqskʼiniy ox kalakpastaknau tacha yu laqa aqstunkuj lapanakni. Ox kapaxkanau y ox kalhakapuʼau ni Dios, va tacha kaʼulau kilaqchʼitkʼan yu tsasnati para jantu lay katʼalkau. Vachu maqskʼiniy ox kapakxanʼiu kalaqtaxtuu, va tacha kʼaqtanuu tsasnati para jantu lay katʼalkau. 9Ni Dios jantu najun kamaqanlqajnau la ixlhilukuj, va najun katalaqtaxtuu por yu makal ni Jalhachimoʼonu Jesucristo. 10Yucha nil por kijnankʼan para katʼataultachaʼau kun yucha tejkan kaminchoqoyaʼ, mas va kakujvi u mas va kaniu. 11Ex chuncha kun yu aniy chivinti kalamakʼuvilatʼik y kʼalamaʼayajnitʼik la milhakapuʼatkʼan vachu va tacha tʼaunatʼik makanan. 12Ketʼalaqaunin, klatapayniniyau kalaktʼoʼoyatʼik yu ayaj tatapatsay kun uxiknan. Talhijunan tacha najun ni Jalhachimoʼonu Jesús y taxtaqniyan jatapastakʼati. 13Va ox kalaktʼoʼoyatʼik y kalakpʼaxkʼatʼik por ni lhitapatsa yu tamakaniyan. Laqa lajʼoxi kaʼalintʼik. 14Ketʼalaqaunin, vachu klalhijunau kʼalaqxtʼaqnitʼik jatapastakʼati yu jantu tatapatsay, kʼalakmaʼayajnitʼik yu tatalhanan, kalaqʼaqtʼayʼutʼik yu tatsʼanqaniy tapʼasta la ixjatsukuntikʼan y kamaʼantʼaulnitʼik tachun ni lapanakni. 15Kʼalhistʼajkʼantʼik. Jantu tuʼuchun kʼamakʼanichʼoʼotʼik yu tamakaniyan yu jantu lajʼoxi. Kʼalamakʼaniʼalhitʼik yu lajʼoxi siya uxiknan y vachu kun tachun yu alati lapanakni. 16Kaʼachʼanʼalhitʼik. 17Kaskʼinʼalhitʼik ni Dios. 18Mas va tisuncha yu tapasaycha kaxtʼaqnitʼik lhimalaqpuchuncha ni Dios. Chuncha najun Dios kamakʼatʼik va por ixnavin Cristo Jesús untʼatʼik. 19Jantu kalaktʼanchʼanitʼik ixlhitapatsa ni Espíritu Santo. 20Jantu kalaktʼanchʼanitʼik tejkan laqputeʼekan ixchivinti Dios. 21Kʼapʼuxkʼaulaqtsʼintʼik tachun ni chivinti, incha laqsaval ex ox kʼalaʼaʼitʼik. 22Jantu kʼatʼanutʼik tuʼuchun yu jantu ox kaval. 23Ni Dios yu lakmaʼoxamaktamiy lapanakni va yucha katamakanin ixnavin tachun metsukuntikʼan. Va najun katʼaʼayntsʼatʼik y jantu kaʼalil tuʼuchun laqtaqal la metsukuntikʼan ali milhitsukunukʼan ali milakatunajkʼan tejkan kaminaʼ kiJalhachimoʼonukʼan Jesucristo. 24Dios yu tajuntaʼitan yucha lay lhakapuʼanikan, si makay tacha yu najun. 25Ketʼalaqaunin, kaskʼinitʼik Dios para kintaʼaqtayjun. 26Kalakmastʼakʼatʼik tachun yu talhakapuʼan kun taun jakiltastuknuti tacha paxtoqniy yu ixnavin Dios. 27Kitʼin klalhijunau kun ixtapʼasta kiJalhachimoʼonukʼan ni kʼalaqpʼutʼeʼenitʼik ni aniy karta tachun yu alati ketʼalaqauninkʼan. 28Katamapaynin ni kiJalhachimoʼonukʼan Jesucristo. Va chuncha kaval.

will be added

X\